Bu diplomaya kablederäk gagauz deputatı Konstantin TAUŞANCI urguladı, ani “ozaman bu Deklarațiyayı sade dört gagauz deputatı imzaladı, kalanı kaçtıydılar”.

Moldovada hem Gagauziyada büünkü durum için söleyeräk, Konstantin TAUŞANCI dedi: “Gagauziyada Sovetlär Birlii kuvetleri, büünkü Gagauziya Başkanınnan barabar, Maya SANDUya karşı ölä büük bir agitațiya yaptılar.

Bän ölä deerim: Maya SANDU için oy vereräk, bän oy vererim Moldova Respublikasında hem Gagauziyada total korupțiyaya karsı düüş için. Şindi burada olaydı Maya SANDU, bän bu karının önündä afetsin isteyeceydim, Prezidentın önündä af dileceydim. Biz Gagauziyada üfkeliyiz: Gagauziya Başkanı karar almış kutlamamaa eni seçilän prezidentı.

Onnarın temel lozunguydu – Korkun Maya SANDUdan!

Ya sesläyin, kolegalar, bekim da halizdän lääzım korkmaa Maya SANDUdan! Bekim Maya SANDU ansızdan yollayacek bizä [Gagauziyaya] prokuraturayı da başlayaceklar açıklamaa Mihil FORMUZALın [17.12.2006 – 14.042015 arası Gagauziya Başkanı] karannık işlerini – o şindi Germaniyaya kaçtı. Bekim ansızdan açacıklar şindiki Başkanın, zenginin zengini olan karının, işlerini”.

Bendän sizä yalvarmak – afediniz bizim başkanı, o bir genç, annamaz adam, şaşırdı kendini, unuttu neredä bulunêr. O bilmeer, nasıl biz (1990-1994) avtonomiyamızı kurduk ozaman. Bizä ozaman çok zordu – Türkiye, kardaş olarak, çok yardım etti bizim eni avtonomiyamıza, eni universitetımıza.

Bizim halkta eskidän var ölä söz – hayırsız adam üzünü kaybetmiş. O (başkan – nışan “AS”) bizdä master provokaţiya hem falsifikaţiya yapmaa.

Bizä geçärkan (1990-1994) vardı u zamanda da provokatorlar iki halkın arasında (Moldova-Gagauziya) problema yapmaa. Siz ona (başkana – nışan “AS”) bakmayınız, o nasıl geldi, ölä da gidecek.

Büün Türkiye çükür büük, yardım eder bizim halkımıza, bizim genç universitetımıza.

Konstantin TAUŞANCI,
Moldova deputatı (1990-1994),
Gagauziya deputatı (1991-1998),
Komrat primarı (1997-2003),
Komrat Devlet Universitetı ekonomika fakultetın dekanı

Biz 1990-cı yıllarda koyduk kuvetleri: bizim Ana Dilimiz olsun, kendi ekonomikamız olsun, koruyalım halkımızı dünnää arasında. Ama hepsi oldu geeri dooru!

“Hastalık” urdu gagauzların üstünä: ekonomika battı, kultura zoru geçirer, dilimiz kaybeler!

Bölä olur mu: Ana Dilimiz okullarda okunêr nasıl yabancı dil.

Bizim öndercilär bilerlär mı näbêrlar?

Gagauz dili yok olarsaydı – avtonomiya silinecek! bütün halk kaybelecek!

Birkaç yıl geeri buluştum bir arkadaşlan karaim milletindän. Karaim, ama kendi dilini bilmeer. Dedi: “Kim bilärdi – öldülär. Gençlär da asimiläţiya oldular. Kaybeldi halk!”

O bir tragediya!

20 yıl geçti: gagauzların gözleri kapalı, kulakları da tıkalı, giderlär kara yoldan. Neyä geldik: Gagauz avtonomiyası – Ana Dilsiz avtonomiyası oldu! Bu da büük tragediya.

Konstantin Petroviç TAUŞANCI, doctor, doţent, Komrat Devlet Universitetın dekanı