putin_dodon

18.01.2017, tarafından yazılı , CÜMNE, POLİTİKA BÖLÜMÜ, 961 KERÄ BAKILMIŞ

Moskvada buluştular Vladimir PUTİN hem İgor DODON

Büük ayın 17-dä Rusiya Federaţiyasının Prezidentı Vladimir PUTİN buluştu Moldova Prezidentınnan İgor DODONnan. Buluşmada moldo-rus ilişkileri, alış-veriş hem ekonomika işbirlii, Rusiya pazarına moldovalı eksportun problemaları, pridnestrovye çözülmesi incelendi, bildirer www.kremlin.ru  saytı. Buluşmada Moldova soţialistlär partiyasının liderı Zinaida GREÇANAYA hem Gagauziya Başkanı İrina VLAH er aldılar.

Buluşmadan sora, Vladimir PUTİNın hem İgor DODONun pres-konferenţiyasında açıklandı, ani iki devlet arasında çok yapılacek işlär var.

Vladimir PUTİN urguladı, ani “Rusiya isteer ilereletmää işbirliini Moldovaylan”, “Moldovayı görer nicä bir bütün hem tarafsız devleti”. İşbirlii örneklerini açıklarkana Rusiya Prezidentı urguladı, ani “Rusiyanın 67 regionu Moldovaylan işbirliindä bulunêr… İlerleer rus regionnarın Gagauziyaylan da işbirlii”.

Vladimir PUTİN urguladı, ani Moldova hem Evropa Birlii arasında annaşma Rusiya için kimi riskları ortaya koydu. Ama bu işin geleceeni incelemää hazır.

İgor DODON kendi tarafından urguldı, ani Moldova hem Evropa Birlii arasında annaşmadan lääzım atılmaa hem, gelecek parlament seçimnerindän sora, soţialistlär partiyasının neetindä var bunu yapmaa.

İgor DODON urguladı, ani, prezident olarak, kendi ilk ofiţial vizitını Rusiyaya yapêr, zerä “Moldova var hem kalacak Moskvanın bu regionda önemni ortaa”. Bundan kaarä Moldova Prezidentı açıkladı, ani isteer Moldova olsun gözlemci EvrAzES birliindä (EvrAzESa – Evroaziyskiy ekonomişeskiy soyuz. Ona girerlar: Armeniya, Belorusiya, Kazahstan, Kirgiziya, Rusiya).

Açıklandı, ani yaklaşık 250 bin moldovalı kişinin arasından, kimä Rusiyaya dönmää zap koyulduydu, 50 bininä enidän Rusiyaya yol açıldı.

Cuvap vereräk İgor DODONnan buluşmada incelenän soruşlar için, Vladimir PUTİN yaptı komentariy o haberlerä, ani yayınnanêr Amerikada, çünkü Rusiya Federaţiyasında varmış Donald TRAMPa karşı kompromat, haberleer www.tass.ru agenstvosu. Agenstvo bildirer, ani Vladimir PUTİN urguladı, ki Donald TRAMPa karşı yapılan yalancı doklad hazırlayannar “prostitukalardan da beter”. Vladimir PUTİN açıkladı Donald TRAMPa karşı “kompromat” dokladından bir ţitatayı – «Трамп приехал и тут же побежал встречаться с московскими проститутками». Sora  Donald TRAMP için dedi: «Это человек, во-первых, взрослый, а во-вторых, человек, который многие годы занимался организацией конкурсов красоты, общался с самыми красивыми женщинами мира. Знаете, я с трудом могу себе такое представить, что он (Трамп) побежал в отель встречаться с нашими девушками с пониженной социальной ответственностью». Da sora jurnalistlerin gülüşünä ekledi: «Хотя и они (девушки) у нас самые лучшие в мире, безусловно».

İki prezidentın buluşmasında Rusiya Prezidentı baaşladı Moldova Prezidentına Moldovanın 1790-cı yılından kartasını. İgor DODON da baaşladı Vladimir PUTİNa statuetkayı, neredä omuz-omuza durêrlar rus imperatoru I-ci Pötr hem Moldova çorbacısı Dimitriy KANTEMİR.

Not. Moldova Prezidentın İgor DODONun Rusiyaya vizitı üç gün sürter – Büük ayın 16-18 günneri.

Foto – kremlin.ru.

BİR CUVAP YAZIN