arif_nihat_asya

30.09.2014, tarafından yazılı , LİTERATURA, TÜRK DÜNNÄSINDAN ŞİİR BÖLÜMÜ, 2940 KERÄ BAKILMIŞ

“Bayrak şairi” Arif Nihat ASYA

Arif Nihat ASYA (07.02.1904 – 05.01.1975) anılmış Vatan hem Bayrak poetı Türkiyenin İnceğiz küüyündä duumuş. Milliyetçi lii hem türklüü üüseklerä kaldıran bir poet.  En anılmış şiiri “Bayrak”. Bu peeti için ona “Bayrak şairi” da deerlär. Bundan kaarä Arif Nihat ASYAnın çok lirika peetleri da var.

BİR BAYRAK VAR LÜZGÄR BEKLEER!
Şehitler tepesi boş diil,
Biri var – bekleer.
Hem bir güüs, soluk almak için,
Lüzgär bekleer.
Mezarı yakışmış bu kutlu tepeyä;
Yattıı toprak belli,
Tuttuu bayrak belli:
Kim demiş bilinmeyän bu askerä?

Dastanını yapmış, Ódasına kanmış.
Bir el ki – o dünneyä uzanmış,
Saygıylan gelip birär birär öpsün deyni ölümnülär!
Öpelim, temiz sä dudaklarmız,
Ama basmasın topraa temiz diil sä ayaklarmız.
Lüzgerini kesmesin güüdelär
Sesindän üüsek çıkmasın söleyişlär hem Ódalar.

Geeri gitsin pálmalar ötmesi,
Geeri gitsin ellerin yapma çiçekleri!
Ona oollardan, analardan dileklär eter,
Yazın sarı, kışın biyaz çiçeklär eter!
Söledi söleyennär temin,
Gel süngülü iitlerä pálma düülsün,
Şindi sän sölä, söz senin.

Şehitler tepesi boş diil,
Topraanı kahramannar bekleer!
Hem bir bayrak dalgalanmak için,
Lüzgär bekleer.
Dastanı üüsüz, susması derin bilinmeyän askerin;
Mezarı yakışmış bu kutlu tepeyä
Yattıı toprak belli,
Tuttuu bayrak belli:
Kim demiş bilinmeyän bu askerä?

(Gagauz türkçesinä aktardı Todur ZANET)

Anaktar sözlär :

BİR CUVAP YAZIN