filip_kartal

03.02.2016, tarafından yazılı , CÜMNE, POLİTİKA BÖLÜMÜ, 1636 KERÄ BAKILMIŞ

Türkiye Kişinev Büükelçisi Moldova Premyer-ministrusunnan buluştu

Küçük ayın (fevral) 2-dä Türkiye Kişinev Büükelçisi Mehmet Selim KARTAL buluştu Moldova Premyer-ministrusunnan Pavel FİLİPlan da verdi Canabisinä Türkiye Premyer-ministrusunun Ahmet DAVUTOĞLUnun kutlama kiyadını.

Buluşmada Moldova durumunnan ilgili soruşlar incelendi hem Moldova-Türkiye arasında işbirliin gelecää hem hızlanması konuşuldu, bildirer Moldova Pravitelstvosunun basın merkezi.

Buluşmada Moldova Premyer-ministrusu Pavel FİLİP urguladı, ani Moldova pek meraklanêr iki devlet arasında karşılıklı işbirliin ilerlemesinnän o üzerä, ani Türkiye var hem herzaman olacek Moldova için strategiyalı bir ortak. O şükür etti Türkiyeyä o yardımnar için, ani yapılêr üüredicilik hem cümne uurunda. Hem emut etti, ani bu kardaşlık işbirlii kaavileşecek hem ilerleyecek.

Kendi tarafından Türkiye Kişinev Büükelçisi Mehmet Selim KARTAL kutladı Pavel FİLİPı premyer-ministruluk erinnän hem urguladı, ani barış hem raatlık Moldovanın hem bütün regionun ilerlemesinä deyni temeldir.

“Şindi Türkiyedä durum zor, olêr teraktlar, kimileri onnarın can kurbanı alêr. Onuştan bizim için barış hem raatlık pek önemni”,- dedi Mehmet Selim KARTAL.

Buluşmada incelendi politikalı dialogların genişlenmesinnän ilgili soruşlar da. Bu iş için en üüsek uurlarda vizitlar yapılacek hem karşılıklı “Vatandaşların cümne koruması için” annaşmanın imzalanması hızlandırılacek.

Foto – www.gov.md

BİR CUVAP YAZIN