ght_tablo

27.12.2016, tarafından yazılı , ANALİTİKA, CÜMNE BÖLÜMÜ, 278 KERÄ BAKILMIŞ

Gagauziya Halk Topluşu seçimnerindä oynamalar, protestlar, arestlar hem cezalar

Kırım ayın (dekabri) 22-dä Komrat Apeläţiya Palatasının Kararına görä Komradın 1-ci seçim bölümündä Gagauziya Halk Topluşuna seçimnär enidän olacek. Bu Kararlan kayıl olmadı bu bölümdän ayırılan Dimitriy KONSTANTİNOV. O üzerä kendisi taa üüsek suda apeläţiya verdi.

Aklınıza getireriz, ani ofiţial açıklamaya görä, Gagauziya Halk Topluşuna seçimnerin II-ci turunda Komradın 1-ci seçim bölümündä Dimitriy KONSTANTİNOV için verildi 60,7% oy,

İkinci kandidat Vitaliy DRAGOY için sa 39,3%. Bununnan kayıl olmadı Vitaliy DRAGOY, angısı için I-ci turda verldiidi 49,6% oy, Dimitriy KONSTANTİNOV için sa 23,7%.

Vitaliy DRAGOY Komradın 1-ci seçim bölümündä Gagauziya Halk Topluşuna seçimnerin II-ci turunda olaylar için prokuraturaya protest etti. Protestın sonucu oldu o, ani Komradın 1-ci seçim bölümün 2-ci bürosunun seçim bölümünün başı Elena TODOROVA aresta alındı, ama üç gündän sora, serbest brakıldı.

Hep bu protestlan ilgili olarak, 30 günä arest altına alındı seçimnerdä Dimitriy KONSTANTİNOV için agitaţiya yapan Anatoliy MAVRODİ, Gagauziya Radio Televideniya kompaniyasının gözledici Sovetin sekretari hem “Gagauziya-Oguzsport” futbol klubun prezidentı. Ona kabaat atêrlar, ani seçim günündä seçimcileri satın alarmış.

Taa sora, hep bu uurda kabaat atarak, aresta alındı Dimitriy KONSTANTİNOVun eşi da – Mariya KONSTANTİNOVA. Birkaç vakıttan sora, bireri çıkmamak için ondan imza alıp, Canabisini kolverdilär

Gagauziya Halk Topluşuna seçimnär sadä bu kavgalarlan bitmedi. Gagauziyanın prokuraturasına danıştı Beşalma küüyün 13-cü seçim bölümündä kandidat Nikolay KUYÇOGLU o falsifikaţiyalar için, ani, nicä sayêr kendisi, olmuşlar bu seçim bölümündä Gagauziya Halk Topluşuna seçimnerin II-ci turunda. Ama bu danışmaya prokuratura yol vermedi.

Belli oldu neylän bitecek bu oynamalar, protestlar, arestlar, cezalar hem bir iş üzä çıktı – 2016-cı yılın Gagauziya Halk Toplşuşuna seçimnär büük bir lekä gibi Gagauziyanın üzüdä kalaceklar. Ama bu iş lekeyi koyannarın umurunda da hiç diil. Onnar hep maamilä surat yapêrlar kendilerini.

Todur ZANET

BİR CUVAP YAZIN