parasut2

25.09.2014, tarafından yazılı , SPORT BÖLÜMÜ, 1617 KERÄ BAKILMIŞ

Moldovanın paraşüt sportunda Çempionatı Gagauziyada geçti

Ceviz ayın (sentäbri) 20-21 günnerindä Gagauziyanın Çadır kasabasının aerodromunda hem Avdarma küüyün “Tatar çöşmesindä” Moldova Respublikasının paraşüt sportunda Çempionatı geçti.

Ceviz ayın (sentäbri) 20-dä hava pek gözäldi. Lüzgär yoktu. Onuştan Çadır kasabasının aerodromunda yarışmalar kolay hem becerikli geçtilär. Moldova, Vengriya hem Rumıniya komandalarından 24 paraşütist “Dooru konmak” uurunda kendi becirekliini gösterdilär. Herbir sportsmen, altı kerä paraşütlan atlayıp, nışannanmış erä kondu.

Ertesi günü, Ceviz ayın (sentäbri) 21-dä, yarışmalar Avdarma küüyün “Tatar çöşmesindä” geçtilär.

Burada “Dooru konmak” uurunda yarım finallan final hem da Avdarma kuboo için yarışmalar oldu. Hava pek islää diildi. Büük lüzgär vardı, ama paraşütçular genä büük ustalık gösterdilär.

Moldova Respublikasının paraşüt sportunda Çempionatında birinci eri hem altın medaliyi aldı Vengriya komandası (83 ceza ball), ikinci eri hem gümüş medaliyi Moldova-1 komandası (Moldovada 3 komanda vardı) aldı (107 ceza ball), üçüncü eri hem bronz medaliyi Rumıniya komandası aldı (112 ceza ball).

Sportsmennarın arasında birinci oldu İştvan ASTALOS (Vengriya, dünnä hem Evropa çempionu, 001 ceza ball), ikinci – Sergey ZİNÇENKO (Moldova, dünnä hem Evropa çempionu, 007 ceza ball), üçüncü – Ferens GOBOLOŞ (Vengriya, 011 ceza ball).

Avdarma küüyün kuboonu kazandı Vengriya komandası. Onu komandanın kapitanına İştvan ASTALOSa küüyün primarı İvan KASIM verdi.

Veterannarın arasında birinci eri aldı 70 yaşındakı Georgiy MASAROVİÇ (Vengriya). Canabisi ömüründä artık 15590 kerä paraşütlan atlamış. İkinci oldu Oazu NANTOY (Moldova), üçüncü – Yülian İVANOV (Moldova).

Dimu ERİBAKAN

BİR CUVAP YAZIN