r-sava

15.02.2015, tarafından yazılı , KULTURA, RESİMCİLİK BÖLÜMÜ, 1452 KERÄ BAKILMIŞ

Uşak resimcilik şkolasının sergisi

Büük ayın 30-dan Küçük ayın 15-dän Komradın kultura Binasında geçti komratakı “D. SAVASTİN” adına uşak resimcilik şkolasının üürencilerin sergisi. Burada uşakların 146 resimi gösterildi. Serginin açılışnda şkolanın direktoru Sergey SAVASTİN yaptı prezentaţiya “The children are painting the world” (“Uşaklar dünneyi resimneerlär. TÜRKSOY”) albomuna.

Bu albomda tipalandı Kazahstanda “Uşaklar dünneyi resimneerlär. TÜRKSOY” festival sergisindä pay alan hem enseyän uşakların resimneri. Onnarın arasında vardı Komrat resimcilik şkolasınını üürencileri da. Albom için söleyeräk Sergey SAVASTİN dedi: “TÜRKSOYun sergisindä bizim şkoladan 65 uşak katıldı. Ensedi 31-ri. Alboma sa bizim uşkakların 34 resimi girdi. Bizim bünkü sergimizin adı – “Uşaklar dünneyi resimneerlär”. Bu ad boşuna koyulmadı. O ilgili onunnan ne olêr büün dünneydä. Biz – baarış için!”

Komrattakı serginin açılışında söz tuttu resimci Dimitriy SAVASTİN, kimin adını resimcilik şkolası taşıyêr. Dimitriy SAVASTİN açılışta bulunannara bölä danıştı: “Aklıma getirerim o günü, açan bän burêy geldim: hiç bir resimci yoktu, sadä kimsa plakat resimnärdi. Bän şaşatım, ani yok resimcilik şkolası da başladım kuruluştan kuruluşa gezmää – hereri hem her erdä. Resimcilik şkolası pek zor açıldı. Umudum var, ani gelecektä şkolamızın üürencilerinin adları bütün dünneyä öteceklär.”

Sergidä pay alannar için hem onnarın yaratmaları için resimcilik şkolanın üüredicisi Vitaliy MANJUL ölä dedi: “Bizim uşaklarda büük bir potenţial var. Onnar pek talanlı. Bir laf – üülen tarafın uşakları! Resimnerdä açıktan görüner onnarın iç dünnesi, zengin renkleri. Uşaklar pek islää duyêrlar bizim folkloru. Esap aldısanız, sergidä 60% zeedä resimnerdä gagauz kulturası gösterili. Bizim en büük davamız – resimcilik incäzanaatında kendi özelliimizi korumamız.”

Serginin açılışında albomda er alan uşaklara baaşlandı birär “The children are painting the world” albomu hem gramotalar.

PATRETTÄ: (saadan) resimcilär Dimitriy SAVASTİN, Sergey SAVASTİN, Vitaliy MANJUL hem Gagauziya kultura Upravleniyası Başın yardımcısı Evgeniya LÜLENOVA.

Foto – gagauzmedia.md

BİR CUVAP YAZIN