75 yıl geeri dünnää sarsılandı ilk atom bombaların patlamasından, açan II-ci dünnää cengin sonunda ABD (Amerika Birleşik Devletleri) silählı kuvetleri attılar bu atom bombalarını 1945-ci yılda Yaponiyanın Hirosima hem Nagasaki kasabalarına.
İlkin, 1945-ci yılın Harman ayın (avgust) 6-da saat 08:15-tä, amerikalı B-29 bomba atan eraplanı attı Hirosima kasabasına “Little Boy” (Küçük çocucak) atom bombasını. Sora da, 1945-ci yılın Harman ayın (avgust) 9-da saat 11:02-dä “Fat Man” (Şişman adam) atom bombası atıldı Nagasaki kasabasına. Bu bombalardan hemen hem taa sora ölän insannarın sayısı: Hirosimada – 90-160 bin kişi, Nagasakidä – 60-80 bin kişi.
2020-ci yılın Harman ayın (avgust) 9-da Nagasaki kasabasında andılar atom bombalarının kurbannarını. Anmak yaslı sırası başladı saat 11:02-dä – bu vakıtta 75 yıl geeri “Fat Man” (Şişman adam) atom bombası düştü bu kasabaya.
Bu yaslı sırada nasaat ederäk, Nagasaki kasabasının primarı Tomihisa TAUE urguladı, ani “dünnääda nuklear silähların kullanılması kuşkuluu zeedelener, da bu üzerä “Nuklear silähların yayılmaması için Annaşma”yı korumaa lääzım. Bu silähların kullanması kolaylaştı o üzerä, ani dünnäädä yapılêr pek çok miniatür nuklear silähları”.
Patrettä: Atom mantaraları: solda – Hirosimada, saada – Nagasakidä.