preskonf_22.12.2017

27.12.2017, tarafından yazılı , CÜMNE BÖLÜMÜ, 299 KERÄ BAKILMIŞ

Büükelçi Hulusi KILIÇ dedi: “Benim için 2017-ci bir altın yıl olmuştur!”

Kırım ayın 22-dä Türkiye Kişinev Büükelçisi Hulusi KILIÇ bir preskonferenţiya yaptı, neredä Moldovada Türkiye Büükelçiliin 2017-ci yılda yaptıklarını hem 2018-ci yıla plannarını açıkladı.  Preskonferenţiya başında Büükelçi Hulusi KILIÇ dedi: “Benim için 2017-ci bir altın yıl olmuştur!”

Canabisi urguladı ani 2017-ci yılında tamamnandı 25 yıl, nicä Türkiye hem Moldova arasında diplomatiya ilişkileri kuruldu. Bu önemni yılda iki devlet arasında en üüsek uurda vizitlar yapıldı. Bunnarın arasında birincisi – Türkiye Başbakanı Binali YILDIRIMın may ayında Moldovaya vizitı. İkincisi – hep may ayında Moldova Prezidentı İgor DODONun Türkiyeyä vizitı. Üçüncüsü da – Ceviz ayında Moldova Parlamentın spikerı Andrian KANDUnun Türkiyeyä vizitı. Dördüncüsü da – geçän afta, alış-veriş hem ekonomika işbirlii Moldova-Türkiye Komisiyasının IX toplantısınnan ilgili oılarak, Moldovaya Türkiye Respublikasının Başbakan yardımcısı Hakan ÇAVUŞOĞLUnun vizitı. Bu vizit zamanında iki devlet arasında 13 işbirlii protkolu imzalndı.

2017-ci yılda Türkiyenin bütün Moldovada büük saalık hem cümne proektları yapıldı. Bölecä 2017-ci yılda yaptıkların altını çizeräk, Büükelçi Hulusi KILIÇ urgıladı, ani onun bakışına görä “Moldova-Türkiye ilişkileri uurunda 2017-ci yıl altın yıl oldu!”

Geçeräk 2018-ci yılında yapılacek işlär için Canabisi açıklayarak urguladı, ani onnarın arasında en önemni olacek yılın ilk payında Moldovaya Türkiye Respublikasının Prezidentı Recep Tayyip ERDOĞAN beklenän vizitı. Vizit zamanında strategiyalı ortaklık uurunda bir annaşma imzalanacek.

2018-ci yılda İstanbulda Moldovanın alış-veriş odası açılacek.

Hep ileriyä iki devlet arasında iç pasportlarınnan gidiş-geliş kolaylıı aslıya çıkaralacek.

Komratta Türkiyenin bir Başkonsolosluu açılacek.

Bakarak 2017-ci yılına, 2018-ci yıl iki devlet arasındakı ortak işlerindä taa yıvın bir yıl olacektır.

Preskonferenţiyayı başararak, Büükelçi Hulusi KILIÇ zalda bulunan hepsi jurnalistleri Eni Yıllan hem Kolada yortularınnan kutladı.

Foto: moldpres.md

BİR CUVAP YAZIN