Açan deeriz, ani Gagauziyanın büünkü öndercileri biçerlär gagauz dilini, hepsi bizä karşı kalkêr. Bu iş yalanmış! Onnarın çalışmalarınnan Gagauziyada gagauz dili örüyärmiş hem ilerlärmiş hem bilmäm ne yaparmış.
Bu ölä, ama gagauz dili ilerleer diil onnarın çalışmalarınnan, ama bakmadaan onnarın kösteklerinä, zerä bu gündä hem bu günä karşı hererdä, neredä lääzımdı ötsün gagaıuz dili – rus dili öttü: Mihil Çakir okumaklarında, öndercilerin kutlamaklarında, İspolkomda, Halk Topluşunda, üüredicilik upravleniyasının lafetmesindä, her-er-dä!
Taa da beter, izin verip Çiçek ayın 27-dä Gagauz Dilinin hem yazısının 61-ci yılını kutlamaa, paalı GAGAUZ DİLİMİZİ gülmää da almaaa başladılar.
Nesoy 61-ci yıl???
Ne o günädän, açan bizä Sovet Kuvedi “yalpaklıklan” izin verdi kiriliţa alfavitini kullanmaa gagauz dili hem yazısı yoktu mu? Ozamanadan Mihail ÇAKİR hem Valentin MOŞKOV gagauzça yazmazdılar mı? Üzlän yıl geeri gagauzça kiyatlar çıkmazdı mı?
Hem ne demäk yazımız? Biz, gagauzlar, 1400 yıl geeri dünneyä kendi alfavitimizi baaşlamadık mı?
Baaşladık!!! Bunu bän, Todur ZANET, yazmêêrım. Bunu yazêr paalı aydınnadıcı hem bilim adamı Valentin MOŞKOV!!! Okuyun, karannıkta bulunannar: «Итак, из всего приведенного можно заключить, что народ, которому принадлежали орхонские надписи, «торки» или «узы» русских летописей и гагаузы – всё это один и тот же народ».
Okudunuz mu?
Şindi, makar biraz utanınız da dooruluu hem aslıyı üzä çıkarın. Hem çekin o nestä ellerinizi PAALI GAGAUZ DİLİMİZİM BUAZINDAN!
Akademik hem poet Todur ZANET