O günü, bakırdan dökülän yaamur, tolu hem çımçırıklar başladıynan, 230 baş keçi sürüsü taman kırdaymış. Saat 14:30 gibi, yaamurdan korunmaa deyni, hayvannar toplanêrlar bireri da onnarı yıldırım urêr. Yıldırımdan 37 baş erindä öler.

Sürünün çobanına Radion OSİPOVa yıdırım dokunmamış. Nicä söledi Canabisi öldürülän hayvannarın arasında 16-sı kendisinin, 21-ri da – avdarmalıların keçileriymiş.

Avdarma küüyün primarı Mariya KAPSAMUN açıkladı, ani bu belanın zararı 26 bin ley yapêr.

Şindi küüyün primariya soveti, inceleyip konuyu, bu insannarın zararlarını karşılamaa düşüner.

Bu önemni gündä kabaatsız ölenneri anmaa deyni, küüyün popazının Ay-Boba Konstantinın teklifinä görä, Avdarmanın mezarlıına beşüzdän zeedä insan geldi.

Çasovnänin ayozlanmasını hem raametli olannarı anmak slujbasını yaptılar arhimandrit Andrey (“Marfa hem Mariya” manastırın bakımcısı), Kiriyet küüyün popazı Ay-Boba Nikolay hem Ay-Boba Konstantinın.

Çasovnänın açılmasında söz tuttular küüyün insannarı. Götüdü sırayı Avdarma küüyündän Halk Topluşun deputatı Elena KARAMİT.

Çasovnänın merkez taşında yazılı:

“Bu çasovnä ayozlandı Panaiyanın “Mayıllık” ikonasının hatırına hem kuruldu büük zeetlär içindä ölän avdarmalıların anmasına:
– 1941-1945 yıllarında tiftan ölän 575 kişiyä;
– 1946-1947 yılında aaçlıktan ölän 583 kişiyä.
(Onnar çoyu bu erdä topluca gömülü).
Hepsinin adları “ACI KÖŞESİ” memorial kompleksında granit taşlarında oymaylan yazılı.
ALLAA HEPSİNİ RAAMET ETSİN…
19.10.2019”

Slujba hem Çasovnänın açılmak sırası bittiynän hepsi insannara bir pomana masası kuruldu.

Fotolar: avdarma1563.md

Olimpiada “Dizayn” hem “Buluş” (izobreteniye) uurlarında oldu. Onnarda pay almaa deyni 16 devlettän 257 proekt yollandı. Finala 100 proekt alındı (Türkiyedän 60, başka devletlerdän da 40).

Büük sevinmeliklän bildireriz, ani “2-ci Türk dünnäsı bilim Olimpiadasının” “Dizayn” dalında birinci eri aldı Avdarmanın “Dimitriy ÇELENGİR” adına teoretik liţeyin üürencisi Valeriy KAPSAMUN. O getirdi burayı kendi yaratmasını – klisä biçimindä yapılı saatı. Birinci er için ödülü Valeriy KAPSAMUN kabletti Türkiye Milli üüredicilik Bakanın Nabi AVCInın elindän.

“2-ci Türk dünnäsı bilim Olimpiadasında” Avdarmadan taa bir üürenci İvan GREK ta pay aldı. Bu üürencilär ikisi da Avdarmanın uşak yaratması Evindä zanaatlanêrlar, onuştan Olimpiadaya kendi öndercilerinnän, Evin direktorunnan Mihail YAZICIylan yollandılar.

Ani Avdarmanın uşak yaratması Evindän üürencilär “2-ci Türk dünnäsı bilim Olimpiadasında” pay alaceklar belli oldu bıldır, açan bu küüyä “Türkiye Gönüllü Eğitimciler Derneği” üüredicilär geldilär da uşakların yaratmaklarınnan tanıştılar.

PATRETTÄ: (saadan sola) Avdarma uşak yaratması Evindirektoru Mihail YAZICI, Türkiye Milli üüredicilik Bakanın Nabi AVCI, Valeriy KAPSAMUN, Eskişehir Valisi (gubernator) Güngör Azim TUNA.

Bu yıl “Muzey Karnavale” yortusunda, gagauzları hem Gagauziyayı göstermää deyni, Kişineva gitti Avdarma küüyün “D. ÇELENGİR” liţeyin üürenci ansamblisi. Ansambliya arka hem yardımcı olmaa deyni, uşaklarlan bilä geldilär onnarın üürencileri Mariya İvanovna MARİNOVA, Steşa İvanovna POPAZ hem liţeyin direktoru Elena Födorovna KARAMİT.

Nicä annatı redakţiyamıza Elena Födorovna: “Liţeyin ansamblisi şaştırdı hepsini kim siiretti onun programasını. Gagauz oyunnarında uşaklar becerdilär yakışıklı göstermää bizim adetlerimisi hem ruhumuzu. Hepsi mayıl oldu kostümnarımıza. Okuma konkursunda da kendimizi islää taraftan gösterdik. O konkursa katıldı üürencimiz Olga TRANDAFİLOVA, angısı pek becerikli okudu yaratmayı.”

“Muzey Karnavale” yortusuna Avdarma liţeyin üürenci ansamblisi adsız gitti. Şindi liţeydä ansambliya en islää ad koymaa deyni uşaklar arasında konkurs yapıldı.