yalancılık_

10.02.2021, tarafından yazılı , CÜMNE BÖLÜMÜ, 798 KERÄ BAKILMIŞ

Sanêrınız Başkan verildi mi? Verecek mi? Taa da beter!

Geçennerdä Gagauziya Halk Topluşu deputatı Ekaterina JEKOVA açıkladı, ani Gagauziya Başkanı hem İspolkom yalancılıklan savaşêrlar  Halk Topluşuna 143 milion 250 bin leylik defițitlı bücetı kablettirmää, bakmadaan ona, ani cümne önünä ilktän sürüldüydü hem hepsi proțeduraları geçtiydi defițitsız bücet.

Tutêrsınız mı aklınızda, nicä büük baskıylan Gagauziya Başkanı hem GHTda onun adamnarı savaşardılar bu 143 milion 250 binnik boyundruu gagauz halkın boynusuna asmaa? Nekadar üüsektän bakmak hem batak atmak GHT deputatlarına oldu? Nekadar iirinç teatrular yapıldı? Nekadar laf sölendi?

Etiştiydi ona, ani İspolkom, sansın kiyat oyununda, kozlardan gitmää başladı: bu 143 milion  250 bini kabletmärsalar gagauz dili (!!!) üüredicilerin zarplatalarını keseceklär (bak: https://gagauzinfo.md/top1/58064-posledstviya-resheniy-deputatov-nsg-po-byudzhetu-uchitelya-gagauzskogo-yazyka-mogut-lishitsya-chasti-zarplat.html).

Görüncä, ani GHT deputatları verilmeerlär, sansın bişey olmamış gibi, İspolkom, sansın ne suvan imiş hem ne suvana kokêr, Küçük ayın (fevral) 9-da ansızdan, sansın ayarak, döndü o ilk zakonca cümneyä sürülän denkli büceta (bak: https://gagauzinfo.md/top1/58251-ispolnitelnyy-komitet-vnes-v-narodnoe-sobranie-proekt-bezdeficitnogo-byudzheta.html).

Bu günnerin içindä ne diişti acaba: padişah mı, osa eşek mi öldü?

Sanêrınız Başkan verildi mi? Verecek mi? Ne verildi, ne da verilecek!

Bileräk, ani Gagauziya Başkanı bişeycik boşuna yapmêêr, dedik: bir bakalım țıfralara. Da ne gördük? Dooru 143 milion 250 bini hiç biri bireri sıbıtmadı!!! Taa da beter – onu 150 miliona çıkardılar!!!

Şindi bakın islää!

İki ay geeri İspolkom 2021-ci yılın bücetinı bölä teklif ettiydi:

1 miliard 134 milion 555 bin ley = 991 milion 350 bin ley (gelir payı) + 143 milion 250 bin ley (difițit)!!!

Şindi ne teklif ediler: 1 miliard 149 milionnuk defițitsız bücet.

Bişey esap aldınız mı? Herliim 991 milion 350 bin ley aslı bir țifarasa: ozaman eni teklif edilän bücetın defițitı diil 143 milion 250 bin ley, ama 150 milion ley! Ne deyeceniz?!

Bu pek benzeer Eski Sovetlär devletlerindä tükännarda yapılan ucuzlama satışlarına, açan malın paasını üüseldip, her tarafa baarêrlar, ani ucuzlama var. Cambazlaa bakın!

Todur ZANET

BİR CUVAP YAZIN