Komrat meydanında düzennenän “Gagauz şarap yortusu – 2026” sırasına katıldı binnän insan: şarpçılar, kultura insannarı hem el zanaatları ustaları, aşırıdan musaafirlär, popazlar, politikacılar hem Gagauziya öndercileri.

Kendi musaafirliklerini göstermää deyni Gagauziyanın 18 küüyündä hem kasabalarından temsilcilär meydanda kendi aullarını hem çadırlarını erleştirdilär, sergi açtılar, sofralarını kurdular, şaraplan musaafirleri ikram ettilär.

Belliki, şarap yortusunda şarapçılar kendi malını gösterdilär hem en islää şaraplar için ödül kablettilär.

“Gagauz şarap yortusu – 2026” sırasının kultura bölümündä pay aldılar hem insannarı şennendirdilär Gagauziyanın ansamblileri, aşırıdan gelän muzıkantlar hem çalgıcılar, anılmış türkücülär hem artistlär.

Yortunun açılışında, Gagauziya kultura Upravleniyasının zaametlerinnän, Gagauziyanın uşak hem büüklär ansamblileridän 300-zä yakın artistlär gagauz halk oyunnarı fleşmobunu yaptılar.

Bu yıl, ondokuz yıl geçän “Gagauz şarap yortusu” sırasında, iki ayırıntı özellik tä oldu:

Birincisi – “Gagauz şarap yortusu – 2026” sırasına Türkiyedän seftä usta açşılar (Fatma Mesut, Ayça Özcan, Chef Reanato hem Arzu Yıldız) katıldılar, angıları türk imeklirini hazırlamakta kendi ustalıklarını gösterdilär.

İkincisi dä – yortuya aşırı sırada Gagauziya Başkannıına hem Gagauziya Halk Topluşu deputatlıına kandidatların katılmaları, angıları hepsi savaşardılar insannara yakınnııklarını hem, bal-şerbet olup, yalpaklıklarını göstermää.

Lüdmila KÜRKÇÜ 13 yaşında bir resimciyka. 2024-cü yılda başardı Komrat kasabasının Dimitriy Savastin adına uşak resimcilik şkolasınının Geogiy ANDRİEŞ pedagogun klasını, ama resimcilik uurunu ilerleder, keskinneştireräk hem incelederäk ustalıını, kavrayarak eni teknik hem biçim kavramnarını.

Şindiki dünneyin meyvası olarak, ama köklerindän kopmayan bir uşak, kendi yaratmalarında Gagauzları hem Gagauzluu, büünkü görüşlerä görä yaradıp, açıklêêr. Bu açıklamakta, “can dilini” hem alegoriyaları kullanarak, boyaların renklerinnän hem ana tarafın motivlarınnan dä becerikli oynêêr.

Bakmadaan ona, ani Lüdmila sadä 13 yaşında onun yaratmaları Gagauziyada 8 sergidä hem dünneyin 9 halklarası konkurslarında (Kişinev, Moldova; Lidițe, Çehiya; Tokio, Yaponiya; Florențiya, İtaliya; Vallahiyada İlfov județı, Romıniya; Minsk, Belarusiya; Moskva, Rusiya Federațiyası) er aldılar.

Resimciyka Lüdmila KÜRKÇÜ tarafından ilüstrațiyalar kulanıldı uşaklar için “Guguşçuk” jurnalda, “Adetlerin Șen Ötmesi” hem “hayvannar için masallarda: “Bir vakıt varmıș, bir vakıt yokmuș…” kiyatlarında.

Körpä resimciyka için 2026-cı yıl tanımak hem ödüllär tarafından pek bereketli oldu. Kişinevda olan hem 5 devlettän 400 genç resimcinin pay alan “Da Vinçi” Resimcilik incäzanaatında Halklararası konkursta (16.05.2026) 13-18 yaşlar arasında resimcilerin “Jivopis” kategoriyasında Lüdmilanın resimi “Resimcilik ödülü” diplomunu kabletti.

2026-cı yılın Kirez ayın 12-13 günnerindä İtaliyanın Florențiya kasabasında olan uşaklar arasında Resimcilik incäzanaatında Halklararası konkursta, onun “Altın tohumnar / Golden Grains” resimi, 10-13 yaşta resimcilerin arasında I-ci eri aldı. Söz gelişi bu konkurs türlü devletlerdä “WE ARE THE WORLD Events” Asoțiațiyası (Parij, Franțiya) tarafından yapılêr. Florențiyada ensedii için, Lüdmila KÜRKÇÜ buyur edildi 2026-cı yılın Kırım ayın 21-dä Parijda geçecek her yılkı konkursa.

Lüdmila KÜRKÇÜ “Altın tohumnar / Golden Grains” resiminnän katıldı Romıniyanın İlfov județında 2026-cı yılın Harman ayın 3-7 günnerindä olan 7-ci “Festival 4 Arts / Festivalul de Arte” Vizual incäzanaatı Halklararası konkursuna, neredä 11-13 yaşlar arasında resimcilerin arasında “Jivopis” kategoriyasında I-ci eri aldı.

Nicä bildirerlär cümne aalarında, bu iş yapıldı o üzerä, ani insannarın hem eni gelän evlatboyların cümne paalılıklarını dooru yola koymaa: ön plana çekmää saygıyı onnara, kim mediținayı, bilim paalılıklarını, tehnologiyaları hem kosmonavtikayı ilerleder.

Malların erinä ekrannara eni ideyayı sürerlär: bilim başarılarında, şennik industriyası gibi, üüsek kultura statusuna uygun haklar var.

“SESSİZ DUA” katalogun prezentațiyasında pay aldılar kultura insannarı, muzeycilär hem, belliki, Gagauziyada izmet edän popazların çoyu.

Bu aydın sırada selämnama prezentațiyada bulunannara danıştı Gagauziya kultura Upravleniyasının başı Marina SEMÖNOVA, angısı kısadan annattı bu gözäl katalogun hazırlanması hem dünneyä gelmesi sebepleri için.

Selämnama hem kutlama sözlerinnän insannara danıştı Çadırın episkopu Vladıka NİKOLAY. Canabisi şükür etti Gagauziya kultura Upravleniyasına hem hepsinä, kim pay aldı bu aydın yaratmanın hazırlanmasında hem tiparlanmasında, urgulayarak, ani kendi sözünnän bu aydın kiyadı hayırladı Kaul hem Komrat episkopu ANATOLİY. Sonunda Vladıka NİKOLAY baaşladı Komrat regional istoriya hem tarafı aaraştırmak muzeyinä 11 kiyada toplu 9 tomnuk bir yaratmayı – «История Русской церкви», ani hazırlanmış hem tiparlanmış Moskva kasabasının kurulmasının 850-ci yılına.

Hep selämnama hem kutlama sözünnän tanıtıma gelän insannara danıştı anılmış gagauz yazıcısı hem aaraştırmacısı, akademik Todur ZANET, urgulayıp bu ayozlu “SESSİZ DUA” katalogun gagauzların kulturasında hem din korumasında önemni olduunu. Sozün sonunda Canabisi baaşladı Kaul hem Komrat Eparhiyanın bibliotekasına kendisinin eni çıkan hem dört dildä tiparlanan “Aya Mariya” kiyadını, neredä annadılêr gagauzların kendi dininä kaavi inannarı hem insannıkları.

Gagauziya Başkannıı tarafından selämnama nasaatı söledi Gagauziya Başkanın hem Gagauziya İspolkomun işlerinä bakan Upravleniya başın yardımcısı Vitaliy DEREVENKO.

Katalogun hazırlanması hem muzeylär zenginniklerin korunması için kısa dokladlarında annattılar Gagauziya kultura Upravleniyasının zaametçiykası İrina SARI hem Ütülü küüyün istoriya hem tarafı aaraştırma muzeyin direktoru Sofiya PANÇEVA.

“SESSİZ DUA” katalogun tanıtım havasını aydınnattılar Çadır Hristozun duuması Klisesinin uşak horun türküleri hem gagauz artistlerin İvan JELEZNIY, İvan BABOV, İlya KÖSÄ, Artöm YIVARLAK hem Ruslan DRAGU tarafından çalınan din hem ruh türküleri.

Tanıtma sıranın sonunda bu proektta pay alannara hem yardımcı olan muzeylerä hem kliselerä verildi Gagauziya kultura Upravleniyasının “Şükür” yazıları.

TİKA Başkan yardımcısı Yahya COŞKUNu hem onunnan barabar lițeyä gelän Komrat Türkiye Respublikasının Başkonsulu Eda GÜÇü üürencilär, Gagauz Millli Gimnanın avtoru Akademik Todur ZANET, lițeyin direktoru Marina ÇEBANOVA hem lițeyin administrațiyası tarafından tuz-ekmeklän hem çiçeklän karşılandılar hem, musaafirlär içeri buyurulduu zaman, onnara deyni sefa süreräk, “Altın çöşmä” uşak oyun ansablisinin oyuncuları bir gagauz halk havasına görä oyununan şennik yaptılar. Oyuncularlan ortak patrettän sora, Akademik Todur ZANET hem lițeyin direktoru Marina ÇEBANOVA buyur ettilär paalı musaafirlär üüredicilik kuruluşunnan tanışsınnar.

İlkin TİKA Başkan yardımcısı Yahya COŞKUN, Başkonsul Eda GÜÇ hem Canabilerin yanında bulunan TİKA Kişinev ofisin koordinatoru Murat ZELAN buyur edildilär tanışsınnar lițeyinä TİKA tarafından yapılan hem başarılan büük bir Proektın işlemesinnän – fizika, himiya hem biologiya Tehnoklas inovațiya klasların çalışmasınnan. Burada Canabilerin kolayı oldu himiyada bir urokta, üürencilärlän hem üürediciylän lafetsinnär hem, belli ki, uşakların hem üüredicilerin saygıylan sölenän şükür sözlerini işitsinnär.

TİKA Başkan yardımcısı Yahya COŞKUNun muzeylerä hem muzeycilää sıcak duygularını bileräk, Canabisinä lițeyin muzeyi dä gösterildi. TİKA Başkan yardımcısı muzeyin yanında bulunan sport zalına da giridi hem burada voleybolcuların trenirovkasına siiretti.

Lițeylän tanışmaktan sora, hepsi buyur edildi bir çay-kıırma-döşemä sofrasına, neredä TİKA Başkan yardımcısı Yahya COŞKUN, açıklayarak kendisini TİKAda Orta-Dou, Balkannar hem Dou Avrupa alannarında kalkınma, saalık, üüredicilik hem kultura işbirlii proektlarından cuvapçı olduunu hem onnara koordinatorluk etmesini, annattı bu alannarda TİKAnın çalışmalarını, can acısınnan Siriyanın durumunu hem Gazada musumannarın soy kırımını belerteräk.

Yahya COŞKUN açıkldı, ani büünkü gündä TİKAnın çalışmaları 170 devlettä yapılêr hem, neredäysä, bütün dünneyi kaplêêr. Canabisi urguladı, ani bu çalışmalar Moldovada hem Gagauziyada da durgunmayaceklar hem ilerleyeceklär. Burada proektların arasında en önemnisi da gelän yıla Gagauziyada “Recep Tayyip ERDOĞAN” industriya kolecın açılması, angısına büük umutlan beklener Türkiye Prezidentı Recep Tayyip ERDOĞANın da katılması.

Kendi tarafından Gagauz Milli Gimnanın avtoru Akademik Todur ZANET, TİKAnın Gagauziyada yaptıı herbir uurda, başlayıp üüredicilik hem terbiedicilik proektlarından taa saalık, üüredicilik, ekonomika, kultura hem cümne kalkınma proektlarına kadar, saygıylan şükür etti Türkiye Respublikasının öndercilerinä hem TİKAnın Başkannarına, kurulmasından bu günädän onnarın adlarını anarak: Umut ARIKa,  Orhan GÜVENENä, Öner KABASAKALa, Hakan FİDANa, Musa KULAKLIKAYAya, Serdar ÇAMa, Serkan KAYALARa, Abdullah ERENä. Ayırıca saa ol dedi eski TİKA Başkan Yardımcısına Dr. Mahmut ÇEVİKä, ani Balkannar hem Dou Avrupa iş birlii proektları koordinațiyalarını yaptıı zaman, Gagauziyada hem Moldovada proektları da ön planda tuttu.

Bu şükür sözlerindän sora, Todur ZANET umut etti, ani ileri dooru da bu yardım proektların sinciri kopmaz, ama taa da kaavileşir hem genişlenir.

Buluşmanın sonunda Todur ZANET baaşladı Yahya COŞKUNa TİKA yardımınnan hazırlanan 6 tomnuk “Büük Gagauzça-Rusça Sözlük” takımını, kendi literatura hem bilim kiyatlarını, angılarının çoyu hep TİKA yardımınnan tiparlandı, hem da sükür etti herbir iştä hem eni proektlarda arka olmaları için.

Lițeyin direktoru Marina ÇEBANOVA da baaşladı üüsek musaafirlerä lițeyin emblemasını taşıyan ödülleri.

Aylä patretlerindän sora, lițeyin o günkü üüsek musaafirleri TİKA Başkan yardımcısı Yahya COŞKUN, Başkonsul Eda GÜÇ hem TİKA Kişinev ofisin koordinatoru Murat ZELAN saygıylan yola uurlandılar.

Bu yıl da, Canavar ayın 10-da Çadır kasabasının “Enseyiş” parkında yapıldı Gagauziyanın Halk Ustaları Birliinin V-ci “Fenks” (“Devlet kuşu”) zanaatlar Festivali.

Nicä açıkladı “Ana Sözü” redakțiyasına Gagauziyanın Halk Ustaları Birliin başı Nikolay KROİTOR, V-ci “Fenks” (“Devlet kuşu”) zanaatlar Festivali, Gagauziya kultura Upravleniyasının hem Çadır primariyasının yardımınnan, hazırladı onnarın Birlii.

Festivaldä pay aldılar Gagauziyadan hem Moldovadan halk ustaları, angıları, zaametleri için, Gagauziya kultura Upravleniyasının hem Gagauziyanın Halk Ustaları Birliinin Diplomnarınnan ödüllendilär.

“Gagauz masalları: masaldan masala” 2-ci kiyadını, nicä dä bıldır çıkan “Gagauz masalları: masaldan masala” 1-ci kiyadını (https://anasozu.com/gagauz-masallari-masaldan-masala-taa-boyaya-kokan-taaza-kiyat/), hazırladı türkolog, aaraştırmacı, folklorcu, yazıcı, poet, Akademik Todur ZANET hem bu kiyat tiparlandı Gagauziya kultura Upravleniyasının zaametlerinnän, “Gagauz dilinin kullanmak sferasının genişledilmesi için” Zakonunu ömürä geçirilmesi çerçevesindä.

Büük hodulluklan urgulêêrız, ani bu topluma girän 62 masalı resimnemää deyni, kiyadın hazırlanmasında pay aldılar Çadır kasabasının Dimitriy Erebakan adına hem Valkaneş kasabasının uşak resimcilik şkolaların hem da Çeşmä küüyün yaradıcılık evin üürencileri, angıları, kendi üüredicilerinnän bilä, geldilär bu kiyadın tanıdılmasına. Kiyatta uşakların 47 resimi kullanıldı.

Tanıdılma sırasını götürdü Gagauziyanın anılmış incäzanaat insanı hem artistkası Elena DANACI hem başladı o Çadırdakı “Dionis TANASOGLU” gagauz Milli teatrusunun bu kiyada girän “Tilkiylän kirpi” masalın gösterisindän.

Sora toplumun avtoru Akademik Todur ZANET annattı bu kiyadın duuması için, şükür ederäk Gagauziya kultura Upravleniyasının başı Marina SEMÖNOVAya o fikir hem teklif için, ani kiyatta masalları uşak resimcilik şkolaların üürencilerinin resimnerinnän donaklamaa hem saa ol deyeräk hepsi bu şkolaların öndercilerinä, üüredicilerinä hem  üürencilerinä proekta pay almaları için.

Sırada kutlama sözünnän avtora hem hepsinä, kim zaametini koydu masallar kiyadın çıkması için, o insannarın arasında kiyadın düzeldicisinä (korektoruna) Natalya KİVELä hem kiyadın mizanpajını hem kabın dizaynasını yapan Marina DİMİTRİUya, şükür ederäk hem danışarak, Gagauziya kultura Upravleniyasının başı Marina SEMÖNOVA dedi “Bän inanêrım, ani bu kiyat yardım edecek unutmamaa, kimiz biz, neredän geldik hem ne iş için lääzım koruyalım kendi istoriyamızı”.

Kutlama hem selemnama sözlerinnän sțenadan nasaat ettilär: Çadır muniţipiyasının primarı Anatoliy TOPAL, Çadır kasabasının Dimitriy Erebakan adına uşak resimcilik şkolasının başı Natalya VORNİKOVA, Valkaneş kasabasının uşak resimcilik şkolasının başı Lüdmila ONOFREY, Çeşmä küüyün uşak yaradıcılık evin başı Elena DARADUR, Kongaz Todur Zanet adına teoretik lițeyin direktoru Marina ÇEBANOVA.

Tanıdılma sıranın bitkisindä, “Gagauz masalları: masaldan masala” 2-ci kiyadı proektında pay almaları için, hepsi katılannara Gagauziya kultura Upravleniyasının Diplomnarı verildi hem bu gözäl kiyat baaşladı hem toplumun avtoru Canabilerinä onnarı imzaladı. Eridir bu genç resimcilerin adlarını okuyculara açıklamaa:

Çadır kasabasının Dmitri Erebakan adına uşak resimcilik şkolasından – Kseniya ARNAUT, Vladimir BALOV, Pötr DANÇ, Anastasiya GUBOGLO, Anastasiya KARAPİRÄ, Anastasiya KOJOKAR, Darya KOL, Mariya KONSTANTİNOVA, Tatyana KURUDİMOVA, Kseniya PAMUJAK, Valeriya PENİ hem Anna RADİŞ. Üüredicilär – Elena DULEVA, Lidiya PAPÄN hem Natalya VORNIKOVA.

Valkaneş kasabasının uşak resimcilik şkolasından – Darya ANGELOVA, Angelina DOŢU, Valentina FONARÖVA, Albina KARANFİL, Êmma KARANFİL, Aleksiya KIŞLALI, Diana KİREZİ, Arina KİSAKOVA, Svetlana MADJAR, Margarita MİTİŞ, Olga MOLDOVAN, Alöna POPOZOGLU, Darya RADKOVA, Anna SELEMET, Taisiya SELEMET, Taisiya STEFOGLO hem Marina UZUN. Üüredicilär – Lübov BRUMM, İrina GOGOY hem Alöna UZUN.

Çeşmä küüyün uşak yaradıcılık evindän – Anastasiya ANGELOGLU, Kristina BORDEY, Azaliya DARADUR, Maksim KARASENI, Anna KASAP, Nikoleta KOLESNIKOVA, Margarita MADJAR, Angelina MALÇEVA, Viktoriya PETIŞ, Melisa SARGEOLÜ, Darya STOYANOVA, Anastasiya VORNIKOVA, Deniz YANUL hem Sevda-Anna YANUL. Üüredicilär – Svetlana ANGELOGLU, Elena JEKOVA, Olga KARASENI hem Dmitriy YANUL.

Taa çok haberlär burada: https://www.facebook.com/share/p/1CbV67JTdG/ hem https://www.facebook.com/kultura.ge/

Candan-ürektän kutlêêrız Canabisini bu gözäl yıldönümünnän. Saalık hem uzun ömür sizä, Dimitriy Födoroviç! Allaa versin sizä taa çok kuvet bu paalı hem zengin yaradıcılık yolunda!

Ko günneriniz uzasın hem pek faydalı geçsin!

Saalık Allaa versin!

Saygılarımızlan, “Ana Sözü” redakțiyası.

“Gagauz çotrası” erleştirildi V. Lenin pamätniinin yakınnarında, Gagauziya Başkannıı hem Komrat Kultura Evi binaların arasında.

Önemni o, ani gagauz simvollundan kaarä “Gagauz çotrası” içindä taşıyêr Gagauziya kasabalarının hem küülerinin kultura varlıkları, muzeyleri hem turistika yolları için bilgileri. Hepsi bu bilgilär, çotranın ortasında erleştirilmiş LED-ekranında peydalanêr.

“Gagauz çotrası” turistika obyektın açılış programasında gagauz artistleri kısa bir şennik yaptılar.

Gagauziyayı bu önemni kultura sırasında temsil ettilär Gagauziya kultura Upravleniyasının başı Marina SEMÖNOVA, Gagauziya Mariya Maruneviç adına Bilim-aaraştırma merkezin direktoru İrina KONSTANTİNOVA, Gagauziyanın terizma hem şarap ofisi hem Moldova Respublikasının kıymetli kolektivı – Gagauziyanın “Düz Ava” örnekli türkü hem oyun halk ansamblisi.

Universitetın “Itri” Kongres he Kultura Merkezindä olan “VIII-ci Halklararası Türk Dünnäsı Turizma Kongresi”n ofițial açılışında, başka protokol nasaatçıların arasında, söz tuttu Gagauziya kultura Upravleniyasının başı Marina SEMÖNOVA da.

Kongresin “Türk dünnäsında turizma hem gelişmä” temalı meydanına kendi “Türk dünnäsı memleketleri arasında işbirliinin gelişmesi çerçevesindä Gagauziyada turizma hem gelişmä” dokladınnan katıldı Gagauziya Mariya Maruneviç adına Bilim-aaraştırma merkezin direktoru İrina KONSTANTİNOVA.

Kongresin başka meydanında Gagauziya kultura Upravleniyası, Gagauziyanın terizma hem şarap ofisinnän barabar, hazırladılar Gagauziyanın turizma stendını, angısında sösterildi hem annadıldı Gagauziyanın turizma uurunda kolaylıkları, başlayıp kultura varlıından taa etno hem imeklärlän içkilärlän tanışmaklar.

Bundan kaarä, Moldova Respublikasının kıymetli kolektivı – Gagauziyanın “Düz Ava” örnekli türkü hem oyun halk ansamblisi, üç konțert gösterip, tanıştırdılar insannarı gagauzların muzıka hem oyun adetlerinnän.