İstanbulun “Yahya Kemal BEYATLI” kultura merkezindä 2015-ci yılın Kırım ayın (dekabri) 15-dä küçüklär için “Bala Türkvizyon-2015” hem Kırım ayın (dekabri) 19-da büüklär için “Türkvizyon-2015” türkü yarışmaların finalları geçti. Onnarda pay aldılar 21 devlettän türkücülär.

Büüklerin arasında yarışmada Gagauziyadan türkücü Valeriy ORMANCI finalda 10-cu oldu. Canabisi kazandı 154 ball. Ama onun gibi hep 154 ball kazandılar 7-9 erleri da alannar. Ama jürinin kararına görä Valeriy ORMANCIya 10-cu er verildi.

“Türkvizyon-2015” türkü yarışmasında ensedi Kırgızstandan türkücüyka Jiydeş İDRİSOVA (194 ball), 2-ci eri aldı Kazahstandan “Orda Emes” grupası (185 ball) hem 3-cü eri da Türkiyedän türkücü Görkem DURMAZ (175 ball).

Küçüklär için “Bala Türkvizyon-2015” finalında Gagauz türkücüykası Yana DİMOVA 8-ci eri aldı (98 ball). Birinci oldular Azerbaycandan Ahmet AMERLİ hem Nuray RAHMAN (115 ball), 2-ci – Kazahstan (113 ball), 3-cü Gruziya (112 ball).

Not. “Türkvizyon” yarışmaları 2013-cü yıldan beeri yapılêr. Birincisi Türkiyenin Eskişehir kasabasında oldu. “Türkvizyon” türkü konkursun uuru – türkdilli milletlerin kultura özünü hem ruh zenginniini korumak, türk estrada muzıkasını ilerletmäk, türk dünnäsının arasında dostluu kaavileştrmäk.