Maasuz “Dionis TANASOGLU” gagauz Milli teatrusu için yazdıı “Büülü maaza” pyesasını dramaturg Todur ZANET 18.02.2004 günü başardı da teatru onu hemen sțenaya koydu. Bir ay geçmedän dä, 2004-cü yılın yılın Baba Marta ayın (mart) 6-da bu spektaklinin premyerasını yaptı.

Spektakli ölä başarılı oldu, ani onu may bütün Gagauziyada gösterdilär hem dä onunnan Moldovadakı hem Halklararası sțenalardan da siiredicileri şennedirdilär. O sțenaların birisi oldu Belțtaki “Vasile Alecsandri” teatrusunun sțenası, neredä “Teatrular milli Festivali” çerçevesindä, pyesa 2004-cü yılın Kırım ayın (dekabri) 18-dä gösterildi. Sora da, spektaklidä baş rolleri oynayan aktörların yıllarda teatrudan ayırıldıkları için, “Büülü maaza” spektaklisi teatrunun reperturdan kaldırıldı.

Da te şindi, 2026-cı yılın Kirez ayın (iyün) 14-dä, “Dionis TANASOGLU” gagauz Milli teatrusunun trupasının zaametinnän Çadır kasabasının Kultura Merkezindä “Büülü maaza” spektaklisi genä sțenada hem haliz gagauz şakalarınnan, tanțlarınnan, türkülerinnän, rejisörun (Mihail Konstantinov) eniliklerinnän hem aktörların (Mihail Gagauz, Anatoliy Radulov, Mihail Konstantinov, Natalya İvançuk, Lidiya Ormancı, Elena Danacı) becerikli oyunnarınnan siiredicileri birleştirdi hem bam-başka bir aslılaa götürdü.

Milli teatrunun bu pyesanın premyerası için haberinin altında çok metedili komentariyalar yazıldı. Onnarın arasında Kazayk küüyün “Güneşçik” uşak başçasından siiredicilär bölä bir açıklama yazdılar: “Okadar derindän hem aslıdan annadılêêr hem gösterdilär talantlı aktörlar en büük maanasını bu spektaklidä, ani sııredicilär olarak bütün ürektän şükür ederiz sizä hem çok saa olun deeriz üüsek emoțiyalar için hem sizin işiniz için”.

Biz dä saa olunuz deeriz bu halizdän büülü kultura olayı için!

PATRETLERDÄ: “Büülü maaza” spektaklisinin büünkü afişası;

“Büülü maaza” spektaklisinin ilk afişası;

Belțtaki “Vasile Alecsandri” teatrusunun “Teatrular milli Festivali” afişası;

Maêstro Mihay VOLONTİRlän, “Büülü maaza” spektaklim Belțta gösterildii gün. 18.12.2006 y.

Tabzonda Hederlez ayın 2-15 günnerindä geçän “XXVI-cı Halklararası Karadeniz teatrular Festivali”ndä gagauz Milli teatrusu gösterdi dramaturg Nikolay KOLYADAnın pyesasına görä “Körlerin Dünnäsı” spektakliyi (rejisör – Denis BABURİN).

Denizlidä dä Hederlez ayın 9-17 günnerindä geçän “XXXVIII-ci Halklararası amator teatrular Festivali”ndä gösterdi franțuz dramaturgun Robert THOMASın “Tuzak” pyesasına görä koyulan spektakliyi (rejisör – Dimitriy KOEV).

BITEI-2026 Festivalindä pay aldılar 11 memleketin (Azerbaycan, Franțiya, Gruziya, İspaniya, Koasta de Fildeş, Moldova, Romıniya, Türkiye, Ukrayna, Üülen Koreya, Yaponiya) aktörlar, rejisörlar hem teatru trupaları, ani 10 günün içindä 22 teatrulu, muzıka hem oyun spektaklilerini gösterdilär. Festival çerçevesindä, “BITEI – Locul unde arta inspiră libertate” («BITEI – er, neredä incäzanaat serbestlii baaşlêêr») lozungun altında, birkaç yaratmak master-klası da gösterildi.

XIV-cü BITEI-2026 Halklararası sțena incäzanaatı Festivalinä Ankara hem İstanbul devlet teatruların nemțä dramaturgun Heiner MÜLLERin politikalı bir tragediya spektaklisinnän katıldı Türkiyenin arktörları da.

Anılmış aktör hem rejisör Saveliy KÖSÄ kendi teatrucu yolunu Kişinev incäzanaat İnstitutun aktör hem rejisör fakultetında başlattı. Burada aktörluk, insannık hem rejisörluk zanaatında ustalıı kavramaa deyni, ona üüredicilik yaptılar moldovan hem gagauz teatru uurunda büük ustalar Dionis TANASOGLU, Pötr ARABACI, Valeriy MOGUTENKO, Todur ZANET hem taa çok başarılı pedagoglar.

Onun pedagogu olarak, bu talantlı student için isteerim sölemää, ani o teatruculaa hem gagauz dilimizä pek meraklıydı, büük girginniklän hem saygıylan kendi görüşlerini ortaya koyardı hem o görüşlär için, gençlik havezinnän, sonuna kadar güreşärdi. Onda büük saygısı vardı bizim gagauz dilimizä, onu sevärdi hem pek islää bilärdi. Bunu biz gördük studentlik zamanı rollerin oynamasında – Jan-Baptiste MOLİERin “Jorj Danden yada aldadılmış koca” komediyasında (Lüben) hem benim gagauzçaya çevirdiim hem Moldova Devlet televideniyasının altın fondunda bulunan Jan RASSİNın peetlän yazılı “Bayazid” pyesasında (Bayazid).

Taa sora da gagauz dilinä sevgisini hem onu bilmesini gördük hem işittik “Bucaan dalgasında” radio koverimnerdä, açan o pek talantlı okuyardı gagauz yazıcıların peetlerini hem annatmaklarını.

Kişinev incäzanaat İnstitutunu 1992-ci yılda başarıp, yollandı Moskvaya da GİTİSa (Российский университет театрального искусства) üürenmää girdi, bitirip onu 1998-ci yılda. Moskvada Mossovet adına teatrusunda hem “Step Haus” şou-revü uşak şkolasında işledi. Mossovet adına teatrusunda çok spektaklilerdä oynadı: «Два веронца» (diplom spektaklisi) – Valentin; «Страсти по Митрофану» – Milon; «Скандал, скандал» – Kerless; «12-ая ночь» – Valentin; «Венецианский купец» – Kupeţ. Hep bu zamanda başka teatruların spektaklilerindä oynadı: «Потоп» (O. ANOHİNAnın antreprizası) – Higins; «Дама ждет – кларнет играет» – Pol; «На плоту» – Malıy.

2004-cü yılda Rusiyanın Gosteleradiosunda spiker hem radio rejisöru oldu. JK “Korona”nın “Svetläçok” adına Uşak klubunda aktör hem söz ustalıında pedagog işledi.

Moskvada işlärkenä, geldi Gagauziyaya da, rejisör olarak, Komratta «Женитьба» hem «Гарнир по французски» spektaklilerini koydu.

Saveliy KÖSEnin aktörluk talantı kinolarda hem seriallarda da parladı: «Страна глухих» (1998); «Крылья», «Саломея», «Дальнобойщики» (2001); «Мужская работа 2» (2002); «Игра на выбывание» (2004); «Обреченная стать звездой» (2005); «Преступление будет раскрыто», «Город соблазнов» (2009); «Зоя» (2010); «Дежурный ангел 2» (2012).

Anılmış aktörümuz hem rejisörumuz Saveliy KÖSÄ raametli oldu Moskvada 2013-cü yılın Büük ayın 3-dä. O gün gagauz gagauz kulturasında, gagauz teatruculuunda büük bir kayıp günü oldu. Ama Saveliy KÖSÄ, Savuşka, nicä ona deyärdilär yakınnarı hem onu sevän dostları, hiç bir kerä unudulmayacek hem onun adı kulturamızın istoriyasından silinmeyecek.

2026-cı yılın Hederlez ayın (may) 23-dä Saveliy KÖSEnin, Savuşkanın ana küüyündä Beşalmada oldu onu anmak bir kultura avşama hem burada rejisöra, teatru hem kino aktöruna bir anmak taftası açıldı.

Saveliy KÖSEnin pedagogu Akademik, poet, dramaturg Todur ZANET.

“Dionis TANASOGLU” gagauz Milli teatrusunun Moldova Teatruculular Birlliinin XXV-ci sıradakı “UNİTEM – 2026” Galasında kabledilän ödüllär:

“Küçük biçimdä en islää spektakli” – avtor hem aktrisa Nataliya PALADİY (“Poetların ömürü… sevdada ömür” spektaklisi için, rejisör – Dimitriy AHMADİEV);

“Dionis TANASOGLU adına ödül” – aktrisa Lidiya ORMANCI;

“Pötr BARAKÇI adına ödül” – aktör Mihail REZUNEȚ;

“UNİTEM predsedatelin ödülü” (Sandu GREKU) – aktrisa Nataliya MANASTIRLI;

“Perdä ardı adam” – İvan GERGELECİ;

“En islää debüt” – aktrisa Diana DRAGUŞAN (“8 üfkeli karı” spektaklisindä Katrin rolü için, rejisör – Dimitriy KOEV).

Hepsinä kutluca olsun!

Teatru günün kutlaması başladı uşaklar için dramaturg Todur ZANETın pyesasına koyulan “Mozgoroy” spektaklisindän, angısının rejisörları oldular Mihail REZUNEŢ hem Anatoliy RADULOV. Gagauz Milli teatrusu oyuncularının ustalıınnan siiredicilerin önündä, büülü hem şennik bir ortalıı dolaya yayınnayarak, cannanadılar bu gözäl hem masallı yaratmanın folklor personajları: Mozgoroy, Topal Canavar, Cadı Babusu, Mır-Mır-Kotoban, Yoluk Saksan, Kara Garga, Rusali batü, Rusalilär.

Avşam üstü büüklär işin gösterildi franțuz dramaturgun Robert THOMASın “Tuzak” pyesasına görä koyulan spektakli. Bu spektaklinin rejisöru oldu Kişinev “A. P. ÇEHOV” adına devlet rus drama teatrusunun rejisöru, Moldova Respublikanını kıymeti artistı Dimitriy KOEV.

Bütündünnä teatru gününä gözäl bir nokta da koyuldu: Gagauziya kultura Upravleniyasının adından onun başı Marina SEMÖNOVA teatruya Upravleniyanın “Şükürlük” belgesini hem Moldova kultura ministerliin Diplomnarını teatrunun aktrisasına Elena DANACIya hem teatrunun baş rejisöruna Anatoliy RADULOVa verdi.

Biz dä, “Ana Sözü” gazetsı olarak, kutlêêrız Çadır “Dionis TANASOGLU” adına Gagauz Milli teatrusunun zaametçilerini: aktörları, rejisörları, resimcileri, şafk hem ses ustalarını hem hepsini, kim kendi çalışmalarınnan baaşlêêr siiredicilerä teatru büülülüünü.

Bütündünnä teatru günü kutluca olsun!

Gagauzların dünnedä peydalanmasınnan ilgili legendayı annadan “Oguzlar – dedelerimizdir” kukla spektaklini siiretmää deyni, o günü, Todur Zanet adına teoretik lițeyin administrațiyasının zaametinnän, bu üüredicilik kuruluşun büük başını (aktovıy zalı) dop-dolu doldurdular lițeyin 4-8 klaslarda üürencileri hem onnarın üüredicileri.

Spektakli zamanı belli oldu, ani siiredicilär burayı boşuna toplanmadılar, zerä uşaklara deyni bu oyunu pek becerikli gösterdilär aktörlar Mihail KONSTANTİNOV, Andrey REDJEPOV, Nataliya İVANÇUK hem Nataliya MANASTIRLI.

Bu spektaki ölä gözäl olsun deyni, aktörlardan kaarä, kendi zaametlerini bu işä koydular “Oyuncak” kukla teatrunun öndercisi hem spektaklinin rejisöru Mihail KONSTANTİNOV hem da ses operatou – Aleksey KİROGLU.

“Oguzlar – dedelerimizdir” kukla spektakli bittiktän sora, aktörlar hem pyesanın avtoru çıktılar sțenanın önünä da siiredicilär onnara hem onnarın ustalıına ayak üstü palma düüdülär.

Siiredicilerin teklifinä görä, pyesanın avtoru dramaturg Todur ZANET annattı nicä hem neçin yazıldı “Oguzlar – dedelerimizdir” kukla spektaklisi, nicä o ilgili gagauzların dünnedä peydalanmasınnan legendaylan, onnarın istoriyasınnan, Canavar yortularınnan hem gagauzların eski inançlarınnan. Sonunda Canabisi şükür etti “Gezici “Oyuncak” kukla teatrusunun artistlerinä, Mirkiras” Cümne Asoțiațiyasının başına İrina MİHALÇUKa hem hepsinä, kim bu proektın aslıya çıkarılmasına zaametlerini hem kuvetlerini koydu.

Todur Zanet adına teoretik lițeyin direktoru Mariya İvanovna ÇEBANOVA da, candan-ürektän şükür ederäk üüredicilik kuruluşun o günkü musaafirlerinä, urguladı, ani bölä kultura olayları pek lääzımnı hem faydalı uşaklara da, büüklerä dä, bütün gagauz halkına da, çünkü onnar istoriyamızdan hem köklerimizdän kopmamaa kolaylıını vererlär.

Canabisinin ardından spektakliylän hem Canavar yortularımızlan ilgili düşüncelerini açıkladılar lițeyin direktor yardımcısı Zinaida Filipovna NEYKOVÇENA, gagauz dilindä hem literaturasında üürediciykalar Mariya İlyiniçna DUŞKOVA hem Agafya Vasilyevna GAYDARCI.

Söz gelişi, “Gezici “Oyuncak” kukla teatrusunun kurulması” proektın üzä çıkarılmasında “Mirkiras” Cümne Asoțiațiyasına, Çadır primariyasınnan iş birliindä, Moldovada işbirliindä Şveyțariya bürosu (Swiss Cooperation in Moldova) arka oldu.

Maasuz bu teatru için dramaturg Todur ZANET 4 spektakli yazdı: “Rız otu” (premyerası 2024-cü yılın Kasım ayın (noyabri) 27-dä oldu), “Fet-Frumos hem padişahın kızı” (premyerası 2025-ci yılın Çiçek ayın (aprel) 28-dä oldu), “Kvak-kvak, dolayda batak” (premyerası 2025-ci yılın Ceviz ayın (sentäbri) 12-dä oldu) hem “Oguzlar – dedelerimizdir” (premyerası 2026-cı yılın Baba Marta ayın 16-da oldu).

Not. Bu spektakliylän ilgili Gagauziya Radio hem Televideniyanın “Gagauziya gün gündän” programası burada: https://www.youtube.com/watch?v=N27Mc0gk8A4&t=261s.

Gagauziyanın Avdarma küüyündä duan hem Kişinevun “Guguța” kukla teatrusunda çalışan aktör Dimitriy ANGELOV “III-cü Halklararası Batumi kukla teatruları Festivali”ndä gösterilän “Benek prințesa” oyununda rolü için “En islää adam rolü” ödülünü kabletti.

“Batumi devlet gençlik hem kukla teatrusu”nun zaametlerinnän Kasımın 4-10 günneri arası yapılan “III-cü Halklararası Batumi kukla teatruları Festivali”nä 10 memlekettän kukla teatruları katıldı.

Festivaldä “Teatro Tempo”nun gösterdii “Sokratesın son gecesi” kukla oyununda oyuncu Marina YÜCE Gardiyan hem Sokratesın eşi Ksantipa rollerini oynadı hem harakterlarını cannandırdı.

“III-cü Halklararası Batumi kukla teatruları Festivali”n “En islää karı oyuncu” ödülünü alarak, Marina YÜCE dedi: “En zor hem en sevdiim oyunnardan birinnän bu ödülü almak çok mutlu etti. Bu oyunu bizä kazandıran yazıcı Stefan ȚANEVa, rejisöra Peter TODOROVa, sțena hem kukla resimcisinä Hanna ŞVARȚa, kompozitora Nedim YILDIZa hem büüleyici sesinnän oyunun muzıkalsına derinnik katan Yıldız İBRAHİMOVAya çok çok şükür ederim”.

Marina YÜCE ayırıca şükür etti “Teatru Tempo” teatrunun rejisöruna Halük YÜCEyä dä, angısı “Sokratesın son gecesi” kukla oyununda Sokrates rolünü oynadı.

Eridir urgulamaa, ani oyunculuktan kaarä Gagauziyanın Tomay küüyündä duan Marina YÜCE “Teatru Tempo” teatrusu direktorudur hem bu teatrunun başka spektaklilerindä dä kukla rollererini oynêêr hem kocası Halük YÜCEylän birliktä artık 11 yıl “Halklarası Ankara kukla Festivali” sıralarını düzenneer.

Şindi “Teatru Tempo” teatrusu olarak, Marina YÜCE hem Halük YÜCE gruziyalı teatrucularınnan ortak bir proekt başladêrlar.

Maasuz bu proekt için 4 kukla pyesası hazırladı dramaturg Todur ZANET. Onnar: “Rız otu”, “Fet-Frumos hem padişahın kızı”, “Kvak-kvak, dolayda batak” hem “Oguzlar – dedelerimizdir”. Proektın kapanış sırasında gösterildi bu teatrunun hazırladıı “Fet-Frumos hem padişahın kızı” spektaklisi.

Kapanış sırasının başında bu proektlan ilgili sonuçları açıkladı proektın öndercisi İrina MİHALCİUC. Sora “Oyuncak” kukla teatrusu gösterdi Fet-Frumos hem padişahın kızı” spektaklisini.

Spektaklidän sora söz verildi dramaturg Todur ZANETä, angısı şükür etti hepsi artistlerä hem onnara, kim bu proektın aslıya çıkarılmasına zaametlerini koydular hem arka oldular.

“Gezici “Oyuncak” kukla teatrusunun kurulması” proektın üzä çıkarılmasında “Mirkiras” Cümne Asoțiațiyasına, Çadır primariyasınnan iş birliindä, Moldovada işbirliindä Şveyțariya bürosu (Swiss Cooperation in Moldova) da arka oldu.