susak_kirildi

28.05.2021, tarafından yazılı , CÜMNE BÖLÜMÜ, 441 KERÄ BAKILMIŞ

Gezän laflar aslısa, ozaman “Susak kurıldı” demeli!

Maamilä surat kabledilän Bücetı incelemää deyni, Gagauziya Başkanı, küüdän-küüyä raat gezip, kapalı kapular ardında kendi insannarınnan buluşêr. Kapu arası sızan haberlerä görä Başkan o buluşmalarda Orak ayın 11-dä olacek Moldova Parlamentı seçimnerinä hem bu yıl olması lääzım Gagauziya Halk Seçimnerinä açık candan hem büük cömertliklän agitațiya yapêr.

Makar ki bunu yapmaa deyni zakon ona izin vermeer, ama agitațiyayı Canabisi pek raat yapêr, çünkü buluşma sebepleri – “Gagauziyanın 2021-ci yılı için Büceti” Zakonu incelenmesi.

Ama bu önemli diil, zerä Moldovada hem Moldovadan Gagauziyada kuvedä koyulannar kendileri bu nesteliktä pek raat duyêrlar, bileräk, ani onnara bu iş için bişey olmayacek.  Taa doorusu çök işlär olacek: zenginnik, sıcak erlär, türlü kolaylıklar.

Ama bu da şindi önemni diil. Önemni o, ani büük dostlar, kendilerini ilktän komunist, sora soțialist, sora da Rusiya dostları gösterennär, Gagauziya Başkanı İrina VLAH hem Moldova Soțialistlär partiyasının başı İgor DODON, diil çoktan bir susaa bilä nestederäk, o susaa kaçırdılar da susak, ortalıı buuarak, kırıldı.

Nicä açıkladı büük jurnalist hem şindi “Renato Usatıy” blokundan Moldova Parlamentına kandidat Dimitriy ÇUBAŞENKO, İgor DODON, kendi insannarınnan buluşmlarda, aalaşêr ona, ani “onun yardımınnan Başkan olan İrina VLAH, büük hayınnık yaparak, sattı onu da artık bir buçuk ay telefonnara cuvap etmeer”.

Burada hayınnık işleri büük şüpä altında, çünkü onnar ikisi bilä hayınnık yaparak, ilktän sattılar Komunist partiyasını, tükürüp Komunist partiyasının öndercisinin Vladimir VORONİNın üzünä, ani onnarı, emzirip, insan yaptı hem deputatlaa, ministrulaa hem taa bilmäm neylerä getirdi. Sora da hep birliktä onnar Gagauziyayı hem gagauz milletini sattılar.

Onnara küsmää yok neyä, kendilerinä küssünnär, zerä, gagauz lafına görä, olêr ölä: nicä yapêrsın ölä dä görersin. Ama, bakmadaan onnarın ikisinin da dinsizliinä hem antühristliinä, genä dä onnar için Bibliyanın “Lukadan Evangeliya”sından sözleri önünüzä sürmää isteeri: “Ama dedi O [İisus]: deerim sana, Pötr, taa etiştirämeyecek büün horoz ötmää, açan sän üç kerä inkär olacan, ani Beni bileersin”.

Sanmêêrım, ani bu sözlär onnarın gözlerini açacek, ama insanımız “Pötr” lafın erinä bunnarın ikisindän birisinin yada ikisinin da adını koyarsa, baarliim bu gagauzların gözlerini açar, bekim.

Todur Zanet

BİR CUVAP YAZIN