Bu dünnää belası olan koronavirus beterinä unuttuk vakıdında yazmaa onu, ani 20 yıl geeri Baba Marta ayın 10-da, çok yıllar aaramaktan sora, gagauzların apostolunun, dünnää uurunda büük aydınnadıcısının, bilim insanın hem klisä adamının Protoierey Ay-Boba Mihail ÇAKİRin mezarı bulundu. O mezarı kim sadä aaramadı: Romıniyada yaşayan Mihail ÇAKİRin senseleleri da, Çadırdan Protoierey Dimitri KİROGLU da, yazıcılar Dionis TANASOGLU, Stepan KUROGLU, Todur ZANET ta, başka insannar da. Ama buldu mezarı Moldova Bilim Akademiyasının zaametçisi Nikolay Andreeviç DEMÇENKO. Bu iş halizdän unudulmasın deyni, aslıyı üzä çıkarmak için hem yalancıların aazlarını kapamaa deyni, büün enidän tiparlêêrız mezarın bulunması için 2000-ci yılda ilk yazımızı.
Baba Marta ayın 10-da, taman “Ana Sözü”n geçän nomeri çıktıydı, redakţiyanın kapusu açıldı da içeri girdi çadırdan Protoierey Dimitri KİROGLU. Selämnaşıp, lafetmää başladık. Belliydi, ani Ay-Boba Dimitri pek duygulu. Bän, nicä herkerä, nereysä alatlardım. Kalktık ayaa. Ay-Boba Dimitri deer:
– Todur, büük sevinmelik var! Bän sindi Ay-Boba Mihail ÇAKİRin mezarından gelerim!
Şaş-beş kaldım:
– Buldun mu?
– Bän diil, – dedi. – Annaştıydım Merkez (Ermeni) mezarlıın bakıcısınnan. Çok aaradık. Da te büün verdi haber: mezarı bulmuşlar.
Deerim:
– Gidelim, göster. Bukadar yıl oldu aarêêrız.
Ama dışarda karannıcak olardı. Ay-Boba Dimitri da Çadıra alatlardı. Annaştık, ani bu ayın 21-dä gelecek Kişinöva, da gidecez mezarlaa.
Cumêrtesi 18-dä redakţiyada çalışardım. Bir da geldi Petri ÇEBOTAR. Gözleri şılêêr:
– Todur, tanı neredän bän gelerim?! – Bir soluk çekip başardı. – Merkez mezarlıından.
Deerim:
– Mihail ÇAKİRin hem İrina ÇAKİRin mezarından…
Da annattım ona Ay-Boba Dimitriylän buluşmamı. Sora Petri annattı:
– Bana mezarın bulunması için annattı Nikolay Andreeviç DEMÇENKO. Söledi nicä mezarı bulmaa da. Ama genä da bir-buçuk saat aaradım buluncak.
Etiştik Baba Marta ayın 21-nä. Ama Ay-Boba Dimitri gelämedi Kişinöva, zerä adam suuklamış da yatêr hastalar evindä.
Biz Petriylän, alıp yanımıza adeta görä bir şişä şarap, ekmek, mezä hem çiçek, yollandık Ay-Boba Mihail ÇAKİRin hem onun karısının İrina ÇAKİRin mezarına. Petri biraz ilerdä, yolu gösterer, bän da ardına giderim. Etiştik klişenin yanına. Petri deer: “Say adımnarı.” Cekettim saymaa, ama şaşırdım.
Mezara yaklaştıkça ürääm sık-sık düülmää başladı. Bu yol bana ölä uzun göründü! Bir da Petri, durgunup, dedi: “Te mezar!” Yaklaştık. Seläm verdik. Okuduk:
Aci se odihnesc
Protoireu
MIHAIL CEACHIR
27 IV 1861- 8 IX 1938
şi soţia sa
IRINA CEACHIR
5 V 1863 – 28 XII 1934
Dormiţi ın pace scumpi parinţi
Petri deer:
– Bak, Mihail dädu bir aaraştırma İnstitutun işini tek başına yaptı… Bulü İrina da yanında…
Biraz sustuk. Sora çekettim patredä çıkarmaa. Duygulardan ellerim titirer. Petri ilktän kendini sıkardı, sora, bakêrım, onun da duyguları üzä çıkmaa başladı…
Açtık şarabı. Stavrozumuzu yapıp, ilktän mezarlara şarap döktük. Sora dört filcana: iki filcanı mezarlar üstünä koyduk… Şaraptan dadaceykana dedik:
– Topracıınız ilin olsun, Ay-Boba Mihail hem Matuşka İrina. Şükür Allaha, ani mezarlarınız da bulundu. Sizi unutmêêr gagauzlar… Topracıınız ilin olsun…
Todur ZANET (“Ana Sözü” No.6, 2000 y.)
PATRETLERDÄ: Mihail ÇAKİR.
Mihail ÇAKİR mezarının 2000-ci yılın Baba Marta ayın 21-dä görüşü (patret: Todur ZANETin).
