Radulov

08.05.2019, tarafından yazılı , CÜMNE, KİŞİLÄR, SPORT BÖLÜMÜ, 764 KERÄ BAKILMIŞ

Aleksandr RADULOVun eni rekordu (Var ölä națiya – gagauzlar!)

Büünkü gündä Amerika Birleşik Devletlerin Milli Hokkey Ligasında (MHL) “Dallas Stars” komandasında oynayan Rusiyadan gagauz kökenni hokkeyist Aleksandr RADULOV kendi rekordunu aştı. “2019 Stanley Cup” kuboon pley-off oyunnarında 32 yaşındakı Aleksandr RADULOV 10 oyunda 9 (5+4) şaybaya saabi oldu (esaplar yapılêr “gol”+”pas” sistemasına görä). Eskidän onun rekordu 7 (2+5) şaybaydı.

Aleksandr RADULOV ABDnın en üüsek hokkey ligasının pley-offunda 34 oyunda pay aldı, onnarın otuzunda, “gol”+”pas” sistemasına görä, 30 (13+17) şaybaya saabi oldu.
Radulov_1

 

2010-cu yılın Çiçek ayın (aprel) 24-dä “Ana Sözü”ndä Aleksandr RADULOV için biz yazdıydık bir “Var bölä națiya – gagauzlar!” adlı yazı. Eridir büün o yazıdan bir parçayı burada enidän tiparlamaa. 

Var ölä națiya – gagauzlar!

Açan XX-ci üzyılın 40-cı yıllarında sovet kuvetleri gagauzları daran-peran etti, kimilerini zorlan mezarlara sokup, kimilerini da, erlerindän Sibirä kaldırıp, bütün SSRB topraklarına daattı, Sverdlovsk dolayın Nijniy Tagil kasabasına düşmüş bir gagauz kızı. Nicä halizdän bu olmuş şindi biz kesin bilmeeriz. Ama bileriz, ani o kızdan çekiler anılmış rus sportsmenın Aleksandr RADULOVun kökleri.

Biz herkerä şaşêrız hem sevineriz, açan dünneyin bir köşesindä bulêrız bir anılmış insanı, ani kendisini gagauz duyêr. Bakmadaan ona da, ani o insanarın çoyu gagauzçayı bilmeer, onnar kendi canında GAGAUZLUU taşıyêrlar. O insannarın birisi – Aleksandr RADULOV, sportsmen, hokkeyist, Rusiyanın milli hem olimpiada hokkey komandasının oyuncusu.

Bu sportsmen anılmış oldu bütün dünneyä kendi harakterınnan. Bir şüpesiz var nicä yazmaa – kendi gagauz harakterınnan. Bunu Aleksandr kendisi da açıkladı bir intervyuda PROsport agenstvosuna: «Я родился в Нижнем Тагиле, папа и мама мои русские. Я в бабушку по папиной линии пошел. К сожалению, я ее никогда не видел, она умерла в 1985 году, а я родился в 1986-м. Но по фотографиям вижу – весь в нее. Волосы тоже очень темные. Папа рассказывал, что есть такая национальность гагаузы. Так что в моих жилах течет гагаузская кровь». (“Bän duudum Nijniy Tagilda, bobamnan anam rus. Bän bobamın tarafından malimä benzeerim. Yazık, bän onu hiç bir kerä görmedim, o 1985-ci yılda geçindi, bän sa 1986-da duudum. Ama patretlerdän görerim – tıpkı oyum. Saçlarım da pek esmer. Bobam annattı, ani var ölä naţiya gagauzlar. Bu üzerä dä benim damarlarımda gagauz kanı akêr”).

Foto: MHLın ofițial saytından

BİR CUVAP YAZIN