vulkanes_gagauz_gergefi

31.08.2017, tarafından yazılı , CÜMNE, KULTURA, KULTURA ÖMÜRÜ BÖLÜMÜ, 225 KERÄ BAKILMIŞ

Milli giyimnerin Festivalin adıydı “Gagauz Gergefi”

Harman ayın (avgust) 30-da Moldova Prezidentı İgor DODONun kanadı altında Valkaneş kasabasında oldu “Milli giyimnerin “Gagauz Gergefi” I-ci Festivali”, angısını hazırladı Gagauziyanın kultura hem turizma Upravleniyası.
vulkanes_gagauz_gergefi (1)

Milli giyimnerin “Gagauz Gergefi” I-ci Festivalinä toplandı üzlän insan. Onnarın arasında vardılar Festivalin musaafirleri Moldova Prezidentı İgor DODON hem onun eşi Galina DODON, Moldovanın kultura, aydınnatmak hem aaraştırma ministrusu Monika BABUK, Moldova Türkiye Kişinev Büükelçisi Hulusi KILIÇ hem onun eşi Günay KILIÇ, Gagauziya Başkanı İrina VLAH, Gagauziya Halk Topluşu Başı Vladımır KISSA, TİKA Moldova Programaların Koordinatoru Canan ALPASLAN, Akademik hem poet Todur ZANET, İspolkom azaları, GHT deputatları, hem başkaları.
vulkanes_gagauz_gergefi (2)

Festivalä gelennerä deyni türlü sergilär hazırlandı. Belliki, o sergilerin arasında orta eri kapladılar Gagauz Halkın milli giyimnerin sergisi, angısını meydana çıkarmıştılar Gagauziyanın Komrat, Çadır, Valkaneş hem Beşalma muzeyleri, Ukraynadan Kurtçu (Vinogradovka) küüyünün Odesa bölgesinin Gagauz kultura Merkezi. Vardılar burada kendi milli rubalarına giyimni insannar, kimä o rubalar kalmıştılar analardan-bobalardan. Başka sergilerin arasında bulunardılar gagauz ustaların malları, başlayıp çanak-kaşıklardan da başarıp kuklalarlan, ani giyidiriliydilär gagauz milli rubalarına. Vardı burada gagauz milli imeklerin sergisi da. O milli imeklärlän konakladılar Festivalin şannı musaafirlerini.
vulkanes_gagauz_gergefi (3)

“Gagauz Gergefi” I-ci Festivalindä oldu milli giyimnerin defilesi. Ama bundan öncä insannara kutlama sözünnän danıştı Moldova Prezidentı İgor DODON. Nedän sora İgor DODON hem Galina DODON, bu defeleiyi açıp, ilkin gösterdilär kendi milli rubalarını.
vulkanes_gagauz_gergefi (4)

Festivaldä kendi kutlama sözlerinnän insannara danıştılar Gagauziya Başkanı İrina VLAH, Moldovanın kultura, aydınnatmak hem aaraştırma ministrusu Monika BABUK.
vulkanes_gagauz_gergefi (5)

Milli giyimnerin defilesindä siyredicilerä gösterildi gagauz, moldovan, poläk, bulgar hem ukrayin rubaları. Milli modayı gösterdi Kişinevdan “L” moda teatrusu.

“Milli giyimnerin “Gagauz Gergefi” I-ci Festivali” sürttü geç vakıdadan. Bu vakıdın içindä insannara gösterildi büük bir konţert, neredä pay aldılar Gagauziyadan ansamblilär “Düz Ava”, “Lale”, “Çöşmä”, “Yıldızlar”, “Poläki Bucaka” hem Moldovanın “Zdob şi Zdub” ansamblisi. Konţerttä çaldılar solistlär Natalya DENİZ, Anna DRAGU, Vitaliy MANCUL,Valentin ORMANCI, Polina STEFOGLU hem başkaları.

BİR CUVAP YAZIN