Novruz

29.03.2014, tarafından yazılı , KULTURA BÖLÜMÜ, 1180 KERÄ BAKILMIŞ

TÜRKSOYun çalışmasınnan “Novruz” Eskişehirdä bakıldı

“Novruz bayramı” en evelki türk yortusu, ani bakılêr Baba Marta ayın 20-21 günnerindä hem sayılêr ilkyazın başlamasının hem tabiatın enilenmesinin yortusu. TÜRKSOYun zaametinnän “Novruz bayramı” artık bütün türk dünnäsının yortusu oldu.

Bu yıl, TÜRKSOYun yardımınnan bütün türk dünnäsından gelän insannar, “Novruz bayramını” büük şenniklärlän Türk dünnäsının baş kasabası olan Türkiyenin Eskişehir kasabasında kutladılar. Kutlamalar birkaç gün sürttü. Programaya görä türlü meropriyatiyalar geçti: ansamblilerin festivali (Gagauziyadan “Düz Ava” katıldı), gazetacıların Forumu, konţertlar hem ödüllerin verilmesi.

Yortu açıldı büük bir konţertlan, angısında pay aldılar festivalä katılan hepsi ansamblilär. “Novruz” günündä şenniklär başladı delegaţiyaların paradından.

Paradın önündä gidärdi osmannı orkestrası, sora da ofiţial insannar. Parad valiliin yanında meydanda durgundu da, “Novruz” yortusunun ofiţial açılışından sora, insannara tatlılar hem boyalı yımırtalar ikram edildi, yımırtalarlan dokuşuldu,  ateş üstündän atlanıldı, konţert gösterildi hem burada kurulan devletlerin evleri, çadırları hem yurtaları gezildi.

Avşam üstü da yortunun hem Eskişehir, 2014 yılı Türk dünnäsının kultura baş kasabası olması için, estafetayı Rusiya Federaţiyasının Tatarstan baş kasabasına Kazana verilmesinnän kapandı. Bu kapanışta büük hem pek gözäl bir konţert gösterildi. Konţertın kapanış oyununda 500 artist pay aldı.

NECDET

PATRETTÄ: “Gagauz Evindä” (soldan) Gagauz hem Moldova dostluk dernää başı Necdet  Ertuğrul, Türkiye Başbakan Yardımcısı Prof. Dr. Emrullah İŞER, Milli Üüredecilik Bakanı Nabi AVCI, Eskişehir Valisi (gubernator) Güngör Azim TUNA.

BİR CUVAP YAZIN