kongaz_futbol_forrmasi

25.03.2016, tarafından yazılı , CÜMNE BÖLÜMÜ, 970 KERÄ BAKILMIŞ

Gagauziya Başkanından Kongaz liţeyin futbol komandasına forma baaşışı

Baba Marta ayın 24-dä, Nikolay ŞVEŢOVun anmasına I-ci mini-futbol turnirın açılışında, Kongaz Todur ZANET teoretik liţeyin futbol komandası kabletti Gagauziya Başkanından İrina VLAHtan 18 futbol forma komplektı. Getirdi hem Gagauziya Başkanın adından genç sportçulara o formaları verdi Gagauziya gençlik hem sport Upravleniyanın başı Maksim BOLGAR.

Bu formaları baaşlamaa deyni sözünü Gagauziya Başkanı İrina VLAH verdiydi 2015-ci yılın Ceviz ayın (sentäbri) 11-dä Todur ZANET teoretik liţeyindä mini-futbol meydanın ofiţial açılışında. Bileriz, ani Canabisi o formaları çoktan hazırladıydı, ama bir türlü önemni bir olay ortaya çıkmardı, bu büük işi yortululu sırasında yapmaa deyni.

Da te, Baba Marta ayın 24-dä, bu önemni kolaylık peydalandı – Büük Vatan cengin veteranın Nikolay ŞVEŢOVun anmasına I-ci mini-futbol turnirı.

Formaları verärkana Gagauziya gençlik hem sport Upravleniyanın başı Maksim BOLGAR dedi: “Gagauziya Başkanı adından sizi selemnêêrım. Büün bän aslıya çıkardım İrina VLAHın izinini da getirdim liţeyinizin komandasına bu futbol formasını. İnanêrım, ani o verecek kolaylıı sport uurunda taa uygun hem başarılı olasınız”, bildirer Gagauzinfo.MD portalı.

Kablederäk formaları liţeyin direktoru İordan Nikolaeviç YASIBAŞ şükür etti formaları yollayana da, getirenä da: “Bütün liţeyin adından şükür ederim Gagauziya Başkanına İrina VLAHa bu pek gözäl hem islää baaşış için  Bizim futbol komandamızın bu işä çoktan zoru vardı. Saa olasınız!”

BİR CUVAP YAZIN