Marina

02.08.2012, tarafından yazılı , İNCÄZANAAT, KİŞİLÄR, KULTURA BÖLÜMÜ, 1529 KERÄ BAKILMIŞ

Marina RADİŞ “Maestru ın Arta” adı kabletti

2011-ci yılın Kırım ayın (dekabri) 24-dä Moldovanın geçici Prezidentı Marian LUPU imzaladı emiri, angısına görä anılmış operacı zanaatçımıza Marina RADİŞa “Maestru ın Arta” ad verildi.

Açan beş yıl geeri Marina RADİŞ için gazetamızda tiparlandı “ONU BÜÜK OPERA SŢENALARI BEKLEER” adlı yazımız (bak burada) orada Canabisi dediydi “ustalık ozaman geler, açan irmi dört saat gündä o ustalaa çalışêrsın. Açan da zanaatını seversin o irmi dört saadın içindä hiç yorulmêêrsın”. Beş yıl da geçmedi da gördük, ani Marina RADİŞa ustalık geldi hem o ustalıı diil o, ama bütün opera dünnääsında, Moldovanın en üüsek uurlarında tanıdılar.

Marina RADİŞ duudu Kazayak küüyündä 1982-ci yılın Küçük ayın (fevral) 2-dä. Başardı Kişinevdakı Muzıka Konservatoriyasını (şindiki Muzıka, teatr hem resimcilik incäzanaatları Akademiyası). 2005-ci yıldan beeri Moldova Opera hem balet Teatrusunda, solistka olarak, çalışêr. Çeşitli operalarda baş rollerin partiyalarını çalêr: “Traviata” (G. VERDİ) operasında Violetanın partiyasını; “Manon” (J. MASSENET) operasında Manonun partiyasını; “Don Juan” (Wolfgang Amadeus MOZART) operasında Donna Annanın partiyasını; “Царская Невеста” (Nikolay RİMSKİY-KORSAKOV) operasında Marfanın partiyasını; “L’elisir d’amore (Sevda İçkisi)” (G. DONİZETTİ) operasında Adinanın partiyasını h.b.

Marina RADİŞ çeşitli halklararası opera konkursların laureatı hem diplomantı: “Hariklei Darkle” halklararsı konkursu (Romıniya, Braila, 2003 y, laureat); “Aleksandrovskaya” adına halklararsı konkursu (Belarusiya, Minsk, 2004 y, diplomant); “Elena OBRAZŢOVA” adına 5-ci halklararsı konkursu (Rusiya, Moskva, 2006 y, diplomant); “Madam Batterfläy” adına 9-cu halklararsı konkursu (Moldova, Kişinev, 2007 y, laureat).

NOT. Biz candan-ürektän kutlêêrız Marina RADİŞı bu büük ödüllen hem dua ederia ona saalık, uzun ömür, büük yaratmak kısmeti hem en yakın zamannarda ona açılsın dünneyin en büük opera sţenaları. Marina RADİŞın “La Skala” hem “Metropol de Opera” gibi anılmış teatruların sţenalarında çalmaa en büük arzusu aslıya çıksın. İnanêrız – bu sţenalar onu bekleerlär.

BİR CUVAP YAZIN