Tomay_traktor

25.11.2015, tarafından yazılı , EKONOMİKA BÖLÜMÜ, 1722 KERÄ BAKILMIŞ

Tomayda ilk traktorları topladılar

Gagauziyada I-ci Halklararası investiţiya forumun ilk günündä Komratta Başkannık binasının önündä erleştirildi ilk 5 traktor, ani Tomay küüyündä tolandı. Buna kolaylık verdi Belarusiyanın Bobruysk traktor parçaları hem agregatları zavodunnan işbirlii annaşması.

Ani Tomay küüyündä kurulacek ortak bir predpriyatiye annaşıldı Ceviz ayın 17-dä, açan Gagauziyanın delegaţiyası Balarusiyada bulundu. Ozaman Tomaydan “Bucakagroservis” firmanın direktoru İvan NEDOV hem Bobruysk traktor parçaları hem agregatları zavodun direktoru Aleksandr AGRANOVİÇ aralarında bir annaşma imzaladılar. Annaşmaya görä buradakı traktorlar, bakarak Bobruyskta toplanannara, 15-20% taa ucuz çıkêrlar. Zerä Gagauziyaya traktorların parçaları gelerlär da onnar sora toplanêrlar. Bu verer kolayını kimi vergilerdän kurtulmaa.

Şindi, açan I-ci Halklararası investiţiya forumun çerçevesindä bu işbirlii annaşması temelleşti, iş hızlanmaa başlayacek. Bölä sayêrlar işi kurannar. Başlayıp yılda 100 traktordan, neettä var yılda 1000 traktoradan toplamaa. Çünkü bu traktorlar pek lääzım primariyalara hem küçük kuruluşlara. Büünkü gündä sadä Gagauziyanın primariyalarına 50 traktor lääzım, ama Moldovada çok primariya hem küçük kuruluş var. Yannaşık Romıniya pazarı da açık.

BİR CUVAP YAZIN