Ana Sözü » DÜNNÄ

Eni Dünnä “Equal Earth” proekțiyalı kartası kabledildi

Ana Sözü — Thu, 17 Sep 2026 06:02:27 +0000

Ceviz ayın 4-5 gecesi Birleşmiş Milletlär Kuruluşun (BMK) Baş Asambleyası kabletti “Correct the Map” (“Kartayı Düzeltin”) başlıklı rezolüțiyayı, angısına görä “Equal Earth” (“Bir takım büüklüktä Dünnä”) proekțiyasında Eni dünnä kartasına geçiler, neredä Afrika kontinentın hem başka erlerin haliz büüklük ölçüsü dooru gösterili.

Togo devleti tarafından teklif edilän hem Afrika Birlii (AU) azaları tarafından arka olan bu “Correct the Map” (“Kartayı Düzeltin”) başlıklı rezolüțiya 164 devlet tarafından oy aldı. Buna karşı tek bir devlet oy verdi – ABD (Amerika Birleşik Devletleri). Altı devlet tä ikiliktä kaldı – Estoniya, Gruziya, Litva, Moldova, Serbiya hem Ukrayna.

Birleşmiş Milletlär Kuruluşun (BMK) Baş Asambleyasının bu kararından sora, teklif ediler atılmaa Dünneyin 1569-cu yılda ortaya çıkarılan Merkator (Mercator) proekțiyasından da geçmää 2018-ci yılda hazırlanmış olan Dünneyin “Equal Earth” (“Bir takım büüklüktä Dünnä”) proekțiyasına. Ama bu karar zapa altına koymêêr navigațiyalarda kullanılan Merkator (Mercator) proekțiyalı kartaları.

Moldova dışişleri hem Evropaya integraţiya ministerlii açıkladı, ani bu konuda Moldovanın ikiliktä kalmasının sebepi – Ukrayna devletindän arka olmak, çünkü Ukrayna açıkladı, ani onnarın kimi gecici olarak kaplanan topraklarının kartograflı resimnerinin var nicä politika uurunda kullanılsın.

Ayozlu Paskellä kutluca olsun!

Ana Sözü — Sun, 20 Apr 2025 05:12:14 +0000

Çiçek ayın 20-dä Büük, Ayozlu, Pak hem Aydınnadıcı Paskellemiz nur şafkınnan dünneyä hem hepsimizin evlerinä geldi.

Ayozlu Paskellä yortumuz kutluca olsun! Hepsimizä saalık, kısmet hem bereket, uzun ömürlän selemet!

Kurtarıcı hepimizi korusun!

Hristoz dirildi! Hakına dirildi!

Türkiyenin ilk kosmonavtı kosmosa yollandı

Ana Sözü — Sat, 20 Jan 2024 09:01:54 +0000

Büük ayın 19-da Türkiye saadına görä saat 00:49-da Türkiyenin ilk kosmonavtı Alper GEZERAVCI Halklararası kosmos stanțiyasına yollandı.

Dört kişilik halklararası ekipajında er alan Alper GEZERAVCI, amerikalı Michael LOPEZ-ALEGRİAylan, italiyalı Walter VİLLADEİylän hem şvețiyalı Marcus WANDTlan bilä, bu kocmos yolculuuna NASAnın Floridadaki Kennedi Kosmos Merkezindän yollandı.

Bu ekipajın Halklararası kosmos stanțiyasına etişmesi Büük ayın 20-dä beklener.

Moskvada Referendumdan arka olma mitingı geçti (VİDEO)

Ana Sözü — Wed, 05 Feb 2014 16:37:47 +0000

Küçük ayın (fevral) 2-dä Moskvanın “1905 yılı” metro stanţiyasının yanında Gagauziyada Referendumdan arka olma mitingı geçti. Hazırladı mitingı “Rusiya gagauzların Birlii”.

Nicä bildirdi redakţiyamıza mitingı hazırlayannardan birisi çadırlı Todur TERZİ, mitingta 700 kişiya yakın insan gagauzlar, bulgarlar, moldovannar pay aldırlar.