ömürünü Türk dünnäsı kultura birlii idealına adamış Avrasya Yazarlar Birliin (AYB) kurucusunun hem Genel Başkanın raametli Dr. Yakup ÖMEROĞLUnun duumasının 60-cı yılına.

Anma sıranın programası başladı duaylan hem Yakup ÖMEROĞLUyu annadan TRT Avaz tarafından yapılan dokumental filmın siiretmesinnän.

Sıranın baş teması “Dostlarının Gönlünde Yakup Ömeroğlu” olduu için, Avrasya Yazarlar Birliin (AYB) kurucusunu hem Genel Başkanını raametli Dr. Yakup ÖMEROĞLUyu anmakta pay aldılar AYBnın kurucusunun arkadaşları, sevenneri, poetlar hem yazıcılar, onun aylesi hem dostları, angıları o avşam paylaştılar Yakup beyi anmalarınnan hem can duygularınnan annattılar Canabisi için.

Anma sıranın başında “Türk Ocakları Ankara Şubesi” başkanı Uğurcan KÜÇÜKAĞAOĞLU raametli Yakup ÖMEROĞLUnun ölüsünä adanmış Prof. Dr. Cemal KURNAZın “Yakup’un Ağıtı” adlı peetini okudu. Ardından da muzıkaya koyulmuş hep o peeti Türk dünnäsı muzıka incäzanaatçısı İrfan GÜRDALın tarafında türkü biçimindä seslendirilmesini sesledik.

“Türk Ocakları Ankara Şubesi”ndä o gün toplanan insannarın önündä Yakup bey için, onun yaşaması hem onunnan işlemelerini annattılar Prof. Dr. Orhan KAVUNCU, Prof. Dr. Mehmet ŞAHİNGÖZ hem AYB başkan yardımcısı yazıcı Osman ÇEVİKSOY.

Sora da kendi anmaklarınnan paylaştılar AYBnın büünkü başkanı Ufuk TUZMAN, Makedoniyadan Balkan Yazarlar Birlii Başkanı Mürteza SULOOCA, Türk dünnäsı muzıka incäzanaatçısı İrfan GÜRDAL, Gagauziyadan “Ana Sözü” gazetasının baş redaktoru Akademik Todur ZANET, AYB azaları olan çok sayıda yazıcılar hem poetlar.

Anmak sıranın sonunda söz aldılar Yakup beyin kızı Özge ÖMEROĞLU hem eşi Havva ÖMEROĞLU, angıları annatılar raametli Yakup ÖMEROĞLU için hem şükür ettilär hepsinä kim katıldı bu anma sırasına hem kim unutmadı Yakup beyi.

Bundan sora Havva hanuma “Türk Ocakları Ankara Şubesi” adından günün anması için ÖMEROĞLU aylesinä plaket verildi.

Toplantının sonunda “Türk Ocakları Ankara Şubesi” başkanı okudu poet hem yazıcı Fatih Sultan YILMAZın Yakup beyä yazdıı “Bir Çınar” adlı peetini.

“Yaşadıkça, yaşa!” kiyadın prezentațiyasını, başta lițeyin administrațiyası olarak, direktor Marina İvanovna ÇEBANOVA hem direktor yardımcısı Zinaida Filipovna NEYKOVÇENA, hazırladılar gagauz dilindä hem literaturasında üürediciykalar Matröna Nikolaevna BARGAN, Praskovya Dimitrievna DOYKOVA, Mariya İlyiniçna DUŞKOVA hem Agafya Vasilyevna GAYDARCI.

Prezentațiyaya buyur edilän Türkiye Respublikasının Komrat Başkonsulunu Eda GÜÇü hem kiyadın avtorunu Todur ZANETi üürencilär, üüredicilär tuz-ekmeklän hem “Altın Çöşmä” ansamblisinin oyuncuları gözäl bir “Kadınca” oyununnan karşladılar.

Lițeyin kırnak donaklı hem tertipli büük zalında avtorun çoyu kiyatların büük sergisi hazırlanmıştı, angısınnan vardı nicä tanışsınnar prezentațiyaya katılan üüredicilär, üürencilär hem lițeyin o günkü musaafirleri: Kongazın gimnaziyalarından hem taa bir lițeyindän gagauz dilindä hem literaturasında üüredicilär, bibliotekacılar, angılarına sıranın başında avtor baaşladı eni çıkan kiyatlarını.

“Yaşadıkça, yaşa!” kiyadın tanıtım sırasını selemnama hem kutlama sözünnän açtı lițeyin direktoru Marina İvanovna ÇEBANOVA. Nedän sora sırayı götürücülär Nataliya ESİR hem Dimitriy SABYA kısadan annattılar avtorun biografiyasını. Ardından da lițey klaslarından üürencilär Elena KRİSTEVA,Viktoriya KURDOGLU, Zinaida MACAR, hem Nikolay ȚAPURDEY okudular eni kiyattan birär peet.

Sora söz verildi Türkiye Respublikasının Komrat Başkonsuluna Eda GÜÇä. Kendi nasaatında Canabisi, başta kiyatların avtoru olarak, kutladı hepsini bu gözäl hazırlanmış sıraylan hem zalda bulunan hepsi insannara danışarak, urguladı: “Dil hem kultura bir milletin varlıını kurêr. Dil hem kultura bu dünnedä sizä verilmiş en önemni elementtır. Bunu kesinniklän korumanız, genişlettirmeniz, sayıp çıkmanız lääzım. Diliniz hem kulturanız yok olduunuzda – yok olursunuz, asimiläțiya olursunuz, artık bir millet olmaktan çıkarsınız. Türkiye hem Gagauziya arasında en önemni damarlardan biri – kulturadır. Geçmiştä çok baamız var. Ama kultura hem dil baamız en kuvetlisidir”.

Taa sora sıra soruş-cuvap atışmasına döndü. Koyulan soruşlara avtor kimilerinä doorudan cuvap verdi, kimilerinä dä, cuvap olarak, eni peetlerini okudu.

Kutladı avtoru prezentațiya katılan, Todur Zanet lițeyini başaran hem büünkü gündä gira sportunda bir kaç kerä Evropa çempionuu olan Nikolay FRANGU da.

Soruşlar bittiynär poet, yazıcı, Akademik hem Gagauz Milli Gimnasının avtoru Todur ZANET annattı “Yaşadıkça, yaşa!” kiyadın dünneyä gelmesinin yolunu hem unutmadı sölemää bu yıl onun tarafından, Gagauziya kultura Upravleniyasının teklifinä görä hazırlanan “Gagauz masalları: masaldan masala” kiyat için dä. Urgulayıp, ani bu kiyat ta çıktı Gagauziyanın “Gagauz dilinin kullanmak sferasının genişledilmesi için” Zakonun ömürä geçirilmesi çerçevesindä. Canbisi şükür etti hepsinä kim hazırladı bu sırayı hem onnarı, kim zaametini saymadaan, katıldı ona.

Prezentațiyanın sonunda üürenciyka Elizaveta PAÇİ Gagauziya için bir türkü çalarak hem üürenci Yaroslav GAYDARCI, saksofonda “Oglan” türküsünü çalarak, şennendirdilär katılımcıları.

Şükürlän saa ol deeriz Gagauziya Radio hem Televideniye (GRT) cümne Kompaniyasınnan, GRTnın korespondentına Polina BARBOVAya hem operatoruna Grigoriy STAVİLOVa, ani dolu-dolu çıkardılar bu sırayı hem GRT efirindän tanıştırdılar cümne insannarı  lițeyimizdä geçän bu büük kulturalı olayınnan.

https://grt.md/articol/tipardan-cikti-t-zanetin-eni-toplumu-yasadikca-yasa

Kongaz küüyün Todur Zanet adına teoretik lițeyin administrațiyası

Gagauziyada yapılan “Lääzımnı kiyat – 2025” konkursun çıkışlarını açıklayarak, Gagauz dilinin kullanmak sferasının genişledilmesi için Komisiya bildirdi, ani gazetamızın Baş redaktoru, Akademik hem yazıcı Todur ZANET Gagauziyada “Yılın yazıcısı” olarak tanındı.

Gagauziya kultura Upravleniyası açıkladı, ani “Gagauz dilinin kullanmak sferasının genişledilmesi için” 26.10.2018 yılın №30-XVII/VI Zakonun ömürä geçirilmäk zaametleri çerçevesindä, Gagauz literaturasının ilerletmesindä hem populärizațiyasında hem da yazıcılara arka olmak uurunda katkılarda bulunmak üzerä, Gagauziyada yapılan “Lääzımnı kiyat – 2025” konkursun sonuçları belli oldu.

Gagauz dilinin kullanmak sferasının genişledilmesi için Komisiya bildirdi, ani “Lääzımnı kiyat – 2025” konkursunda ödülleri kazandılar:

1. “En islää peet toplumu”:

– uşaklara deyni – “Uşaklara deyni peetlär”, avtor Todur MARİNOGLU;

– büükerä deyni – “Kaderimin sedefleri”, avtor Olga İVOGLO;

– büükerä deyni – “Lüzgerä karşı”, avtor Aleksandra KRİSTOVA (Yularji).

2. “En islää proza toplumu”:

– uşaklara deyni – “Gagauz masalları: Masaldan masala”, avtor Todur ZANET;

– büükerä deyni – “Ana-boba evi”, avtor Konstantin KURDOGLO.

3. “Dokumental publițistika” – “Dedelerin diveç sesi”, avtor Konstantin KURDOGLO.

4. “Yılın yazıcısı” Literatura premiyası – yazıcı Todur ZANET.

5. “Yardım ödülleri” – “Sevdim, severim, sevecäm”, avtor Alöna ERGOGLO; “Seslä, canım…”, avtor Kristina KOÇAN.

Buluşma sırasında hazırlanmak grupalardan uşaklar annatılar Todur ZANETin “Böcecik” kiyadından peetleri hem çaldılar onun laflarına türküleri.

Bundan kaarä, folklorcunun topladıı şakalı gagauz cümbüşlerinä görä, büük grupalardan uşaklar, gözäl hem şakalı teatru insțenirovkaları yaptılar.

Ayırıca bu sıraya buyur edilän muzıkacı İvan JELEZNIY, kendi oolunnan Arseniylän, gagauz “Oglan” halk türküsünü çaldılar.

Hazırladılar bu yortulu sırayı uşak başçasının gagauz dilindä üürediciyka-terbiediciykalar Anna Vasileyvna PAVALATİ hem Anna Födorovna GRİÇENÜK, hem da uşak başçasının direktoru yardımcısı Ekaterina Vladimirovna LEYÇU olarak.

Kaynak: Komrat №6 “Gülüş” uşak başçasının facebook sayfası

Buluşmaklar başladı Komrat kasabasının Stepan TOPAL adını taşıyan “Masalcık” uşak başçasından, neredä, bu başçanın başının Anna Vasilyevna KROİTORun önderciliindä, pek gözäl bir kultura programası hazırlanmıştı.

Buluşmaya gelän yazıcıları Yulian FİLİPı hem Todur ZANETi, hem dä Etnika arası ilişkileri Agenstvosunun başını Veçeslav REABÇİNSKİYi burada tuz-ekmeklän karşladılar. Sora, uşak başçasının kıvrak donaklı büük başında kultura sırası ilerledi. Burada kurulmuştu buluşmaya gelän yazıcıların yaratmakları sergisi hem oraya, uşak başçanın gagauz dilindä üürediciyka-terbiediciykası Lüdmila BARLADÄN hem romın dilindä üürediciyka-terbiediciykası Anna ROŞKA getirdilär gagauz hem moldovan milli rubalarına giimni uşakları, angıları büük duygularlan konțert programasını gösterdilär. Gercik hem akıllı hazırlanmış uşaklar gagauz hem romın dillerindä, o günkü yazıcı musaafirlerin laflarına, türküleri çaldılar hem onnarın peetlerini okudular. Bundan kaarä halk oyunnarını da oynadılar. Yazıcılar da yaratmak yollarını annattılar hem kendi kiyatçıklarını uşaklara hem uşak başasına baaşladılar.

Yulian FİLİP hem Todur ZANET dramaturg hem teatrucu oldukları için, yannarında Kişinevdan “Oratorul” kukla teatrusunu (önerci – Eugen Kojokaru) getirdilär, angısı herbir buluşmada uşaklara yol kurallarınnan ilgili kukla pyesasını gösterdi.

Uşak başöasından sora, “Etnika arası ilişkilerini kaavileştirmäk (CRİn) programası çerçevesindä Romın dilin etnika bölümnerin arasında ilerletmäk için sıraya” görä, buluşmalar Komradın “D. Mavrodi” hem “S.Kuroglu” gimnaziyalarında hem “G. Gaydarcı” lițeyindä oldular, angılarını götürdü Etnika arası ilişkileri Agenstvosunun başını Veçeslav REABÇİNSKİY. Buluşmalarda yazıcılar peydalanan soruşlara da cuvap ettilär.

“Bogdan Petriceicu-Hasdeu ” romun filologiyası İnstitutun tarafından koordinațiya yapılan “Arhiva de voci” Milli Proektı „#ArhivadeVoci” çerçevesindä, yapıldı romun dilindä bir intervyu gagauz yazıcısınnan hem Akademiklän, jurnalistlän, dramaturglan hem folklorislän, gagauz lteraturasının hem teatrusunun en büüklerdän birisi olannan, gagauz dilini geliştirän “Ana Sözü” gazetasının baş-redaktorunnan, Gagauz Milli Gimnasının avtorunnan Todur ZANETlän.

Bu buluşmanın moderatru oldu büük kultura insanı hem yazıcı İulian FİLİP.

Vidioyu hem fotolorı yaptı Dr. Mariana Cocieru.

Secția Audiovideoteca a BNRM

Marketing şi Comunicare Socioculturală – Biblioteca Naţională

“Kuancık” kiyadı tiparlandı Gagauziyanın “Gagauz dilinin kullanmak sferasının genişledilmesi için” Zakonun ömürä geçirilmesi çerçevesindä.

Kiyadın çıkmasınnan ilgili prezentațiyada nasaat ettilär Gagauziya kultura Upravleniyası başın yardımcısı Aleksey KARATERZİ, kiyadın avtoru Galina DANACI hem Canabisinin kolegaları.

Prezentațiya sırasında insannarın önündä uşaklar peetleri okudular hem kultura programasını gösterdilär.

Nicä bildirdi “Ana Sözü” redakțiyasına kiyadın avtoru hem Erzincan Binali YILDIRIM Üniversitetın türk dili hem literaturası kafedrasının profesoru Prof. Dr. Ali KAFKASYALI, bu kiyat deirndän annadêr ilk Azerbaycan halk poetı, dramaturgu, publițistı, bilgiçi, kritii, cümne hem kultura insanını, yazıcıyı Samed VURGUNu hem açıklêêr bu büük poetın hem yazıcının yaratmalarının derindän hem her taraftan aaraştırmasının özelliini.

Prezentațiyaycın taa derindän burada: https://goyezen.az/manset/8566-qazaxda-xalq-sairi-semed-vurguna-hesr-olunmus-kitabin-teqdimati-olub.html

Saalık, kısmet, uzun ömür Canabinizä. Allaa versin sizä kuvet hem çok akıl Gagauz milletinä hem Gagauzluklan Türk Dünnäsına izmetlerinizdä hem zaametlerinizdä.

Göklerdän can sıcaklıı nurlar üstünüzä insin. Literaturada hem incääzanaatеa bütün neetleriniz, yaratmalarınız hem çalışmalarınız aslıya çıksın.

Allaa versin çok yıllar ayakta durasınız, kılıç gibi keskin kalasınız, gül gibi nazlı olasınız!

Saalık Allaa versin, Todur ZANET, sizä hem hepsimizä!

“Ana Sözü” gazetanın redakţiyası