genclik_orkestra_0

23.08.2016, tarafından yazılı , ANSAMBLİLÄR, KULTURA, KULTURA ÖMÜRÜ BÖLÜMÜ, 1005 KERÄ BAKILMIŞ

TÜRKSOY Gençlik Oda Orkestrası Evropada büük ses getirdi

Genel sekretar olarak TÜRKSOY başına Düsen KASEİNOV seçildiktän sora, 2010-cu yılda karar alındı TÜRKSOY Gençlik Oda Orkestrasını kurmaa, da o orkestrada türk dünnäsının talantlı genç muzıkantlarına kolaylık vermää kendilerini dünneyä tanıtmaa.

Bu yıl orkestra Azerbaycan, Kazahstan, Kirgizistan, Türkiye hem Türkmenistan genç muzıkantlarından kuruldu. Orkestraya şeflik yaptılar uygur kökenni anılmış kazah maestro Anvar AKBAROV hem Azerbaycandan genç muzıkant Mustafa MEHMANDAROV.
genclik_orkestra_1

TÜRKSOY Gençlik Oda Orkestrası ilktän 2016 yılın Orak ayın 12-24 günnerindä Türkiyenin Bolu kasabasında repetiţiyalarını yaptı. Sora da, başlayıp Orak ayın (iyül) 25-dän, Evropanın 3 devletindä “Avrasyanın Sesleri” (“Evroaziyanın sesleri”) adlı 7 konţert gösterdi. Konţertlär Türk Respublikalarının baamsızlıklarından 25-ci yıldönümünä baaşlandı. Onnar geçtilär Angliyanın Oxford hem London kasabalarında, Şotlandiyanın Glasgow hem Edinburg kasabalarında, İtaliyanın Forli hem Pesaro kasabalarında.
Oxsford kasabasında konţert Orak ayın (iyül) 25-dä Oxford Universitetın istoriyalı Sheldonian Teatrosunda oldu.
genclik_orkestra_2

Londondakı konţert sa Orak ayın (iyül) 26-da kasabanın en kalabalık noktalarından birisi olan Piccadily Meydanında bulunan St. James’s Katedralında oldu. O konţertın açılış konuşmasını yaptı Kazahstan Respublikasının Angliyada Büükelçisi Erzhan KAZYKHANOV.

Şotlandiyada konţertlär verildi Orak ayın (iyül) 28-29 günnerindä, Glasgow  kasabasında olan “Halklararası Muzıka Üüredicilii Birlii” (ISME) dünnää Konferenţiyasının çerçevesindä. Eridir urgulamaa, ani o konferenţiyaya bütün dünnedän 1500 muzıkolog katıldı. Da hepsi katılannarın kolaylıı oldu tanışmaa TÜRKSOY Gençlik Oda Orkestrasının becerkliinnän. (Açıklandı, ani İSME gelän konferenţiyası Azerbaycanın Baku kasabasında olacek).

Edinburghta konţert Orak ayın (iyül) 30-da “Edenburg Muzıka Salonu” çerçevesindä oldu. Burada Greyfiars Kirk Katedralında konţertın açılış konuşmasını Türkiye Respublikasının Edinburgh Konsolosu Semih Lütfü TURGUT yaptı, urgulayıp, ani “TÜRKSOY, Türk dünnäsının UNESCOsu olarak, türk kulturasını Türk dünnäsının dışına taşıyêr”.
genclik_orkestra_4

Forli kasabasında TÜRKSOY Gençlik Oda Orkestrası Emilia Romagno Festivalinä pay aldı hem Harman ayın (avgust) 1-dä konţert gösterdi. Sora da anılmış kompozitorun Gioachino Antonio ROSSİNİnin duuma Pesaro kasabasında Harman ayın (avgust) 3-dä konţert verdi. Konţertlär İtaliya TV kanallarında gösterildi.
TÜRKSOY Gençlik Oda Orkestrası 2010-cu yılda kuruldu. Bu iş yapıldı türkçä lafedän halkların müzıka potanţialını göstermää deyni, onu klasika muzıkasınnan annatmaa, türk kulturasının hem türk klasik muzıkasının yaratmaklarını taa yakından tanınması hem populärizaţiyası için.

Bu orkestra kurulêr TÜRKSOY azaları devletlerdä bulunan konservatoriya üürencilerindän. TÜRKSOYa aza memelektlerin kultura ministerliklerin uurunnan orkestraya her yıl genç hem talantlı muzıkantlar ayırılêr. Onnar, bir araya gelip, orkestranın repertuarını kurêrlar da dünneyin çeşitli köşelerindä konţertlär vererlär.

Büünkü günädän TÜRKSOY Gençlik Oda Orkestrası, herkerä eni muzıkantlarlan, artık 9 kerä toplandı hem dünneyin önemni incäzanaat merkezlerindä 40 solo konţerti verdi. 2011-ci yılda ilk CD albomunu, 2013-cü yılda da ikinci CD albomunu çıkardı.

Not. TÜRKSOY (Uluslararası Türk Kültürü Teşkilatı) 1993-cü yılın Orak ayın (iyül) 12-dä Almatı kasabasında Azerbaycan, Kazahstan, Kirgizistan, Türkmenistan, Türkiye hem Uzbekistan kultura ministrularının tarafından imzalanan annaşmalarına görä kuruldu. Sora TÜRKSOYa Gagauziya (Gagauz Yeri) kabledildi. Taa sora da, gözlemci statusunnan, TÜRKSOYa kabledildilär KKTC (Kuzey Kıbrıs Türk Cumhuriyeti), Rusya Federaţiyasından avtonom respublikaları Altay, Başkiriya, Hakasiya, Saha-Yakutiya hem Tatarstan Respublikası.

TÜRKSOY türk dilini lafedän halklar hem memleketlär arasında dostluk ilişkileri kurarak, ortak türk kulturasını, dilini, istoriyasını, incäzanaatını, geçmişi hem gelecää aaraştırarak hem zenginnederäk, korumak için hem gelecek kuşak gençlerä taşımak için hem da aktarmak çalışmaklar için kuruldu.

BİR CUVAP YAZIN