van_kaar

07.02.2020, tarafından yazılı , CÜMNE BÖLÜMÜ, 562 KERÄ BAKILMIŞ

Türkiyedä hava kıyemeti genä cannarı aldı

Türkiyedä Küçük ayın (fevral) tragediyalardan başladı. İlktän İstanbulun Sabiha GÖKÇEN aeroportonda bir eraplannan avariya oldu, sora da Türkiyenin Van taraflarında kaar kayması insannarı gömdü.

Sabiha GÖKÇEN aeroportonda tragediya

Küçük ayın (fevral) 4-dä İstanbulun Sabiha GÖKÇEN aeroportunda “Pegasuz” kompaniyasının İzmir-İstanbul reysını yapan eraplanı konarkana, hava durumu beterinä, konmak şiridindä durgumnamadı da taa 60 metra kadar ileri gidip, bir yar içinä düştü da 3 paya daaldı.

Eraplanda 177 yolcu hem 6 kişi ekipajdan vardı. Onnarı hepsini aar yaralarlan hem titsi kırıklarlan avariya erindän kaldırıldılar.

Büünkü gündä açıklandı, ani avariyaya düşennerin arasından 3 kişi öldü.

Türkiyenin Van tarafında kaar kaymaları

Küçük ayın (fevral)  5-dä Türkiyenin Van tarafında, büük kaarlar beterinä, kaar kaymaları oldu. İlk kaymada 3 kişi canını kaybetti, 2 kişi da kayıp oldu. Onnarı bulmaa hem kurtarmaa gelän kurtarıcı alayları işinä başladıynan, daalardan ikinci büük kar kayması kopuştu da bu insannarı gömdü.

Nicä bildirer Türkiyenin haber kaynakları şindiki vakıtta kaar altında cannarı kaybedennerin sayısı 33 kişiyi geçti. Bildiriler, ani taa 53 kişi yaralandı.

Türkiyenin Hürriyet gazetası, Van gubernatorunun aşıklamasına dayanarak, yazêr, ani son ölennerin arasında var polițiyacılar, korumalar, bir yangıncı hem taa üç kişi da, ani kurtarmak operațiyasında pay almardılar.

Türkiyenin haber kaynakları bildirdilär, ani tragediya erindä işleerlär askerlär  hem yakındakı Bahçesaray kasabasından insannar. Kurtarma operațiyasına köstek koyêr kaarın derinnii, büük kaar yaaması hem duman.

Türkiye içişleri ministrusunun açıklamasına görä maşinaların birisin 4-5 metra derinniktän çıkardılar.

Redakțiyamızdan. Türkiye halkına hem bu tragediyalarda cannarını kaybedän insannarın yakınnarına kendi acızgannıımız bildireriz. Allaa ölenneri saa tarafına kabletsin.

eraplan

BİR CUVAP YAZIN