kiyamet_ (1)

04.07.2019, tarafından yazılı , CÜMNE BÖLÜMÜ, 190 KERÄ BAKILMIŞ

Gagauziyada genä hava kıyemeti

Orak ayın 3-dä üülendä bir buçuk saadın içindä Gagauziyada boralar hem bakırdan dökülän yaamurlar çorbacılık etti. Gagauziyanın Üstolan durumnarın Upravleniyası (ÜDU) bildirdi, ani kıyemettä lüzgerin hızlılıı 20 m/s, sular da 20 litra 1 metraya gelärdi.

kiyamet_ (2)

Bu hava kıyemeti büük zararlar getirdi: evlerin örtülerini söktü, sellär sokakları aldı, elektrika tellerini kopardı, tarlaları hem harmannarı sildi, fidannarı cinkti.

kiyamet_ (4)

Bu durumnan ilgili Komratta hemen Gagauziyanın Üstolan durumnarı komisiyası toplandı. Nicä bildirdi komisiyanın başı hem Gagauziyanın geçici Başkanı Vadim ÇEBAN bu belanın beterinä Gagauziyada şafksız kaldı Baurçu, Baş küüyü (Kirsovo), Bucak, Feropontyevka, Kongazçık hem Svetloe küüleri hem da Komrat kasabası.

Komrat hem Valkaneş kasabalarında cingilän fidannar elektrika tellerini kopardılar. Komratta hem Çadırda fidannar maşinaların üstlerinä düştülär. Baş küüyü (Kirsovo) tarafından Komrada giriştä büük bir fidan ana yola düştü da yolu kapadı.

kiyamet_ (3)

Vadim ÇEBAN teklif etti iki günün içindä erindeki kuvetlär hem çiftçilik çorbacılıkları hazırlasınnar hepsi dokumentleri zarar için da Gagauziyanın kolayı olsun yardım istemää merkez kuvetlerdän, zerä Gagauziyanın kendi parası bu iş için etişmeyecek.

Fotolar: gagauzinfo.md

BİR CUVAP YAZIN