region_bibliotekasi_1

21.10.2016, tarafından yazılı , CÜMNE BÖLÜMÜ, 384 KERÄ BAKILMIŞ

Komrat Regional bibliotekasının 70-ci yıldönümü

Canavar ayın 20-dä Gagauziyanın en büük bibliotekası – Komrat Regional bibliotekası –kurulmasının 70-ci yıldönümünü kutladı. Kutlama sırası kiyat sergilerinnän, literatura kompoziţiyalarınnan, yazıcıların hem bibliotekacıların kutlama sözlerinnän hem baaşışlarınnan geçti.

 

Nicä annattı toplantıda Regional bibliotekasının direktoru Mariya NEDÄLKOVA bu biblioteka 1946-cı yılda kasaba bibliotekası olarak kurulmuş. Kurulma günündän beeri bibliotekanın statusu birkaç kerä diişmiş: 1975-tän – merkez bibliotekası, 1991-dän – cümne bibliotekası, 1996-dan beeri – Regional bibliotekası. Gagauziya İspolkomun kararına görä 1997-dä bibliotekaya verildi anılmış bibliografın, filologun, etnografın hem istoriin Pötr DRAGANOVun (13.02.1857 – 07.02.1928) adı.
region_bibliotekasi_3

Büünkü gündä Komrat Regional bibliotekası oldu Gagauziyanın aydınnadıcı hem kultura merkezi, neredä kaynêêr kiyatların hem literaturanın ömürü. Bibliotekanın okuycularının arasında var yazıcılar, kultura hem cümne insannarı, universitetın hem kolecın studentları, şkolaların üürencileri hem sıradan insannar.

Komrat Regional bibliotekasının kolektivına kutlama sözlerinnän danıştılar Gagauziyanın kultura hem turizma Upravleniyanın başı Vasilisa PETROVİÇ, Komrat ATATÜRK bibliotekasının direktoru Vasilisa TANASOGLU, Komrat Devlet Universitetın bibliotekasının direktoru Vera ÇİMPOEŞ, Komrat uşak bibliotekasının direktoru Vasilisa POMETKOVA, Gagauziya küülerindän bibliotekacılar, gagauz yazıcıları Pötr MOYSE hem Pelageya FİLİOGLU, bibliotekanın okuycuları. Kendi literatura kompoziţiyalarını gösterdilär “Yaratmak Evin” uşakları.

Not. Biz da, “Ana Sözü” olarak kutlêêrız Komrat Regional bibliotekasını hem orada çalışan insannrı bu gözäl yortuylan. Saalık hem uzun ömür sizlerä!

Foto – gagauz.md

BİR CUVAP YAZIN