Sava_Kioroglu

04.10.2016, tarafından yazılı , CÜMNE, KİŞİLÄR, SPORT BÖLÜMÜ, 559 KERÄ BAKILMIŞ

Sava KİOROGLUyu anmak için serbest güreştä I-ci Halklararası turnir

Ceviz ayın (sentäbri) 30-da hem Canavar ayın (oktäbri) 1-dä Çadır kasabasında geçti körpä güreşçilär arasında serbest güreştä I-ci Halklararası turnir, angısı yapıldı Moldovanın kıymetli trenerını hem Gagauziyanın serbest güreştä şannı adamını Sava Födoroviç KİOROGLUyu anmak için. Onda pay aldılar Türkiyedän, Bulgariyadan, Ukraynadan hem Moldovadan 240 körpä güreşçi. Turnirın baş sudyası Konstantin KELEŞ oldu.
Sava_Kioroglu (1)

Sava Födoroviç KİOROGLUnun üürencilerinin yardımınnan, bu turnirı yapmaa deyni barabar çalıştılar Çadır kasabasının öndercileri hem Yuriy YAKUBOV Fondu. Turnirın baş sponsoru oldu Grigoriy KARAMALAK önderciliindä sport veterannarına hem sakatlarına yardım için Halklararası IFAVIS Fondu.

Turnirın açılışında geldilär Sava KİOROGLUnun eşi, yakınnarı hem üürencileri. Bundan kaarä turnirda vardılar Moldova güreşçilik Federaţiyasının başı Viktor PEYKOV, Çadır kasabasının primarı Anatoliy TOPAL, Gagauziyanın öndercileri, Moldova parlamentın deputatları h.t.b. Onnar kendi açılış sözlerindä urguladılar, ani Sava Födoroviç KİOROGLU büük sportsmendı hem pek islää bir insandı, becerikli bir trenerdı hem sporta canını baaşlayan bir adamdı. Nasaat edennär umut ettilär, ani büünkü genç güreşçilär onun bu işini ilerledeceklär.

Sava Födoroviç KİOROGLU (01.11.1932 – 15.06.2014) duudu Çadır kasabasında. Bütün yaşamasını sporta baaşladı hem, trener olarak, büüttü çok talantlı güreşçileri. Onnar Dünnä hem Evropa kuboklarında, SSRB çempionatlarında hem spartakiadalarında Moldova için güreştilär hem başarılı oldular. Çoyu o güreşçilerin kendileri da trener oldular hem eni sport evlatboylarını büüttülär hem büüderlär. O trenerların arasında var Dünnä, Evropa hem SSRB prizöru Viktor ZİLBERMAN, Moldovanın kıymetli trenerı hem SSRB komandasınnan Dünnä Kuboonun prizöru Pötr MARTA, halklararası uurda sportta master hem SSRB çempionatın prizöru Aleksandr ZUBRİLİN, “masters” kategoriyasında güreştä dünnä çempionu Pavel GARANOVSKİY, MMAda trener Sergey PİKULSKİY h.t.b.

Sava KİOROGLUyu anmak için serbest güreştä I-ci Halklararası turnirın açılışında IFAVIS Fondun başkan yardımcıları Valeriy ZABOLOTNIY hem Pötr KARAMALAK baaşladılar Çadır kasabasının güreşçilik şkolasına güreş için ayak kaplarını. Onnar umut ettilär, ani bu turnir her yılın yapılacek hem o kendi dolayında güreş için bir takım düşünenneri toplayacek. Bu yıl sa Sava KİOROGLUyu anmak için serbest güreştä I-ci Halklararası turnirindä ensedilär:

2004-2006 yıllarda duannarın arasında (aarlık kategoriyalara görä)

- 26 kg – Aleksandr BALYDELYMAN (Yukarkı Albata küüyü, Taraklı rayonu, Moldova);

- 29 kg – Aleksandr GAYDARLI (Kıpçak küüyü, Gagauziya, Moldova);

- 32 kg – İvan KİSELİŢA (Soroka kasabası, Moldova);

- 35 kg – Maksim ÇAVDAR (Kıpçak küüyü, Gagauziya, Moldova);

- 38 kg – İvan KARAGEORGİY (Tiraspol kasabası, Pridnestovye, Moldova);

- 42 kg – Nikollay KASIM (Tiraspol kasabası, Pridnestovye, Moldova);

- 46 kg – İvan MARKU (Basarabka kasabası, Moldova);

- 50 kg – Egor NİÇEPORUK (Tiraspol kasabası, Pridnestovye, Moldova);

2001-2003 yıllarda duannarın arasında (aarlık kategoriyalara görä):

- 35 kg – Vasiliy MARKU (Basarabka kasabası, Moldova);

- 38 kg – Pavel GRAUR (Çimişli kasabası, Moldova);

- 42 kg – İvan POSTOLAKİ (Beşgöz küüyü, Gagauziya, Moldova);

- 46 kg – Anatoliy BOGATIY (Tiraspol kasabası, Pridnestovye, Moldova);

- 50 kg – Demyan LÜŢKANOV (Taraklı kasabası, Moldova);

- 54 kg – Sergey LUPAŞKO (Leova kasabası, Moldova);

- 58 kg – Lilian BALAN (Çimişli kasabası, Moldova);

- 63 kg – Yan RODİN (Kişinev kasabası, Moldova).

Turnirda enseyennerä hepsinä diplomnar, kuboklar, medalilär hem para baaşışları verildi.

Not. 2015-ci yılda, Sava Födoroviç KİOROGLUnun ölmesindän sora, Çadır kasabasının öndercileri ona “Çadır kasabasının şannı vatandaşı” adını verdilär.

BİR CUVAP YAZIN