gagauzluk_cadir

01.02.2018, tarafından yazılı , CÜMNE BÖLÜMÜ, 98 KERÄ BAKILMIŞ

“GAGAUZLUK” CB kiyatları insannara ileştirer: tuz-ekmek, kofe-çay hem da… kuumak

Büük ayın (yanvar) 31-dä “GAGAUZLUK” Cümne Birliin başı akademik hem poet Todur ZANET parasız baaşladı “Gagauzların kayıp olan dilinin hem kultura adetlerinin Moldovada korunması” takım kiyatlarını Çadır kasabasının hem Beşgöz küüyün liţeylerinä hem gimnaziyalarına, uşak başçalarına, bibliotekalarına hem muzeylerinä, uşakların yaratma Merkezinä. Baaşlanan kiyatların paası 60 bin leydän zeedä yapêr.
gagauzluk_cadir (1)

“Gagauzların kayıp olan dilinin hem kultura adetlerinin Moldovada korunması” dört dildä 3 kiyatlık bir takım: 1-ci kiyat (“Gagauz halk masalları”, “Gagauz Folk Tales”, “Poveşte populare găgăuze”, «Гагаузские народные сказки»),  2-ci kiyat  (“Gagauz türküleri, söleyişleri, bilmeceleri”, “Gagauz songs, Proverbs, Riddles”, “Cântece, proverbe, ghicitori găgăuze”, «Гагаузские песни, пословицы, загадки»), 3-cü kiyat (“Gagauz yortuları, adetleri, sıraları”, “Gagauz Holidaays, Customs, Riters”, “Sărbători găgăuze, tradiţii, obiceiuri”, «Гагаузские праздники, обычаи, обряды»).
gagauzluk_cadir (2)

Kiyatlar verildi kuruluşların fondlarına, “Gagauz dili hem literaturası” üüredicilerinä, “Gagauz halkın istoriyası, adetleri hem kulturası üüredicilerinä hem “Gagauz dili hem literaturası” terbiediciykalarına.

May hepsi kuruluşlarda bu para uurunda paası olmayan baaşışları büük sevinmeliklän, tuz-ekmeklän, kofe-çaylan, tatlı sözlän hem şükür laflarınnan karşladılar.
gagauzluk_cadir (3)

Ama, yazık ki, kim erdä, kiyadı baaşlarkana, hiç beklenmeyän işlärlän karşı-karşıya kaldık. Kim erdä eşiktä kaldık. Kimi kuruluşların “öndercileri” kiyatları kabletmää istämedilär, kimileri kaş altından bakardılar, kimi kuudular bizi. Ama, nicä da olsa, bunnar aazlıktaydılar. Da son-sonunda, may hepsi neetli erlerä kiyatları verdik. Verämediimiz erlerä da ya kablettirecez, yada zorlan kablettirecez. Başka türlü olmayacek.
gagauzluk_cadir (4)

Not. “Gagauzların kayıp olan dilinin hem kultura adetlerinin Moldovada korunması” takımın kiyatları hazırlandı hem çıkarıldı Gagauziyanın “GAGAUZLUK” Cümne Birliin tarafından, Amerika Birleşik Devletleri (ABD) Büükelçililiklin Kulturaları Koruma Fondun tarafından verilän Granda görä.
gagauzluk_cadir (5)

BİR CUVAP YAZIN