Ceviz ayın 17-dä Belarusiyanın Bobruysk kasabasında imzalandı annaşma, angısına görä Gagauziyanın Tomay küüyündä Belarus traktorları toplanacek. Bu annaşma imzaladılar Bobruysk traktor parçaları hem agregatları zavodun direktoru Aleksandr AGRANOVİÇ (patrettä ortada), Gagauziyanın dış ilişkilär Upravleniyanın başı Vitaliy VLAH (patrettä saada) hem “Bucakagroservis” firmanın direktoru İvan NEDOV (patrettä solda).
“Bucakagroservis” firmanın direktoru sayêr, ani Tomayda toplanan traktorlar olaceklar 15-20% taa ucuz onnardan, angılarını hazır alêrlar doorudan Belarusiyadan.
Annaşmaya görä, önümezdeki ayın içindä, Gagauziyaya geleceklär Bobruysk traktor parçaları hem agregatları zavodun speţialistları, işi erindä görmäk için hem traktorların toplamasında yardımcı olmaa deyni.
İki taraf ta annaştılar, ani herliim iş islää örüyärsä, ozaman ortak bir firma açılacek hem traktorların servisı için stanţiya kurulacek.
Not. Gagauziyadan delegaţiya Belarusiyada bulundu Ceviz ayın 17-19 günnerindä. Delegaţiyada vardılar Gagauziyanın dış ilişkilär Upravleniyanın başı Vitaliy VLAH, Çadır rayonun başı Vitaliy KARA, Kıpçak küüyün başı Oleg GARİZAN, GHT deputatı Nikolay DRAGAN, “Bucakagroservis” firmanın direktoru İvan NEDOV hem başka işadamnarı.
