cadir_vale_perjey_girişi

19.05.2020, tarafından yazılı , CÜMNE BÖLÜMÜ, 255 KERÄ BAKILMIŞ

Çadırda COVID-19 patlaması: ilktän küstülär, sora da Çadıra koronavirusu getirdilär

Gagauziyanın Üstolan Durumnarı Komisiyası (ÜDK), kendi incelemeklerindän sora, geldi karara, ani Gagauziyanın Çadır kasabasının bolnițasında COVID-19 patlamasının sebepi – virusun komsu Valä Perjey bulagar küüyündän burayı getirilmesi, bildiriler ÜDKnın presaya açıklamasında.

Komisiya bulmuş, ani koronavirus hastalıın infekțiyasını ilkin Çadır kasabasının bolnițasının duudurma hem nevrologiya bölümünä ulaştırmışlar. İki erdä dä ulaşannar kontaktta bulunmuşlar Valä Perjey bulagar küüyündän insannarlan. Bu küüdä COVID-19 patlaması taa Çiçek ayın (aprelin) başında.

Ozaman, Çiçek ayın (aprelin) 7-dä, Çadır kasabasının primarı Anatoliy TOPAL danıştıydı hepsinä tekliflän: “Valä Perjeydä koronavirus patlaması. 6 kişi ulaşan var, çoyu karantinda bulunêr. İnandırıp ta yalvarêrım hem isteerim, Valä Perjey küüyünä taa siirek gidin hem oradakı senselelerinizlän taa aaz görüşün, buyur etmeyin musaafirlää oradan insannarı… Brakmayın kasabamıza mındarlık girsin. Sadä durumun serioz olduunu hem hepsi sanitar normalarına uyarak, biz becerecez durgutmaa bu zarazayı – koronavirusu”.

Bu laflara valäperjeylilär, kimin sa izininä görä, ilktän küstülär, da internettä türlü işlär başladılar buna karşı yazmaa, sora da koronavirusu Çadıra getirdilär, ulaştırıp hem öldürüp bunca insanı.

Şindi susêrlar. Ama insan onnara sorêr: sizin getirdiiniz koronavirustan öldürülän kasabamızın en islää insannarını kim geeri döndürecek?

Şindi Çadırda uşalannarın sayısı 127-ya etişti. Onnarın arasında 17 medițina zaametçisi, bildirdi Moldova saalık ministerlii. Onnarın taa çoyu işlärdilär bolnițanın nevrologiya, terapiya hem duudurma bölümnerindä.

Durumu açıklayarak, Çadır kasabasının primarı Anatoliy TOPAL dedi: “Kasaba karantina kapanma kertiinä geldi. Bu da – Çadır için katastrofa olacek”.

Praskovya BOSTANCI

 

Anaktar sözlär : , , , ,

BİR CUVAP YAZIN