TİKA Başkan yardımcısı Yahya COŞKUNu hem onunnan barabar lițeyä gelän Komrat Türkiye Respublikasının Başkonsulu Eda GÜÇü üürencilär, Gagauz Millli Gimnanın avtoru Akademik Todur ZANET, lițeyin direktoru Marina ÇEBANOVA hem lițeyin administrațiyası tarafından tuz-ekmeklän hem çiçeklän karşılandılar hem, musaafirlär içeri buyurulduu zaman, onnara deyni sefa süreräk, “Altın çöşmä” uşak oyun ansablisinin oyuncuları bir gagauz halk havasına görä oyununan şennik yaptılar. Oyuncularlan ortak patrettän sora, Akademik Todur ZANET hem lițeyin direktoru Marina ÇEBANOVA buyur ettilär paalı musaafirlär üüredicilik kuruluşunnan tanışsınnar.

İlkin TİKA Başkan yardımcısı Yahya COŞKUN, Başkonsul Eda GÜÇ hem Canabilerin yanında bulunan TİKA Kişinev ofisin koordinatoru Murat ZELAN buyur edildilär tanışsınnar lițeyinä TİKA tarafından yapılan hem başarılan büük bir Proektın işlemesinnän – fizika, himiya hem biologiya Tehnoklas inovațiya klasların çalışmasınnan. Burada Canabilerin kolayı oldu himiyada bir urokta, üürencilärlän hem üürediciylän lafetsinnär hem, belli ki, uşakların hem üüredicilerin saygıylan sölenän şükür sözlerini işitsinnär.

TİKA Başkan yardımcısı Yahya COŞKUNun muzeylerä hem muzeycilää sıcak duygularını bileräk, Canabisinä lițeyin muzeyi dä gösterildi. TİKA Başkan yardımcısı muzeyin yanında bulunan sport zalına da giridi hem burada voleybolcuların trenirovkasına siiretti.

Lițeylän tanışmaktan sora, hepsi buyur edildi bir çay-kıırma-döşemä sofrasına, neredä TİKA Başkan yardımcısı Yahya COŞKUN, açıklayarak kendisini TİKAda Orta-Dou, Balkannar hem Dou Avrupa alannarında kalkınma, saalık, üüredicilik hem kultura işbirlii proektlarından cuvapçı olduunu hem onnara koordinatorluk etmesini, annattı bu alannarda TİKAnın çalışmalarını, can acısınnan Siriyanın durumunu hem Gazada musumannarın soy kırımını belerteräk.

Yahya COŞKUN açıkldı, ani büünkü gündä TİKAnın çalışmaları 170 devlettä yapılêr hem, neredäysä, bütün dünneyi kaplêêr. Canabisi urguladı, ani bu çalışmalar Moldovada hem Gagauziyada da durgunmayaceklar hem ilerleyeceklär. Burada proektların arasında en önemnisi da gelän yıla Gagauziyada “Recep Tayyip ERDOĞAN” industriya kolecın açılması, angısına büük umutlan beklener Türkiye Prezidentı Recep Tayyip ERDOĞANın da katılması.

Kendi tarafından Gagauz Milli Gimnanın avtoru Akademik Todur ZANET, TİKAnın Gagauziyada yaptıı herbir uurda, başlayıp üüredicilik hem terbiedicilik proektlarından taa saalık, üüredicilik, ekonomika, kultura hem cümne kalkınma proektlarına kadar, saygıylan şükür etti Türkiye Respublikasının öndercilerinä hem TİKAnın Başkannarına, kurulmasından bu günädän onnarın adlarını anarak: Umut ARIKa,  Orhan GÜVENENä, Öner KABASAKALa, Hakan FİDANa, Musa KULAKLIKAYAya, Serdar ÇAMa, Serkan KAYALARa, Abdullah ERENä. Ayırıca saa ol dedi eski TİKA Başkan Yardımcısına Dr. Mahmut ÇEVİKä, ani Balkannar hem Dou Avrupa iş birlii proektları koordinațiyalarını yaptıı zaman, Gagauziyada hem Moldovada proektları da ön planda tuttu.

Bu şükür sözlerindän sora, Todur ZANET umut etti, ani ileri dooru da bu yardım proektların sinciri kopmaz, ama taa da kaavileşir hem genişlenir.

Buluşmanın sonunda Todur ZANET baaşladı Yahya COŞKUNa TİKA yardımınnan hazırlanan 6 tomnuk “Büük Gagauzça-Rusça Sözlük” takımını, kendi literatura hem bilim kiyatlarını, angılarının çoyu hep TİKA yardımınnan tiparlandı, hem da sükür etti herbir iştä hem eni proektlarda arka olmaları için.

Lițeyin direktoru Marina ÇEBANOVA da baaşladı üüsek musaafirlerä lițeyin emblemasını taşıyan ödülleri.

Aylä patretlerindän sora, lițeyin o günkü üüsek musaafirleri TİKA Başkan yardımcısı Yahya COŞKUN, Başkonsul Eda GÜÇ hem TİKA Kişinev ofisin koordinatoru Murat ZELAN saygıylan yola uurlandılar.

Bu yıl da, Canavar ayın 10-da Çadır kasabasının “Enseyiş” parkında yapıldı Gagauziyanın Halk Ustaları Birliinin V-ci “Fenks” (“Devlet kuşu”) zanaatlar Festivali.

Nicä açıkladı “Ana Sözü” redakțiyasına Gagauziyanın Halk Ustaları Birliin başı Nikolay KROİTOR, V-ci “Fenks” (“Devlet kuşu”) zanaatlar Festivali, Gagauziya kultura Upravleniyasının hem Çadır primariyasının yardımınnan, hazırladı onnarın Birlii.

Festivaldä pay aldılar Gagauziyadan hem Moldovadan halk ustaları, angıları, zaametleri için, Gagauziya kultura Upravleniyasının hem Gagauziyanın Halk Ustaları Birliinin Diplomnarınnan ödüllendilär.

“Gagauz masalları: masaldan masala” 2-ci kiyadını, nicä dä bıldır çıkan “Gagauz masalları: masaldan masala” 1-ci kiyadını (https://anasozu.com/gagauz-masallari-masaldan-masala-taa-boyaya-kokan-taaza-kiyat/), hazırladı türkolog, aaraştırmacı, folklorcu, yazıcı, poet, Akademik Todur ZANET hem bu kiyat tiparlandı Gagauziya kultura Upravleniyasının zaametlerinnän, “Gagauz dilinin kullanmak sferasının genişledilmesi için” Zakonunu ömürä geçirilmesi çerçevesindä.

Büük hodulluklan urgulêêrız, ani bu topluma girän 62 masalı resimnemää deyni, kiyadın hazırlanmasında pay aldılar Çadır kasabasının Dimitriy Erebakan adına hem Valkaneş kasabasının uşak resimcilik şkolaların hem da Çeşmä küüyün yaradıcılık evin üürencileri, angıları, kendi üüredicilerinnän bilä, geldilär bu kiyadın tanıdılmasına. Kiyatta uşakların 47 resimi kullanıldı.

Tanıdılma sırasını götürdü Gagauziyanın anılmış incäzanaat insanı hem artistkası Elena DANACI hem başladı o Çadırdakı “Dionis TANASOGLU” gagauz Milli teatrusunun bu kiyada girän “Tilkiylän kirpi” masalın gösterisindän.

Sora toplumun avtoru Akademik Todur ZANET annattı bu kiyadın duuması için, şükür ederäk Gagauziya kultura Upravleniyasının başı Marina SEMÖNOVAya o fikir hem teklif için, ani kiyatta masalları uşak resimcilik şkolaların üürencilerinin resimnerinnän donaklamaa hem saa ol deyeräk hepsi bu şkolaların öndercilerinä, üüredicilerinä hem  üürencilerinä proekta pay almaları için.

Sırada kutlama sözünnän avtora hem hepsinä, kim zaametini koydu masallar kiyadın çıkması için, o insannarın arasında kiyadın düzeldicisinä (korektoruna) Natalya KİVELä hem kiyadın mizanpajını hem kabın dizaynasını yapan Marina DİMİTRİUya, şükür ederäk hem danışarak, Gagauziya kultura Upravleniyasının başı Marina SEMÖNOVA dedi “Bän inanêrım, ani bu kiyat yardım edecek unutmamaa, kimiz biz, neredän geldik hem ne iş için lääzım koruyalım kendi istoriyamızı”.

Kutlama hem selemnama sözlerinnän sțenadan nasaat ettilär: Çadır muniţipiyasının primarı Anatoliy TOPAL, Çadır kasabasının Dimitriy Erebakan adına uşak resimcilik şkolasının başı Natalya VORNİKOVA, Valkaneş kasabasının uşak resimcilik şkolasının başı Lüdmila ONOFREY, Çeşmä küüyün uşak yaradıcılık evin başı Elena DARADUR, Kongaz Todur Zanet adına teoretik lițeyin direktoru Marina ÇEBANOVA.

Tanıdılma sıranın bitkisindä, “Gagauz masalları: masaldan masala” 2-ci kiyadı proektında pay almaları için, hepsi katılannara Gagauziya kultura Upravleniyasının Diplomnarı verildi hem bu gözäl kiyat baaşladı hem toplumun avtoru Canabilerinä onnarı imzaladı. Eridir bu genç resimcilerin adlarını okuyculara açıklamaa:

Çadır kasabasının Dmitri Erebakan adına uşak resimcilik şkolasından – Kseniya ARNAUT, Vladimir BALOV, Pötr DANÇ, Anastasiya GUBOGLO, Anastasiya KARAPİRÄ, Anastasiya KOJOKAR, Darya KOL, Mariya KONSTANTİNOVA, Tatyana KURUDİMOVA, Kseniya PAMUJAK, Valeriya PENİ hem Anna RADİŞ. Üüredicilär – Elena DULEVA, Lidiya PAPÄN hem Natalya VORNIKOVA.

Valkaneş kasabasının uşak resimcilik şkolasından – Darya ANGELOVA, Angelina DOŢU, Valentina FONARÖVA, Albina KARANFİL, Êmma KARANFİL, Aleksiya KIŞLALI, Diana KİREZİ, Arina KİSAKOVA, Svetlana MADJAR, Margarita MİTİŞ, Olga MOLDOVAN, Alöna POPOZOGLU, Darya RADKOVA, Anna SELEMET, Taisiya SELEMET, Taisiya STEFOGLO hem Marina UZUN. Üüredicilär – Lübov BRUMM, İrina GOGOY hem Alöna UZUN.

Çeşmä küüyün uşak yaradıcılık evindän – Anastasiya ANGELOGLU, Kristina BORDEY, Azaliya DARADUR, Maksim KARASENI, Anna KASAP, Nikoleta KOLESNIKOVA, Margarita MADJAR, Angelina MALÇEVA, Viktoriya PETIŞ, Melisa SARGEOLÜ, Darya STOYANOVA, Anastasiya VORNIKOVA, Deniz YANUL hem Sevda-Anna YANUL. Üüredicilär – Svetlana ANGELOGLU, Elena JEKOVA, Olga KARASENI hem Dmitriy YANUL.

Taa çok haberlär burada: https://www.facebook.com/share/p/1CbV67JTdG/ hem https://www.facebook.com/kultura.ge/

Candan-ürektän kutlêêrız Canabisini bu gözäl yıldönümünnän. Saalık hem uzun ömür sizä, Dimitriy Födoroviç! Allaa versin sizä taa çok kuvet bu paalı hem zengin yaradıcılık yolunda!

Ko günneriniz uzasın hem pek faydalı geçsin!

Saalık Allaa versin!

Saygılarımızlan, “Ana Sözü” redakțiyası.

“Gagauz çotrası” erleştirildi V. Lenin pamätniinin yakınnarında, Gagauziya Başkannıı hem Komrat Kultura Evi binaların arasında.

Önemni o, ani gagauz simvollundan kaarä “Gagauz çotrası” içindä taşıyêr Gagauziya kasabalarının hem küülerinin kultura varlıkları, muzeyleri hem turistika yolları için bilgileri. Hepsi bu bilgilär, çotranın ortasında erleştirilmiş LED-ekranında peydalanêr.

“Gagauz çotrası” turistika obyektın açılış programasında gagauz artistleri kısa bir şennik yaptılar.

Gagauziyayı bu önemni kultura sırasında temsil ettilär Gagauziya kultura Upravleniyasının başı Marina SEMÖNOVA, Gagauziya Mariya Maruneviç adına Bilim-aaraştırma merkezin direktoru İrina KONSTANTİNOVA, Gagauziyanın terizma hem şarap ofisi hem Moldova Respublikasının kıymetli kolektivı – Gagauziyanın “Düz Ava” örnekli türkü hem oyun halk ansamblisi.

Universitetın “Itri” Kongres he Kultura Merkezindä olan “VIII-ci Halklararası Türk Dünnäsı Turizma Kongresi”n ofițial açılışında, başka protokol nasaatçıların arasında, söz tuttu Gagauziya kultura Upravleniyasının başı Marina SEMÖNOVA da.

Kongresin “Türk dünnäsında turizma hem gelişmä” temalı meydanına kendi “Türk dünnäsı memleketleri arasında işbirliinin gelişmesi çerçevesindä Gagauziyada turizma hem gelişmä” dokladınnan katıldı Gagauziya Mariya Maruneviç adına Bilim-aaraştırma merkezin direktoru İrina KONSTANTİNOVA.

Kongresin başka meydanında Gagauziya kultura Upravleniyası, Gagauziyanın terizma hem şarap ofisinnän barabar, hazırladılar Gagauziyanın turizma stendını, angısında sösterildi hem annadıldı Gagauziyanın turizma uurunda kolaylıkları, başlayıp kultura varlıından taa etno hem imeklärlän içkilärlän tanışmaklar.

Bundan kaarä, Moldova Respublikasının kıymetli kolektivı – Gagauziyanın “Düz Ava” örnekli türkü hem oyun halk ansamblisi, üç konțert gösterip, tanıştırdılar insannarı gagauzların muzıka hem oyun adetlerinnän.

Şkolanın yıldönümünnän ilgili kutlama sırasına buyur edildilär şkolanın pedagogları hem veterannarı, şkolayı başarannar hem onnarın analar-bobaları.

Önemni yıldönümünnän Valkaneş kasabasının uşak muzıka şkolasını hem onun kolektivını kutladılar Gagauziya kultura Upravleniyasının başı Marina SEMÖNOVA hem Valkaneş rayon administrațiyasının başı İvan KREȚU, Valkaneş kasabasının primariyası hem Valkaneş Sergey Rudenko adına gimnaziyası.

Bu yortulu gündä muzıka şkolasının üüredicileri Elena GERMEK, Dmitriy LİKA, Tatyana TOPORAŞ hem şkolanın vıpusknikleri Pötr TERZİ hem Aleksandr VASİLYEV Gagauziya kultura Upravleniyasının gramotalarını kablettilär.

Başarıldı yıldönümü kutlaması büük bir konțert programasınnan, angısında pay aldılar şkolanın fortepyano, kemençä, fleyta, akkordion bölümnerindä üürenän üürencilär hem onnarın üüredicileri.

O günü kendi muzıka baaşışlarınnan bu yıldönümünä geldilär Çadır, Çeşmä küüyü hem Komrat uşak muzıka şkolalarından muzıkacılar da.

Açtı sırayı Pötr Draganov adına Merkez bibliotekasının direktoru Marina NEDÄLKOVA, angısı kendi sözündä kısadan annattı bibliotekanın 1946-cı yılda kurulmasından büünkü günädän çalışmalarını hem bir küçük bibliotakadan Gagauziyanın Merkez bibliotekasınadan kalkınmasını.

Sora kutlama nasaatlarınnan danıştılar: Gagauziya kultura Upravleniyasının başı Marina SEMÖNOVA, Gagauziya İspolkomu Predsedatelin hem Gagauziya Başkanın yardımcısı İlya UZUN, Moldova Milli bibliotekasının zaametçiykası Ekaterina DİMİTRİK, 1970-ci yıllarda Komrat rayonun kultura bölümünün başı Klavdiya BALABAN, Komrat kasaba Sovetin azası Valeriy KISSA, yazıcı hem poet, Akademik Todur ZANET, yazıcılar Stepan BULGAR hem Konstantin KURDOGU.

Bu yıldönümünnän ilgili olarak, yortulu sırada Gagauziya kultura Upravleniyasının diplomalarınnan ödüllendilär: Pötr Draganov adına Merkez bibliotekasının direktoru Marina NEDÄLKOVA, biblioteka bölümü başı Tatyana KİRİYAK, baş bibliotekacıyka Evgeniya LÜLENOVA, bibliotekacıykalar – Vera SİBOVA, Elena SUSAN, Nadejda TOPAL hem Vasilisa VORNİKOGLU.

Kutlama yortusunda üürencilär okudular Mihay EMİNESKUnun, Dimitri KARAÇOBANın, Vladimir MAYAKOVSKİYyin hem Marina ȚVETAEVAnın yaratmalarını. Ayırıca uşaklar tarafından muzaka kutlamaları da oldu. Üürenciyka Olga GAYDARCI çaldı “Bucak” adlı türküyü. Üürediciyka İrina MELKAN önderciliindä Komrat Yaratmak Evin kolektivı da iki nomer gösterdi.

Gagauziyanın Pötr Draganov adına Merkez bibliotekasının gagauzça fondu kurulmaa başladı XX-ci asirin 50-ci yıllarda, açan 1959-cu yılda dünneyä geldi Dionis TANASOGLU tarafından hazırlanan gagauz literaturasının ilk toplumunu – “Bucaktan seslär”. Sora da, hep o asirin 60-cı yılların başında, başlayıp Nikolay BABOGLUnun kiyatlarından, bu bibliotekaya gagauz ruhu hem gagauz yazıcıların kiyatları, taa sora da arhivları, gelmää başladılar. Büünkü gündä bunnardan oluştu bibliotekanın 5 bindän zeedesi olan gagauz dilindä fondu.

Şindi Gagauziyanın Pötr Draganov adına Merkez bibliotekasının fondunda var 53 bindän çok kiyat hem türlü dokumentlär. Onnarın 3700-dän zeedesi devlet dilindä.

KURULTAY – 2026 Halklararası kultura Festivalin açılışında kutlama sözlerinnän katılannara danıştılar: Romıniya Tatar Demokrat Birlii Başkanı Naim BELGİN, Romıniya kultura Ministerliin András István DEMETER, Ankara merkezli Nogay Türkleri Dernään Genel Başkanı hem Dünnää Nogay Türklerin Birlii Başkanı Ömer AKTÜRK, TÜRKSOY muzeylär bölümü başı Barış Cavid MOVSUMLÜ hem açılışa gelän kimi Büükelçilär.

Festivalin açılış sırasından sora, taa birkaç ayırı sıra oldu: sport yarışmaları (güreş, ok atışı, at yarışı h.b.) sırası, ortak Halklararası konțertı hem halk oyunnarı, giyimneri, imekleri kufnesi sıraları.

Türk halkların kulturasını, varlıını, adetlerini, ustalıklarını, muzıkasını hem oyunnarını korunmasına baaşlanan bu Festivalä 40 devlettän zeedä insannar katıldılar. Onnarın arasında Gagauziyayı bu Kuruldayda gösterdi Kıpçak küüyün Kultura evin artistlerinin “Solovuşka” (“Bülbülcük”) ansamblisi (önderciyka – Lüdmila Songrova). Onnarın çalışmasınnan Kurultaya gelän insannarın kolayı oldu işitmää gagauz türkülerini,tanışmaa gagauzlarlan hem gagauz kulturasınnan.

Festival çerçevesindä “Turkistandan Balkannara Şiir Köprüsü” peet avşamı yapıldı, angısı için kendi terini TÜRKSOY kuruluşu da koydu. Bu peet avşamına, türk dillerin ötmesini hem zenniklerini göstermäk için, buyur edildilär dünneyin türlü köşelerdän poetlar: Ümit KÖPRÜLÜ (İrak, türkmen), Serap Alparslan ÖZDEMİR (Germaniya, kumuk), Fereshta ZİAİ (Afganistan, uzbek), İbrahim Halil ELVEREN (Ozan Berdari, Türkiye), Barış Cavid MOVSUMLÜ (Türkiye, azerbaycan türkü), Medinay BAWUDUN (ABD, uygur), Nasuf DAİL (Bulgariya, türk), Nurten REMZİ (Bulgariya, türk) hem Todur ZANET (Moldova, Gagauziya, gagauz).

En gözäl bu dostluk poeziya hem poetlar buluşması hem kaynaşması için kendi peetindä yazmış, “Turkistandan Balkannara Şiir Köprüsü” katılan, kumuk poet Serap Alparslan ÖZDEMİR:

“İzin kaldı, izin kaldı,

Geçtiin erlerdä izin kaldı.

Sizinkilär sizdä demä:

Sizdä bizim kaldı

Bizdä sizin kaldı”.

Gagauziyaya gelän TÜRKSOY muzeylär Birliin temsilcileri, onnarın vizit programasının ikinci günündä, Avdarma, Aydar, Beşalma hem Komrat muzeylerlän tanıştılar.

TÜRKSOYun adından muzeycilär delegațiyanın azaları Muharrem HAYIR – Türk hem İslam İncäzanaat Muzeyin direktoru, Bahtiyor НODJAYEV – Uzbekistan Devlet İstoriya Muzeyin “Taşkent Muzeyi” filialın direktoru hem Amina MELİKOVA – Azerbaycan Milli Kilim Muzeyin direktoru, Gagauziya kultura Upravleniyasının başı Marina SEMÖNOVAylan barabar, muzeyleri dolaşıp, gagauz halkın kultura varlıının korunmasına, istoriyasına hem adetlerinnä daldılar.