Türkiye Respublikasının Prezidentını Sayın Recep Tayyip ERDOĞAN ofițial karşılamaktan sora, iki prezident göz-gözä buluştular. Nedän sora delegațiyalarlan geniş uurda buluşma yapıldı.
Burada taraflar inceledilär iki devlet arasında çeşitli soruşları, ani ilgiliydilär Moldova Respublikasının iç hem dış politikasınnan, hem da regionda korunmak problemalarınnan, bildirer Moldova prezidentın pres-slujbası.
Moldova-Türkiye ortaklıını kaavileştirmää deyni İgor DODON hem Recep Tayyip ERDOĞAN imzaladılar “Moldova hem Türkiye arasında strategiyalı işbirlii için ortak Deklarațiyayı”. Hep o Annaşmada karar alındı bu strategiyalı işbirlii uurunda bir Sovet kurmaa.
Buluşmada iki taraf urguladı, ani Türkiye hem Moldova arasında işbirlii zeedelener. Sade 2018-ci yılın Büük ayı – Harman ayı arasında iki devlet arasında alış-veriş 271 milion dolar uuruna kalktı, ne bıldıra bakarak 7% taa zeedä.
Türkiye hem Moldova Prezidentları neetä koydular yıl sonunadan bu țıfrayı 500 milion dolara çıkarmaa. Birkaç yıldan sora da 1 miliard doları geçmää. Açıklandı, ani büünkü gündä türk kapitalınnan Moldovada var 1300 firma.
Buluşmada Moldova Prezidentı şükür etti Sayın Recep Tayyip ERDOĞANa o yardımnar için, ani Türkiye yapêr Moldovaya hem Gagauziyaya. Gagauziya için annadarak, İgor DODON urguladı, ani gagauzlar Moldova devletliin direklerindän birisidir.
