krim_tatarlarin_kaldirilmasi (1)

18.05.2020, tarafından yazılı , CÜMNE BÖLÜMÜ, 69 KERÄ BAKILMIŞ

Hederlez ayın (may) 18-zi Krım tatarların deportațiyası kurbannarını anma Günü

Rusiya tarafından aneksiyalı Krımda hem bütün Ukraynada Hederlez ayın 18-dä bakıldı Krım tatarların deportațiyası kurbannarını anma Günü. Ukraynanın baş kasabasında hem başka kasabalarda bu Kara Günü yaslı sıraşar yapıldı. Krım tatarların deportațiyası kurbannarını anma Gününnän ilgili olarak, bütün Ukraynada hem dünnääda Krım tatarlarınnan birlik göstermäk akțiyası hem söțial aalarda fleşmoblar başladı. Akțiyalara katılannara teklif ediler Krım tatarlarının damga simvolunnan patredä çıkmaa hem o patretleri internetä koymaa, bildirer Radio Svoboda.

O günü Rusiya altında bulunan Sevastopoldä (tatarca eski adı Akyar) kasabanın başı Mihail RAZVOJAEV çiçek koydu deportațiyaya düşän Krım halkların memorialına. Krımdakı Ukrayna kultura merkezin aktivistleri da Krım tatarların deportațiyası kurbannarını anmak taşına sarı-maavi benizdä çiçek buketlarını koydular.

“Hizb ut-Tahrir” kuruluşu (Rusiyada zapa altında bulunêr hem terorist kuruluşu sayılêr) azalarına Rostov-na-Donu kasabasında olan sudun 18.05.2020 günü oturuşun sonunda krım tatarları kaldırdılar plakatları: “Sürgünnük 18.05.1944. Unutmadık”, “Kremlinin esirlerinä serbestlik”.

Ukrayna Prezidentı Vladimir ZELENSKİY o günü, halka danışarak, umut etti, ani aneksiyada bulunan Krım Ukraynaya geeri dönecek.

Not. 1944 yılında Krım tatarların deportațiyası yapıldı İosif STALİNın emirinä görä. Bunun sebepi, maamilä surat, II-ci Dünnää cengindä krımlıların bir payının națistlärlän işbirliindä bulunması. Deportațiyaya düştülär 200 binä yakın Krım tatarları. Onnarın yarısından çoyu öldürüldü.
krim_tatarlarin_kaldirilmasi (3)
krim_tatarlarin_kaldirilmasi (2)

BİR CUVAP YAZIN