cesme_kuuyu_dostlek_usak_bascasi_acilisi (1)

17.05.2017, tarafından yazılı , CÜMNE BÖLÜMÜ, 42 KERÄ BAKILMIŞ

Türkmenistan hem Moldova arasında dostluk simvolu

(Çöşmä küüyün “Dostluk” uşak başçasının ofiţial açılışı)

Türkmenistan Respublikasının Prezidentı Gurbangulı BERDIMUHAMEDOVun 2013-cü yılda verdii izininä görä, baaşış olarak, Gagauziyanın Çöşmä küüyündä Türkmenistan Respublikası düzdü bir eni uşak başçası. 2017-ci yılın Hederlez ayın 16-da da bu uşak başçasının ofiţial açılışı oldu. Açılışta pay aldılar Türkmenistan Respublikasının Premyer-ministru yardımcısı hem dışişleri ministrusu Raşid MEREDOV, Moldova Prezidentı İgor DODON, Türkiye Kişinev Büükelçisi Hulusi KILIÇ hem Turkmenistanın Moldovada Büükelçisi Nurberdi AMANMURADOV, Gagauziya öndercileri hem deputatları.
cesme_kuuyu_dostlek_usak_bascasi_acilisi

Uşak başçasının ofiţial açılış büük bir tantalalı hem eşil renkli yortuya döndü. Başkanın duhovoy orkestrası fanfaralı havaları çalardı. Musaafirleri karşladar Çöşmä küüyün üürencileri hem insannarı, angıları sallardılar Türkmenistanın, Moldovanın hem Gagauziyanın bayraklarını. Doz-dolay eşillikti: Türkmenistan bayrakları, uşakların şiritleri hem bantları, uşak başçasının aullarını hem binasını donaklayan şişirigalar, fidannar, otlar, odaların erleri. Bu eşil renklär açılış yortusuna taa da büük şennik hem hodulluk verärdilär. Uşak başçasının binasının ön duvarında erleştiriliydi Türkmenistan Respublikasının Prezidentının Gurbangulı BERDIMUHAMEDOVun patredi.

Açılış nasaatını yaparkana Türkmenistan Respublikasının Premyer-ministru yardımcısı hem dışişleri ministrusu Raşid MEREDOV getirdi hem söledi Türkmenistan Respublikasının Prezidentının Gurbangulı BERDIMUHAMEDOVun “gagauz kardaşlarına hem kızkardaşlarına selämını” hem urguladı, ani “Çöşmä küüyün “Dostluk” uşak başçası – Türkmenistan hem Moldova arasında dostluk simvoludur”. Sözündän sora Raşid MEREDOV verdi uşak başçasının geçici direktoruna Födora REŞELÄNa başçanın “simvollu anaktarını”.
cesme_kuuyu_dostlek_usak_bascasi_acilisi (4)

“Dostluk” uşak başçasının ofiţial açılış şiridini kestilär Türkmenistan Respublikasının Premyer-ministru yardımcısı hem dışişleri ministrusu Raşid MEREDOV, Moldova Prezidentı İgor DODON hem Gagauziya Başkanı İrina VLAH. Nedän sora, “Dostluk” uşak başçasının geçici direktoru Födora REŞELÄN büük musaafirlerä uşak başçasında ekskursiya yaptı, neredä Raşid MEREDOV uşaklara baaşışları daattı.
cesme_kuuyu_dostlek_usak_bascasi_acilisi (3)

Ofiţial açılıştan sora Gagauziya hem Türkmenistan artistleri bir konţert gösterdilär.

Çöşmä küüyün eni uşak başçası esaplı 160 uşaa, angıları 8 grupaya bölünük. Ama küüdä var 183 uşak, angıları 5 uşak başçasına gidärdilär. Şindi, küü primariyasının kararınnan, hepsi bu uşak başçaları kapanacek da uşaklar “Dostluk” uşak başçasına gezeceklär. Burada uşakları üüretmää, terbietmää hepsi kolaylıklar var. Var burada oyun odaları hem bir baseyniya da.

Not. Çöşmä küüyündä uşak başçasının Türkmenistan Respublikasının tarafından baaşış olarak yapılması için karar taa 2013-cü yılda açıklandı, açan Moldovanın Prezidentı hem Gagauziyanın ozamankı öndercileri Türkmenistanda bulunduydular.

Fotolar – vlah.md saytından

BİR CUVAP YAZIN