Kongresin_emblemasi

22.09.2016, tarafından yazılı , ANALİTİKA, CÜMNE BÖLÜMÜ, 742 KERÄ BAKILMIŞ

Kan su olmaz! Bekim: Su kan olur mu!? Bütündünnä gagauzların IV-cü Kongresi bu yıl da olmayacek!

Hepsimiz bileriz, ani, başlayıp 2006-cı yıldan beeri, 3 yıl aşırı Bütündünnä gagauzların Kongresleri olardı. Sıradakı Bütündünnä gagauzların IV-cü Kongresi lääzımdı olsun 2015-ci yılın Kasım günnerindä. Ama, 2015-ci yılın Baba Marta ayın 22-dän sora, eni seçilän Gagauziya öndercileri bu adeti bozdular: artık iki kerä bu Kongresi belertilmiş günnerdä yapmama deyni karar alêrlar. Her zaman, maamilä surat, eni sebeplär bulup: ba para yokmuş, ba Türkiyenin Prezidentı adamış gelmää Kongresä da gelämärmiş, ba Halk Topluşu şeçimneriymiş.

Biz da, onnarı yınanıp, onnarın ardına gazetamızın sayfalarından halkımıza “aslı”-yalancı heber vereriz. Ba yazêrız o öndercilerin laflarından, ani Bütündünnä gagauzların IV-cü Kongresi 2016-cı yılda  olcek (bak: “Adet bozuldu – bu kerä Kongres 2016-cı yılda olacek!” yazımızı, “AS” No.13-14 (632-633), 31.07.2015 y., yada http://anasozu.com/adet-bozuldu-bu-kera-kongres-2016-ci-yilda-olacek/). Sora, onnar kararı “kesinneştirdiinän”, yazêrız, ani “Bütündünnä gagauzların IV-cü Kongresi bu yıl Kasımın 4-dä olacek. Bildirildi, ani Kongresin ardına Komratta II-ci halklararası investiţiya Fonrumu hem “Gagauz şarabın yortusu” yapılacek” (bak: “Bütündünnä gagauzların IV-cü Kongresi Kasımın 4-dä olacek” yazımızı, “AS” No.7-8 (650-651), 27.04.2016 y., yada http://anasozu.com/butundunna-gagauzlarin-iv-cu-kongresi-kasimin-4-da-olacek/).

Şindi da, 2016-cı yılın Ceviz ayın 6-dä, Gagauziya İspolkomu aldı karar, ani Bütündünnä gagauzların IV-cü Kongresi 2017-ci yılın Baba Mart ayında beki olabilir. Ama bu da diişiläbilir, zerä Gagauziya Başkanı o günkü toplantıda dedi: «В связи с тем, что выборы в Народное собрание Гагаузии состоятся 20 ноября, нам необходимо отложить проведение Всемирного конгресса гагаузов на следующий год, предварительно на март 2017 года. Активная фаза предвыборной кампании не должна совпадать с мероприятием, имеющим важное историческое, культурное и социальное значение для гагаузского народа» (bak: http://gagauzia.md/newsview.php?l=ru&idc=390&id=6754).

screenshot 2016-09-13 005

Bilmeerim neçin Gagauziyanın büünkü öndercileri bu işi yapêrlar? Ama istär-istemäz ortada peydalanêr bir şüpä: Beki Gagauziyanın bu günkü öndercileri bu Kongresi hiç yapmaa da istämeerlär?

Nedän? Gagauzların birleşmesindän mi korkêrlar? Osa ortada başka iş mi var?

Gagauzların var bir lafı: Kan su olmaz? Bu lafın tersi da mı acaba var? Bekim: Su kan olmaz!?

Todur ZANET, Akademik, poet hem Gagauz Milli Gimnanın avtoru

BİR CUVAP YAZIN