“Duygular palitrası” ilkyaz resim sergisi oluştu Gagauziyadan, Pridnestrovyedan hem Kişinevdan 30 resimciykanın çeşitli tehnikalarda (akvarel, akril, yaalı boya, batik, düümä) hem janralarda (abstrakțiya, grafika, kukla, ikona, natürmord, patret, peyzaj) yapılı 100 resimindän.

Sergiyä katılan resimciykaların herkezinä (Anna BABÜK, Natalya BADAN, Praskovya BEJENAR, Galina BURYAN, Mariya DİMOGLU, Simona FEDORENKO, Tatyana GAYDEY, Elena GORÇA, Olesä İVANOVA, Vera JEKOVA, Natalya KOJOKAR, Svetlana KOJUHAR, Margarita KOPSAK, Olga KREȚU, Yuliya KRİSTOVA, Svetlana MELNIK, Anastasiya NOVOSELOVA, İnga OREHOVA, Nina PEEVA, Oksana PONOMARENKO, Alla PRİSAKAR, Yana PROKA, Anastasiya RAKOVÇENA, Olesä ŞİBAEVA, Natalya STRASEVİÇ, Lüdmila TANASOGLU, Tatyana TETRİOGLU (KASIM), Dilnara TURSUNOVA, Natalya VORNİKOVA, Kira YAYMAN) Gagauziya kultura Upravleniyası tarafından verildi maasuz diplomnar.

Serginin açılışında katılannar için çaldılar “Elegiya” kemençecilär ansamblisi hem oollan boba Arseniy hem İvan JELEZNIY.

Sergi açık olacek Baba Marta ayın 27-dän.

25 patrettän oluşan “Halkımnan barabar” incäzanaatlı patret sergisinin açılış sırasında söz tuttular Kongaz küüyün Kultura evin direktoru Matrona HRİSTEVA, serginin avtoru Zinaida KOVALÖVA, Kongazın primarı Mihail ESİR, Gagauziyanın kultura Upravleniyasının başı Marina SEMÖNOVA, Akademik Todur ZANET hem t.b.

Matrona HRİSTEVA: “Pek sevineriz, ani büün önünüzä çıkarılan bu gözäl serginin hazırlanmasında bizim katkımız da var, çünkü Zinaida KOVALÖVAnın patretleri – bu kulturamızı, adetlerimizi hem sıralarımızı annadan yaratmalar hem onnarın bir payı”.

Zinaida KOVALÖVA, serginin avtoru: “Bu benim için diil salt bir sergi. Bu – benim ömürümün benim uşaklıımın, benim akılımın bir parçacıı. Bän duudum burada, Kongazda. Bu er, neredä bän büüdüm, neredä üürendim sevmää insannarı, şafkı, evi. Bu patretlär hepsi buradan duumalı. Gagauz kulturası bana deyni oldu nesä taa büük. Bu diil sadecä tema. Bu – o, neyi bän isteerim büün göstermää, korumaa, paylaşmaa”.

Marina SEMÖNOVA: “Okadar duygulu, derin maanalı, dalgalı, gözäl bir sergi. Etlerim tikennedi – okadar gözäl! Saa olsun Zinaida KOVALÖVA, zerä belli, ani burada diil bir günün işi, diil bir yılın da”.

Mihail ESİR: “Pek sevinerim, ani bizim küüdä var bölä pek marifetli insannar, angıları saymêêr zaametini da bakêr bizim istoriyamızı, bizim küüyün insannarını andırêr çok yıllardan sora”.

Todur ZANET: “Zinaida KOVALÖVAnın herbir patredi şıralı hem gözäl. Zinaida KOVALÖVA – bu bir poet, zerä poeziya diil salt yazılarda, poeziya olêr yaratmakta da. Bän nekadar gördüm Canabisinin patretlerini – hepsindä poeziya! Bir peeti yok nicä yazasın, herliim canın yanmazsaydı. Siz bakêrsınız patredä da görersiniz, ani o patredi yapmaa deyni, bu insanın canı yanmış hem yanêr”.

Serginin patretlär üstündän kiyat perdelerini kaldırmaa kolaylıı verildi Kongazın primarı Mihail ESİRä hem Akademik Todur ZANETä, nedän sora siiredicilerin önündä peydalandı Zinaida KOVALÖVAnın büülü incäzanaatlı patret dünnäsı hem bu patretledä daymalara kalan insannar hem o insannarın ömür kıpımnarı.

“Halkımnan barabar” serginin açılışında pay aldılar Zinaida KOVALÖVAnın yakınnarı hem dostları, Kongaz küüyün Kultura evin zaametçileri, kultura hem cümne insannarı, bibliotekacılar, Gagauziyanın kultura Upravleniyasının zaametçileri, Kongaz küüyün Todur Zanet adına teoretik lițeyin üürencileri hem üüredicileri, sıradan insannar.

III-cü “İncäzanaat sızıntısı” akıl kvest-oyununda pay aldı ikişär komanda Çadır, Komrat hem Valkaneş resimcilik şkolalarından: “Avangard” hem “Kolor-Kod” (Çadır Dimitri ERBAKAN adına uşak resimcilik şkolası), “Yaratmak kuvedi” hem “Y-22” (Komrat Dimitri SAVASTİN adına uşak resimcilik şkolası), “Resimcilär” hem “Arzular” (Valkaneş uşak resimcilik şkolası).

Akıl kvest-oyunun açılışında hepsi pay alannara selemnemä hem kutlama sözünnän danıştı Gagauziya kultura Upravleniyasının başı Marina SEMENOVA.

Bu yıl da akıl kvest-oyununda 7 rauntluk bir yarışma yapıldı: “Feyk ili Fakt” (“Feyk mı osa fakt mı”), “İzobrazi oksümoron” (“Oksümoronu resimnä”), “Muzıkalnaya jivopisi” (“Muzıka jivopisi”), “Risuem vmeste” (“Barabar resimneeriz”), “Bitva kapitanov” (“Kapitannarın düüşü”) hem “Logotip hudojestvennoy şkolı” (“Resimcilik şkolasının damgası”).

Bu rauntların herbirindä soruşlar ilgiliydilär resimcilik incäzanaatınnan, gagauz halkın istoriyasınnan, kulturasınnan, adetlerinnän hem sıralarınnan.

Meraklı hem keskin yarışmalardan sora, III-cü “İncäzanaat sızıntısı” akıl kvest-oyununda enseyän belli oldu – Komrat Dimitri SAVASTİN adına uşak resimcilik şkolasının “Y-22” komandası.

Enseyän komandaya Diploma hem Statuetka verildi. Kalan komandalara Diplomalar hem ödüllär verildi. Bundan kaarä hepsi komandalara resimcilik, incäzanaat hem folklor uurunda kiyatlar baaşlanıldı.

«GAGAUZ YERİ: история на холсте» sergisindä sergili tarafımızı hem insannarımızı annadan Gagauziya resimcilerinin 64 resimi.

Açtı sergiyi Gagauziya kultura Upravleniyasının başı Marina SEMENOVA. Nedän sora söz tuttular resimcilär hem kultura insannarı da.

Serginin açılış sonunda hepsi resimcilerä Gagauziya kultura Upravleniyası tarafından katılım Diplomnarı verildi.

Sergi 2025-ci yılın Ceviz ayın (sentäbri) 12-dän açık olacek.

Açtı tombarlak masayı Gagauziya kultura Upravleniyasının başı Marina SEMÖNOVA, angısı kendi nasaatında urguladı raametli Maestro Pötr Nikolaeviç VLAHın gagauz resimcilik kulturasının kurulmasında hem ilerlemesindä paası olmayan izmetleri.

Tombarlak masada pay alannar Pötr Nikolaeviç VLAH hem onun yaratmaları için çeşitli dokladlar hem nasaarlar tuttular.

Maestro Pötr VLAHın duumasının 80-ci yıldönümü kutlama sırasında susak donaklama uurunda ustalık klası gösterildi: hem Komrat Dimitriy Savastin resimci şkolasının hem dä Kongaz Süleyman Demirel Türk-Moldova teoretik lițeyin üürencileri susak resimnerin eskizların yaptılar.

Şindi isteeriz sölemää tombarlak sofranın “SUSAK taa dünnää kurulmasından” kanadı altı için.

Maestro Pötr Nikolaeviç VLAH, yaşarkana, gagauzlara gagauz kulturasını göstermää deyni, hazırladı hem, kendi YARATMAK MASRESKAYASINI SATIP, 2003-cü yılda tipardan çıkardı “SUSAK taa dünnää kurulmasından” adlı kiyadını, zerä ozaman Gagauz Kuturasını korumak hem ilerletmäk için kurulan Gagauziyada bu iş için para bulunmadı hem Gagauziyanın ozamankı Başkanı Dimitriy TABUNŞÇİK bir türlü bunda yardımcı olmadı.

Ama onbeş yıldan sora, Maestronun bu kiyadı genä basıldı – bu kerä Gagauziya Başkanı İrina VLAHın hem Gagauziya kultura Upravleniyasının başı Marina SEMÖNOVAnın zaametlerinnän “SUSAK taa dünnää kurulmasından” enidän tipardan çıktı.

Maestro Pötr Nikolaeviç VLAH aramızdan ayırıldı 2012-ci yılın Büük ayın 20-dä. Aşaada tiparlêêrız onun ölümünä gazetamızın nekrologunu.

Pötr Nikolaeviç VLAH (18.03.1945 – 20.01.2012)

Pötr Nikolaeviç VLAH aramızdan gitti yavaşıcık, birisinnän çekişmeyip, birisini gücendirmeyip, birisinä kötü laf sölämeyip, birisini azarlamayıp.

Fıkaaralık içindä, ama hodulluklan gitti.

Son yıllarıda o yaşadı sadä o pensiyacaa, ani çalışmasınnan kazandı. Kvartiracıı 15 yıldan zeedä yısıdılmazdı. Ona ekmää dä para etişmärdi. Sadä var nicä şaşmaa ona, nicä saburlan o dayanardı bu yoksullaa.

Yaratmaları için kiyadını çıkarmaa deyni, o sattı kendi yaratmak masterskayasını.

Pötr Nikolaeviç VLAH 1982-ci yıldan beeri Gagauz devletliin temelindä durardı. Herzaman büük politika aktivlii gösterärdi. Gagauz halkın herbir syezdında pay aldı.

O ilk Gagauz Bayraanın (Canavar Kafalı horozçuklan donaklı bayrak) avtorlarından birisi. O bayraa gagauzlar seftä kaldırdılar Komratta, sankţiyasız mitingta, 1989-cu yılın Canavar ayın 29-da.

Pötr Nikolaeviç VLAH duudu 1945-ci yılın Baba Marta ayın 18-dä Komratta.

1965-ci yılda başardı 1-ci Komrat şkolasını.

1969-da bitirdi “İ. Repin” adına Kişinev resimcilik uçilişçasını.

1970-cı yıldan beeri çeşitli erli hem halklararası sergilerdä pay aldı.

1977-ci yılda Sovetlär Birlii halk yaratmaları Festivalindä 1-ci erin Diplomunu hem laureat medalisini kabletti.

1980-ci yılda “İ. Födorov” adına Lyvov poligrafika institutun resimcilik-grafika bölümünü başardı.

1980-ci yılda Sovetlär Birlii hem Moldovanın resimcilär Birliin azası oldu.

1996-cı yılda kendi grafika hem exlibris resimnerin kiyadını çıkardı.

1997-ci yılda “Gagauziya kulturasına yardımcı akıntısı” derneeni kurdu.

1998-ci yılda Komrat devlet universitetında tipardan çıktı kiyat “П. Влах. Библиографический указатель”.

1999-cu yılda Komrat kasabasının şannı vatandaşı oldu.

2003-cü yılda tiparlandı Pötr VLAHın üç dilli (gagauzça, rusça, angliyca) kiyadı “SUSAK taa dünnää kurulmasından” («СУСАК с сотворения мира», “SUSAK from creatıng of the world”).

Kendi çalışmalarınnan Pötr Nikolaeviç VLAH kaldırdı gagauzların yaratmalarını dünnää uuruna.

Anılmış gagauz resimcisinin, raametli Maestro Pötr Nikolaeviç VLAHın (musulmannaa geçtiynän Ahmet İslam adını aldıydı) topracıın ilin olsun!

Konstantin KELEŞin “İncäzanaatın hem tabiatın dialogu” adlı sergisindä, Canabisinin yaşlarına görä, sergili 65 resim, angısınnarın taa çoyu, belliki, beygirlerin resimneri, çünkü Konstantin KELEŞ ömür boyunca kendisini beygirlerä hem beygircilää baaşladı.

Serginin açılışını yaparak, Gagauziya kultura Upravleniyasının başı Marina SEMENOVA urguladı: “Canabizinin resimneri – bu canınızın yansıması. Onnar tabiata hem onun garmoniyasına ömürlän, emoțiyalarlan hem sevdaylan dolu. Herbir çizgidä iç açıklıı duyulêr, herbir renk tonunda – sıcaklık hem aydınnık, herbir obrazda sa – içinizlän dünnäyı duymasını açıklayan derin bir maana”.

Kalan nasaat edennär dä resimci hem onun yaratmaları için sıcak laflar söledilär.

Serginin açılışında pay aldılar resimcinin yakınnarı, dostları, kultura insannarı hem başka resimcilär.

Sergi 2025-ci yılın Çiçek ayın (aprel) 30-dan açık olacek.

“XXII Halklarası Biennale Kanagawa uşak resimneri konkursu”n sonuçlarına görä belli oldu, ani Komrat “D. SAVASTİN” resimcilik şkolasının eski üürencisinin Daniil BOYKOVun “Haydutlar” resimi bu konkursta iki “Grand-pri” ödülündän birisini kazandı.

Nicä açıkladılar resimcilik şkolasının üüredicileri, bu konkursta Komrattan yaklaşık 40 uşak resimi pay aldı.

“Karı canı aynaları” resim sergisindä sergili çeşitli janralarda (abstrakțiya, grafika, natürmord, patret hem peyzaj) yapılı 103 resim. Onnarın türlü tehnikaları var: akril, akvarel, kömür, pastel hem yaalı boya.

Bu resim sergisindä kendi resimnerinnän pay alêrlar Moldova, Pridnestrovye hem Gagauziya resimciykaları:

Lüba BRUMM, Alina BULAY, Galina BURYAN, Olga DİMİTROGLU, Mariya DİMOGLU, Nadejda DYANOVA, Simona FEDORENKO, Aurika FLORÄ, Tatyana GAYDEY, Viktoriya GOROHOVA, Olesä İVANOVA, Vera JEKOVA, Diana KISSA, Natalya KOJUHAR, Svetlana KOJUHAR, Margarita KOPÇAK, Yuliya KRİSTOVA, Svetlana MELNIK, Aleksandra NOVAK, Anastasiya ORMANCI, Larisa ORMANCI, Svetlana OVSÄNNİKOVA, Oksana PONOMARENKO, Alla PRİSAKAR, Anastasiya RAKOVÇENA, Alla SALKO, Natalya STRASEVİÇ, Tatyana TETRİOGLU (KASIM), Dilnara TURSUNOVA, İnna VISOȚKAYA, Natalya VORNİKOVA, Kira YAYMAN.

“Karı canı aynaları” resim serginin açılışında resimciykaları selemnadılar hem kutladılar Gagauziya kultura Upravleniyasının başı Marina SEMENOVA hem Gagauziyanın Regional resim Galereyasının direktoru Lübov GAVRİLOVA.

Sergidä pay alan resimciykalara verildi diplomalar.

Serginin açılışında katılannar için çaldılar “Elegiya” kemençecilär ansamblisi hem İlya KÖSÄ.

Sergi açık olacek Baba Marta ayın 31-dän.

“Çizinin konstruktiv funkţiyası. Сeviz aacın dalı” temasında açık urokta üürediciyka Natalya TORLAK becerikli kullandı metodları hem çalımnarı, kantarlamak strategiyalarını, angıları yardım etti illerletmää üürencilerin becermeklerini.

Uroon debeştirmäk etapında üürencilerin kefi üüsek uura kaldırıldı, da onnar havezlän tema konusunda kendi bakışlarını argumentledilär. Urokta yapıldı incäzanaat yaratmalarına siiretmäk hem analiz. Üüredici buyur etti üürencileri ana dilimizä, tabiata, onun gözelliinӓ sevgi göstermää.

Poet Todur ZANETin gözäl, kırnak hem tertipli hazırlanan hem dä düzennenän “Mamucuumnan kol-kola” uşaklar için peet-boyama kiyadı – bu bir kiyadın içindä iki kiyat olan hem valet kalubuna erleştirän bir yaratma, angısını romın dilinä çevirdi moldovan poetı Titus ŞTİRBU hem gözäl resimnedi gagauz resimcisi Mihail ARABACI.

Bu meraklı kiyatlan tanışmaa deyni, o günü Komrat Kultura Evinä geldilär uşak başçalarından hem şkolalardan uşaklar kendi terbiedicilerinnän hem üüredicilerinnän, Gagauziya kultura hem Gagauziya üüredicilik Upravleniyaların başları hem zaametçileri, filologlar hem yazıcılar, resimcilär, bibliotekacılar, incäzanaat hem kultura insannarı.

Kiyatlan tanışmanın ofițial bölümü başlamayınca, zalda maasuz kurulan masacıklarda uşaklar artık büük havezlän siiredärdilär hem boyardılar kiyattan resimneri.

“Mamucuumnan kol-kola” uşaklar için peet-boyama kiyadın prezentațiyası başladı ondan, ani Çadır kasabasının Dionis TANASOGLU adına gagauz milli teatrusu gösterdi uşaklara “Onadan saymaa bilän keçicik” masalını.

Prezentațiyanın başlangıcında söz verildi Gagauziya kultura Upravleniyasının başına Marina SEMENOVAya, angısı annattı Gagauziyada aslıya çıkarılan kultura, bilim hem üüredicilik uurunda kiyat basmak proektları için. Canabisi urguladı, ani “bunnar yapılêr “Gagauz dilinin kullanmak sferasının genişledilmesi için” Zakonun ömürä geçirilmesi çerçevesindä hem hepsi o tiparlanan kiyatların bir uuru var – ana dilimizi korumaa, ilerletmää hem zenginneştirmää. Neyi da onnar yapêrlar”.

Marina SEMENOVA açıkladı nicä fikir geldi “Mamucuumnan kol-kola” uşaklar için peet-boyama kiyadını üzä çıkarmaa hem şükür etti kiyadın avtoruna hem onu hazırlayannara bu bereketli çalışmaları için.

Prezentațiyada nasaat edän Gagauziya üüredicilik Upravleniyanın başı Natalya KRİSTEVA, şükür ederäk bu kiyadı hazırlayannara hem tiparlayannara, urguladı, ani ““Mamucuumnan kol-kola” kiyadı vakıdında çıktı, çünkü bu gibi kiyatlara büük kıtlık var hem bu türlü kiyatlar pek lääzım, zerä şkolaların başlangıç klaslarında hem uşak başçalarında üüredicilär hem terbiedicilär büük zorluk çekerlär gagauz dilindä urokları bu uurda hazırlamakta”.

Komrat Kultura Evinä gelän insannarın önündä söz tuttu kiyadın resimcisi Mihail ARABACI, angısı annattı kiyadın üzerindä resimneri hazırlamak çalışmalar için.

Kendi sözündä Komrat 9-cu uşak başçanın gagauz dilindä üürediciyka-terbiediciykası Lüdmila BARLADÄN urguladı, ani bu kiyat hem uygun, hem lääzımnı hem da metodika kiyadı olarak kulanabilinir.

Komrat Gavril GAYDARCI adına teoretik lițeyin romın dilindä hem literaturasında üürediciykası Kristina KAMBUR, gözäl romınca lafederäk, şükür etti kiyadın avtoruna hem yaratmaları gagauz dilindän romın dilinä çevirän poeta Titus ŞTİRBUya bölä kıvrak, uşak aklına kolay yatan peetlär için hem umut etti, ani ileri dooru da gagauzça hem romınca kiyatlar Gagauziya uşaklarına deyni dünneyä taa geleceklär.

Prezentațiyanın sedefi oldu o, açan sțenaya çıktılar kiyadın haliz okuycuları hem gelecektä mutlak resimcileri – Komrat “Süütçääz” uşak başçasından uşaklar Aleksandr GAYDARCI, Vika PATRAMAN, Nastä PATRAMAN, Polina BARBOVA, Eva KONSTANTİNOVA (terbiedicileri – Eva POPOVA hem Aleksandra GAYDARCI) hem Komrat Dimitriy KARAÇOBAN adına teoretik lițeyindän üürencilär Mihail GARGALIK, İvan TODOROV, Yuliya KENDİGELÄN, Miroslava KARADJOVA, Yaroslav SAKALI, Tamara ÇEBAN, Natalya ARABACI (üüredici – Tatyana Stepanovna KİRYAKOVA), angıları büük duyguylan hem meraklan iki dildä, hem gagauzça hem da romınca, annatılar “Mamucuumnan kol-kola” kiyatçıından peetleri. Ne iş için kiyadın avtoru baașladı onnara hepsinä taazä kiyatçıı.

Prezentațiyanın sonunda kiyadın avtoru akademik, yazıcı, poet, folklorcu, dramaturg Todur ZANET, annatı kiyadın hazırlanması hem düzennemesi için hem, başta  Gagauziya kultura Upravleniyasının başı Marina SEMENOVA olarak, şükür etti hepsi insannara kim karar aldı bu kiyatçıı çıkarmaa hem hepsinä onnara, kim saymadı zaametini da ölä gözäl prezentațiyayı hazırlanmasında pay aldılar.

Hepsinä, kim bu gözäl yortuda pay aldı, baaşlandı birär kiyatçık ta.

“Mamucuumnan kol-kola” („Cu măicuţa de mânuţă”) uşaklar için peet-boyama kiyadın prezentațiyasından sora, taa suumayan zalda, Gagauziya Radio hem Televideniyeylan (GRT) cümne Kompaniyasının zaametçileri Polina BARBOVA (götürücü) hem Sergey GERGİEV (operator) kiyadın avtorunnan “Gagauziya gün-gündän” programasını hazırladılar da sora onu GRT kanalında Cümneyä yayınnadılar: https://grt.md/gagauziya-gun-gundan-mamucuumnan-kol-kola-kiyadin-prezentatiyasi/.