invest_forum

24.10.2020, tarafından yazılı , CÜMNE, EKONOMİKA BÖLÜMÜ, 129 KERÄ BAKILMIŞ

VI-cı Halklararası “Invest Gagauzia-2020” Forumu

Komradın eni yapılan stadionunda, ani Türkiye Prezidentı Sayın Recep Tayyip ERDOĞANın Gagauziyaya 2018-ci yılın Canavar ayın 18-dä vizitı zamanında verilän izininä görä Türkiye Pravitelstvosu tarafından Komratta yapılêr, 2020-ci yılın Canavar ayın (oktäbri) 23-24 günnerindä geçer VI-cı Halklararası “Invest Gagauzia-2020” investiţiya forumu, angısında, Gagauziya tarafından kaarä, pay alêrlar Moldova öndercileri, diplomatlar, erindeki hem aşırı develtlerdän biznesmennar.

VI-cı Halklararası “Invest Gagauzia-2020” Forumun birinci günündä açılış nasaatını yaptı Gagauziya Başkanı İrina VLAH, angısından sora kutlama hem selemnama sözlerini tuttular Moldova Premyer-ministrusu İon KİKU, Moldova Türkiye Büükelçisi Gürol SÖKMENSÜER, Moldova Rusiya Büükelçisi Oleg VASNEȚOV. Onlain yolunnan Foruma katıldılar Evropa Birliin Moldovada Büükelçisi Peter MİHALKO hem Moldovada Amerika Birleşik Devletlerin (ABD) Büükelçisi Derek J. HOGAN (Dereck J. Hogan), Moldovanın Türkiyedä Büükelçisi Dimitriy KROYTOR, Türkiyedän iş adamnarı  hem başkaları.

Ofițial açılıştan sora “Invest Gagauzia-2020” Forum kendi işini sekțiyalarda ilerletti.

Kendi fikirlerini Forumda açıkladılar: Türkiyedän “YEŞİM” holdingın temsilcisi Ahmet ŞEKERCİLER (bu holdinga girer Gagauziyada çok yıllar investițiya yapan “Asena Tekstil” Kompaniyası, ani artık burada 3 bin kişiyä iş verer), Moldovanın “Moldovagaz” başı hem Gagauziya Başkanın eski birinci yardımcısı Vadim ÇEBAN h.t.b.

Forumun birinci günündä investiţiyalar için birkaç ön annaşma imzalandı.

“Invest Gagauzia-2020” ikinci günündä İT tehnologiyaları hem başka biznes tekliflär incelenecek.

PATRETTÄ: Başkan İrina VLAH hem  Büükelçi Gürol SÖKMENSÜER karşlêêrlar Moldova Premyer-ministrusunu İon KİKUyu.

BİR CUVAP YAZIN