Lüdmila KÜRKÇÜ 13 yaşında bir resimciyka. 2024-cü yılda başardı Komrat kasabasının Dimitriy Savastin adına uşak resimcilik şkolasınının Geogiy ANDRİEŞ pedagogun klasını, ama resimcilik uurunu ilerleder, keskinneştireräk hem incelederäk ustalıını, kavrayarak eni teknik hem biçim kavramnarını.

Şindiki dünneyin meyvası olarak, ama köklerindän kopmayan bir uşak, kendi yaratmalarında Gagauzları hem Gagauzluu, büünkü görüşlerä görä yaradıp, açıklêêr. Bu açıklamakta, “can dilini” hem alegoriyaları kullanarak, boyaların renklerinnän hem ana tarafın motivlarınnan dä becerikli oynêêr.

Bakmadaan ona, ani Lüdmila sadä 13 yaşında onun yaratmaları Gagauziyada 8 sergidä hem dünneyin 9 halklarası konkurslarında (Kişinev, Moldova; Lidițe, Çehiya; Tokio, Yaponiya; Florențiya, İtaliya; Vallahiyada İlfov județı, Romıniya; Minsk, Belarusiya; Moskva, Rusiya Federațiyası) er aldılar.

Resimciyka Lüdmila KÜRKÇÜ tarafından ilüstrațiyalar kulanıldı uşaklar için “Guguşçuk” jurnalda, “Adetlerin Șen Ötmesi” hem “hayvannar için masallarda: “Bir vakıt varmıș, bir vakıt yokmuș…” kiyatlarında.

Körpä resimciyka için 2026-cı yıl tanımak hem ödüllär tarafından pek bereketli oldu. Kişinevda olan hem 5 devlettän 400 genç resimcinin pay alan “Da Vinçi” Resimcilik incäzanaatında Halklararası konkursta (16.05.2026) 13-18 yaşlar arasında resimcilerin “Jivopis” kategoriyasında Lüdmilanın resimi “Resimcilik ödülü” diplomunu kabletti.

2026-cı yılın Kirez ayın 12-13 günnerindä İtaliyanın Florențiya kasabasında olan uşaklar arasında Resimcilik incäzanaatında Halklararası konkursta, onun “Altın tohumnar / Golden Grains” resimi, 10-13 yaşta resimcilerin arasında I-ci eri aldı. Söz gelişi bu konkurs türlü devletlerdä “WE ARE THE WORLD Events” Asoțiațiyası (Parij, Franțiya) tarafından yapılêr. Florențiyada ensedii için, Lüdmila KÜRKÇÜ buyur edildi 2026-cı yılın Kırım ayın 21-dä Parijda geçecek her yılkı konkursa.

Lüdmila KÜRKÇÜ “Altın tohumnar / Golden Grains” resiminnän katıldı Romıniyanın İlfov județında 2026-cı yılın Harman ayın 3-7 günnerindä olan 7-ci “Festival 4 Arts / Festivalul de Arte” Vizual incäzanaatı Halklararası konkursuna, neredä 11-13 yaşlar arasında resimcilerin arasında “Jivopis” kategoriyasında I-ci eri aldı.

Nicä bildirerlär cümne aalarında, bu iş yapıldı o üzerä, ani insannarın hem eni gelän evlatboyların cümne paalılıklarını dooru yola koymaa: ön plana çekmää saygıyı onnara, kim mediținayı, bilim paalılıklarını, tehnologiyaları hem kosmonavtikayı ilerleder.

Malların erinä ekrannara eni ideyayı sürerlär: bilim başarılarında, şennik industriyası gibi, üüsek kultura statusuna uygun haklar var.

Aynoroz (Afon) bayırına tepesinä etişmää deyni, 8 yaşındakı Adam ANASTASOV, bobasınnan hem başka büük insannarlan bilä, kendisi geçti bu 2 bin 33 metralık üüseklää yolu, çünkü taa küçüklüündän onda dayanıklık hem ruh çetinnii var.

Aynoroz (Afon) bayırına pindii gibi, Adam ANASTASOV burada Gagauziyanın hem Komrat kasabasının Bayraklarını yaydı.

Bildiimiz gibi, 8 yaşındakı Adam ANASTASOV Aynoroz manastırına hacılaa gidän hem bu hacılıı başaran ilk uşak oldu.

Adam ANASTASOV Komrat primariyasının sovetniinin hem Gagauziya cümne insanının Vadim ANASTASOVun oolu.

Yıldönümü reçepțiyası başladı Türkiye hem Moldova Gimnalarından. Sora Büükelçi Nazmiya BAŞARAN, yortuylan ilgili, selemnama hem kutlama sözünü tuttu.

Arkadan da Türkiye Respublikası Prezidentı Recep Tayyip ERDOĞANın Türkiye Respublikası kuruluşun 103-cü yıldönümünnän ilgili yortulu danışması ekrannara verildi.

Reçepțiyaya katlan Moldova Premyer-ministrusu Vasile TOFANda angliyca bir sözünnän nasaat etti.

Sora da, insannar ikramnara nuyur edildikleri zaman, Moldovanın anılmış artistı Konstantin MOSKOVİÇ, orkestrasınnan bilä, gözäl melodiyaları çaldı.

Ayrıca, reçepțiyaya katılannara deyni, Türk Hava Yolları tarafından İstanbula iki uçak bileti lotoreyası da yapıldı.

Türkiye Respublikası kuruluşunun 103-cü yıldönümünnän ilgili olaran reçepțiyasında pay aldılar Moldova politikacıları hem parlament deputatları, yabancı devletlerin büükelçileri hem diplomatiya misiyaların başları, bilim, kultura hem cümne insannarı.

Hep o günü Türkiye Komrat Başkonsulu Eda GÜÇ da Gagauziyada Türkiye Respublikası kuruluşunun 103-cü yıldönümünnän ilgili bir reçepțiya verdi.

Mustafa Kemal ATATÜRKün teklifinnän 1923-cü yılın Canavar ayın (oktäbri) 29-da Türkiye Cumhuriyeti (Türkiye Respublikası) kuruldu.

Bu büük yortu kutluca olsun hem yaşasın Türkiye Respublikası!

Bu üüsek nışannarı 2026-cı yılın aar atletikada Evropa çempionanına Aleksandr BALCIya hem studentlar arasında aar atletikada Dünnä çempionatlıında bronza medaliyi alan Anastasiya PALİKä, Gagauziya Başkannıı hem Gagauziya Halk Topluşu binasının önündeki meydanında olan bir yortulu sırada, verdi Gagauziya İspolkomu Predsedatelin hem Gagauziya Başkanın birinci yardımcısı İlya UZUN.

Aleksandr BALCI (85 kg. kategoriyası), Albaniyanın Duresse kasabasında 2026-cı yılın Canavar ayın 12-19 günnerindä geçän U-20 aar atletikada Evropa çempionatında, Evropa rekordunu kırdı hem çempion oldu. Toplam 347 kg (koparmada 155 kg hem itirmedä dä 193 kg) kaldırıp, bizim cportsmen iki altın (itirmedä hem toplamda) hem bir gümüş (koparmada) medali kazanıp, eni rekordlan Evropa çempionu oldu.

Anastasiya PALİK (86 kg. kategoriyası), Katarın Dohe kasabasında 2026-cı yılın Ceviz ayın 8-12 günnerindä, Universitetlar sportları halklararası Federațiyası (FISU) kanadı altında geçän studentların arasında aar atletika Dünnä çempionatında, toplam 209 kg (koparmada 93 kg hem itirmedä dä 116 kg) kaldırıp, brozna medaliyi kazandı.

Aleksandr BALCI hem Anastasiya PALİK Gagauziyanın Komrat aar atletikada regional şkolasından çıkan spotçular.

Bu Festivaldä pay aldılar İtaliya, Moldova/Gagauziya, Palistina, Portugaliya, Romıniya, Ukrayna, Üülen Koreya hem Türkiye teatruların 30-za yakını.

Nicä bildirdi “Ana Sözü” gazetanın redakțiyasına Çadırdakı “Dionis TANASOGLU” gagauz Milli teatrunun direktoru Mihail GAGAUZ, bu teatru “8-ci Halklararası Maltepä Teatru Festivali” katıldı hem Canavar ayın 21-dä gösterdi orada franțuz dramaturgun Robert THOMASın “Tuzak” pyesasına görä koyulan spektakliyi (rejisör – Dimitriy KOEV). Canavar ayın 22-dä sä, teatrunun incäzanaat öndercisi Nataliya PALADİY Maltepe Universitetın studentlarına deyni teatruda hem kinoda sțena sözündä master-klas gösterdi.

Mihail GAGAUZ açıkladı, ani spektakli dolu zalda geçti hem onnarın siiredicilirin oldular İstanbulda hem Türkiyedä yaşayan gagauzlar da.

«Депортация 6–7 июля 1949 г. в населённых пунктах МССР с преобладающим гагаузским населением» kiyadında toplu dokumental materiallar, patretlär hem dokumentlar, kaldırılan insannarın annatmaları, ani annadêrlar gagauz halkının, 1946-1947 yılların aaçlıından sora, en kara sayfalarından birisi olan – Sibirä kaldırmaları için.

Gagauziyanın, Gagauzların hem gagauz literaturasınnan hem kulturasınnan ilgili bu önemni sırada kiyadın prezentațiyasına katılmaa deyni, o günü Kongaz Todur Zanet adına teoretik lițeyinä buyur edildilär hem buyurdular Gagauziyanın üüredicilik Upravleniyasının başı Natalya KRİSTEVA hem bu upravleniyanın baş zaametçileri, Gagauziyadan gagauzçada, rusçada, romıncada, angliycada hem istoriyada üüredicilär, bibliotekacılar, üüredicilik kuruluşların direktorları, Gagauziya kultura Upravleniyasının başı Marina SEMENOVA hem başka kultura insannarı. Prezentațiyanın paalı hem şannı musaafiri oldu Türkiye Respublikasının Komrat Başkonsulu Eda GÜÇ.

““Aya Mariya”: anıları koruyan istoriya” sırası başladı bir minutluk ayakta durmaktan hem 1946-1947 yıllarda gagauzlara karşı yapılan Aaçlıın kurbannarını sessiz anmaktan.

Sora, “Aya Mariya” (“Святая Мария» / “Sfânta Maria” / “Saint Mary”) yaratmanın özünä hem gagauzluk ruhuna uyan donaklı sțenada başladı yaşamaa kiyadın kahramannarı. Lițeyin üüredicileri dört dildä okudular kiyattan parçaları: gagauzça (Matrona Nikolevna BARGAN), rusça (Olimpiada Grigoiyevna STATOVA), romınca (Anastasiya İlyiniçna TOMAYLI) hem angliyca (Svetlana Dimitriyevna DUŞKOVA). Bir parçayı da gagauzça okudu üürenciyka Viktoriya KURDOGLU.

Üürencilär Dimitriy YASIBAŞ (Todi) hem Kseniya PANAİTOVA (Mariya) gösterdilär yaratmada annadılan Mariya tarafından klisä kiyatlarının kurtarması için sțenkayı. Zalda bulunan insannarın gözleri heptän yaşlan doldu, açan üürencilär Födor DUŞKOV (avtorun adından) hem Zinayıda MADJAR (Mariyanın adından) okudular Aya Mariyanın Panayıyaya dua danışmasını.

Hepsi bu literatura okumaklarından hem teatrulu sțenalardan sora, bu sırayı götürän üürencilär Grigoriy GREKU hem Zinayıda MADJAR söz verdilär kiyadın avtoruna Todur ZENETä. Canabisi, şükür etti hepsinä, kim hazırladı bu gözäl sırayı hem hepsinä, kim katıldı bu, cannarı koparan, kiyadın tanıtımına.

Avtor annattı nicä hem neçin yazıldı “Aya Mariya” kiyadı hem söledi, ani onun temelindä yatêr bir avdarmalıyka Mariyanın yaşaması, ruh kaavilii, saburluu, gagauz halkına hem Kliseyä yapan izmetleri, dininä, insannaa saygısı, ani ana südünnän onun kanına girmiş. Bu kiyat diil salt aaçlık hem aaçlıı geçirän bir karı için, diil sade Kliseyä karşı yapılan zulumnuklar için, ama bu kiyat  – gagauz halkının dinini hem inanını koruması, sessiz direnci hem ruh zenginniinnän can saalıını koruması için. Canabisi urguladı, ani kiyatta gösterilän vakıtların ruhunu, kiyadın baş kahramanın insannıını hem obrazını açıklamaa deyni, o kullandı kendi malisinin Ekaterina İvanovnanın harakterını hem anasının İvanna Dimitriyevnanın kliseciliini, onnarın zengin hem pak gagauz dilini. Bu üzerä dä kiyat adalı onun malisinä – Ekaterina İvanovna ZANETä.

Todur ZENET ayırı şükür etti Gagauziya üüredicilik Upravleniyasına hem onun başına Natalya KRİSTEVAya, ani kayıl oldular bu kiyadı tiparlamaa hem kolaylık verdilär Gagauziya üüredicileri hem üürencileri kulansınnar “Aya Mariya” yaratmasını eni peydalanan çok dilli üüredicilik sistemasında.

Kiyadın tanıtımında söz alan Türkiye Komrat Başkonsulu Eda GÜÇ, urgulayarak kiyadın prezentațiyasının aaçlık kurbannarını anmak günündä önemni olduunu, dedi: “Büün, gagauz halkının istoriyasında acı bir dönemi andıımız bu annamnı gündä, sizlärlän bir arada olmaktan kanaatlık duyêrım. Önceliklän, gagauz halkının akılında derin izlär brakan aaçlık kıyametindä ömürünü kaybedenneri saygı hem raametlän anêrım. Bu gün tanıtımı yapılan “Aya Mariya”, bizlerä yalnızça geçmiştä yaşanan acıları diil, en zor koşullarda bilä inancına, paalılıklarına hem insannık onuruna sayıp çıkan insannarın istoriyasını annadêr”.

Gagauziya üüredicilik Upravleniyasına başı Natalya KRİSTEVAnın esabına görä “tanıdılan kiyat diil salt literatura yaratması, ama üüredicilerin hem üürencilerin arasında insannık paalılıkları, istoriya akılı hem gelän evlatbouların önündä cuvapçılık için açık hem büük maanalı dialog kurmakta bir sebeptir. Bu kiyat – herbir okuycuya yakın olan kiyatlardan bir kiyattır. O verer kolayının aklına getirmää kendi aylenin istoriyasını, düşünmää o iş için, nesoy varlık bizä brakıldı hem angı paaya o korundu. Pek isteerim, ani kiyat üüredicilär hem üürencilär arasında açık candan bir lafetmeyä sebep olsun, ona, nicä en zor hem aar vakıtlarda insan kalmaa, yardım aarayannara arka olmaa, inanını korumaa hem onurunu kaybetmemää. Lafetmää o iş için, ne yaşamakta halizdän en önemni hem en paalı: insanın ömürü, cömertlik, acızgannık, dedeleri aklında tutmak hem gelän evlatboyları önündä sorumnuluk”.

Gagauziya kultura Upravleniyasının başı Marina SEMENOVA urguladı, ani ayllerin toplu akılı, arhiv dokumentleri hem literatura yaratmakları vererlär kolayını korumaa hem eniletmää boyların arasında baalantıları, taa derindän annamaa dedelerin ecelini, derindän meraklanmaa ana tarafın istoriyasınnan hem geçmişinnän. Canabisi kendi aaraştırmalarınnan da paylaştı: “Bir edi-sekiz yıl geeri, çekettim aaraştırmaa kendi aylemin istoriyasını. Biz 1812-ci yıladan hepsicii ayleleri bulduk. Biz bulduk klisenin arhivlarından, ani benim dädumun aylesindä varmış 13 kişi. 13 kişidän kalmış sade bir o yalnız. Da bän ne düşündüm, okuyarkana bu kiyadı: bezbelli, o arhivları da, kim biler, ozamannar zorluktan, bekim korudu Todur Zanetin kiyadından te ölä bir Aya Mariya da büün bizim var kolaylıımız bilmää kendi istoriyamızı, bilmää kendi köklerimizi”.

Prezentațiyada söz alan Kongaz Nikolay Çebanov adına gimnaziyanın üürediciykası Svetlana Dimitriyevna KIRBIYIK hem Kongaz Varvara Topal adına gimnaziyanın üürediciykası Anna Georgiyevna STOYANOVA urguladılar, ani “Aya Mariya” kiyadı açêr büük kolaylıklar hem sıradan üürediciliktä, hem da çok dilli üüredicilik uurunda. Canabileri çizgeledilär, ani bu kiyadı var nicä raat kullanmaa hem klaslar dışı hem disțiplinalar arası uroklarda, angıları birleştirerlär literatura, istoriya hem dil üürenmesi uroklarını. Onnar söledilär, ani bu kiyadın yardımınnan üürencilerä gösterilecek ne o insannık hem ne o can kaavilii.

Anna Georgiyevna STOYANOVA: “Benim bakışıma görä bu kiyat “Aya Mariya” diil salt bir insanın yaşaması için. O olmayacek sade bir literatura yaratması da. Bu kiyat verecek kolaylık ortak olalım başka dillerin üüredicilerinnän, verecek kolaylık çalışmaa taa geniştän. Üürencilär dä, okuyarak dört dildä, kendi bilgilerini taa derinnedeceklär”.

Svetlana Dimitriyevna KIRBIYIK: “Bizim borcumuz, nicä üüredicilerin, lääzım annatmaa uşaklara, ani lääzım becersinnär korumaa kendi kulturasını, büüklerä hatır gütmää, ana tarafın istoriyasını saymaa. Bu nicä bir teklif bizim uşaklara deyni, aaraştırmaa kendi küüyünü, kendi aylelerini, kendi Klisesini”.

“Aya Mariya” kiyadın romıncasını önä alarak, bu kiyat hem onun avtoru için pek pak hem gözäl bir romın dilindä tanıtım zamanında nasaat mesajın söledi Gagauziya üüredicilik Upravleniyasının baş zametçiykası Mariya Stepanovna UZUN.

Kongaz Todur Zanet adına teoretik lițeyin direktoru Marina İvanovna ÇEBANOVA, danışarak kiyadın avtoruna, dedi: “Pek önemni, ani büünkü sıra geçer bizdä, zerä bizim lițeyimiz taşıyêr Sizin adınızı. Biz hodullanêrız hem sevineriz herkerä, nezaman Siz bizä gelersiniz. Sevineriz sizin yaptıklarınıza. Büün tanıştık bölä bir derin yaratmaklan “Aya Mariya”. İsteerim sölemää, ani o büük örnek bizim uşaklara da, annasınnar, ani büünkü vakıtlarda onnar pek islää yaşêêrlar. Bän şükür ederim Sizä, saygılı Födor İvanoviç, Sizin işiniz için, ani Siz yapêrsınız korumaa deyni gagauz halkın istoriyasını, kulturasını hem ruh varlıını. Dileerim Sizä tükenmäz bir yaradıcılık ihlamı, fikir birlikli insannardan arka hem yardım, eni yaratmaklar yaratmasında eni kuvet”.

Prezentațiyanın sonunda, kongazlıyka Praskovya Konstantinovna ESİR, “Aya Mariya” kiyadına hem aaçlık kurbannarına bir anma simvolu olarak, baaşladı sıranın paalı musaafirlerinä kendi elinnän samandan yapılı hem kara şiritlän baalı “Altın başak” yaratmalarını, angıların ardında bu laflar yazılıydı: “(1946-1947) Gagauziyada aaçlıık kurbannarın anmasına: Bu başak – anmak onnarı, kim ekmää bir adım kaldıynan öldü. Kara şirit – bizim sonsuz acımız. Samanın altını sa – bir simvol ona, ani halkımız, bütün zorlukalara karşı, ayakta kaldı. Ko bu nışan hatırlatsın büünkü tok yaşamamızın paasını”.

““Aya Mariya”: anıları koruyan istoriya” sırası bittiktän hem toplu patretlerdän sora, lițeyin zalında taa uzun vakıt diskusiyalar gitti hem kiyadın avtoru, hepsinä isteyennerä, aftograflarını braktı.

“Aya Mariya” kiyadın avtorundan: Candan-ürektän şükür ederim Gagauziyanın üüredicilik Upravleniyasının başı Natalya KRİSTEVAya, ani yaptı hepsini, ki bu dört dildä hazırlanan önemni kiyat tiparlansın hem okuycusuna etişsin. Şükür ederim Kongaz Todur Zanet adına teoretik lițeyin direktoruna hem administrațiyasına, sıranın hazırlanmasında pay alan hepsi üüredicilerä hem üürencilerä, açık candan izmetleri için. Şükür ederim hepsi insannara, kim saymadı zaametini da hem küüdän hem dä aşırıdan geldi “Aya Mariya” kiyadın tanıtımına da can sıcaklıını verdi Gagauzların ruh zenginniinnän can saalıını korumasını annadan bu kiyadın prezentațiyasının gözäl geçirilmesinä. Saa olun! Aaçlık kurbannarın topracıkları ilin olsun, Alaa onnarı raamet etsin hem hep saa tarafında tutsun.

2026-cı yılın Canavar ayın (oktäbri) nomerın PDFı burada:

https://anasozu.com/wp-content/uploads/2026/10/Ana_Sozu_19_20.2026.pdf

http://anasozu.com/gazetamizin-arhivi/