soprano_2

31.10.2014, tarafından yazılı , ANSAMBLİLÄR, KULTURA BÖLÜMÜ, 1726 KERÄ BAKILMIŞ

Kişinevda şaşılacek bir soprano avşamı

Türkiye Respublikasının 91-ci yıldönümünün kutlamaların kultura programasına görä, Moldovada Türkiye Büükelçiliin çalışmasınnan, Canavar ayın (oktäbri) 30-da Kişinevda Türkiyedän “Three Anatolian Sopranos” trio ansamblinin konţerti oldu. Bu konţert “Sergey Lunkeviç” milli filarmoniyasınnan ortaklıınnan hazırladılar.

Filarmoniyanın sţenasından şaşılacek bir soprano avşamını siiredicilerä baaşladılar “Three Anatolian Sopranos” trio ansamblinin solistleri: Esin TALINLI , Z.Çiğdem ÖNÖL, Fında SALTAŞ hem da orkestra: Emel Sevil ÖZER (kemençä), Esra POYRAZOĞLU (fortopyano), Mustafa ALPASLAN (klarnet), İvan ÇELAK  (akordeon), Soner ÖZER (kajon-perkusiya).

Konţert ölä meraklıydı, ani konţertin sonunda bütün zal ayaa kalktı hem da Büükelçi sayın Mehmet Selim KARTAL, eşinän Banu Cankan KARTAL hanum-efendiylän valsa tutundılar.
soprano_1

Bitkidä da, açan Mehmet Selim KARTAL hem Banu Cankan KARTAL, çiçek vermää deyni sţenaya çıktılar, dayanamayıp, onnar soprano solistlerinnän bilä çalmaa başladılar.

Siiredicilär da çok vakıt, palma düüyüp, artistleri sţenadan kolvermää istämedilär.

İnanêrız, ani bölä şaşılacek bir soprano avşamını Moldova siiredicileri çok vakıt aklında tutaceklar. Hem saa olsunnar hepsicii, kim bu avşamı bizä baaşladı.

Todur ZANET

BİR CUVAP YAZIN