Gimn

22.07.2015, tarafından yazılı , CÜMNE BÖLÜMÜ, 1094 KERÄ BAKILMIŞ

25 yıl geeri Gagauz Milli Gimnası hem Bayraa kabledildi

İrmi beş yıl geeri, 1990-cı yılın Orak ayın (iyül) 22-dä olan Gagauz Halkın Kongresi 411 oylan (okadar delegat Kongrestä vardı) Gagauz Milli Gimnasını hem Bayraa kabletti. Hep orada incelendi Gerb ta (Gerb o toplantıda incelendi, ama kabledilmedi).

Gagauz Milli Gimnasının muzıkasını Mihail KOLSA, laflarını Todur ZANET yazdılar.  Gagauz Milli Bayraan hem Gerbın ideyası Georgiy STAMATOVun, avtoruluu da raametli resimcinin Pötr VLAHın. 

GAGAUZ MİLLİ GİMNASI

1.
Geldi vakıt – bayraa kaldır,
Dalgalatsın lüzgär onu.
Kavalları keskin çaldır,
Duuêr Halkın aydın günü!

Refren:
İnsana lääzım Vatan,
Halkına kalsın damar,
Kanında dedä sesi
Uzaktan evä çeksin.
Bucak’ta dannar açık –
Şannı olsun kardaşlık*.

2.
Zaman kanatları döner
Kıyıp kara bulutları.
Yaşamaya kuvet verer
Ana topraan çöşmeleri.

Refren:
İnsana lääzım Vatan,
Halkına kalsın damar,
Kanında dedä sesi
Uzaktan evä çeksin.
Bucak’ta dannar açık –
Şannı olsun kardaşlık.

* Gimnanın birinci variantında Refren bola bitärdi:
Bucak’ta açık dannar –
Kalkındı gagauzlar.
Ama zalda vardı başka milletli insannar da, ani Gagauz Respublikasını kurmak için delegat ayırılmıştılar, onuştan internaţionalizma sebepinnän bu iki sıra kabledilmedi.

BİR CUVAP YAZIN