Kırım ayın (dekabri) 29-da “Gagauziya Radio Televizionu” Cümne kompaniyası kendisinin kurulma gününün 25-ci yıldönümünü kutladı. Kompaniya sayêr kendi duuma gününü 1989-cu yılın Kırım ayın (dekabri) 29-nu, açan efirä çıktı ilk programa, angısını hazırladı İlya ANASTASOV.

Kompaniyanın kurucusu İlya ANASTASOV annattı, ani o “Gagauz Halkı” akıntının toplantısında teklif etmiş kurmaa televideniyayı da, kayılıık kablettiynän, tutunmuş bu iştän. Canabisi urguladı, ani pek çok yardım etmiş ona ozamankı Komrat rayispolkomun başı Viktor VOLKOV.

GRTnın büünkü predsedateli Anna HARLAMENKO açıkladı, ani “ozamannar biz bişeycik bilmäzdik, ama televideniyanın kurucusunnan İlya ANASTASOVlan barabar işlärdik da, te büün, büük bir Cümne kompaniyasınadan büüdük”.

Maasuz kendi yıldönümü için GRT “Gagayziya TVsına 25 yıl” televideniye programaların konkursunu yaptı. Konkursta yardımcı oldu Moldovanın Televideniye hem Radio Koordinaţiya Soveti. Kutlama günü konkursun 16 nominaţiyasında 1-ci hem 2-ci erleri alannara ödüllär verildi (diploma, statuetka hem para). Ödülleri kablettilär:

GRTdan – Vitaliy Dimitrieviç GAYDARCI, Maya SADOVİÇ, Anna ALTIEVA, Anna MALAKE, Valentina KOROLÄK, Elena MOKANU, Natalya JELEZOVA, Svetlana DİMİTROGLU, Tatyana STAVİLOVA, Evgeniy MELNİK, Andrey NOVAK, Grigoriy STAVİLOV;

BasTVdan (Basarabka) – İnna GURKOVA, Aleksandra VOLNİŢKAYA, Lüdmila TOPAL hem Veronika BURŞOVA;

NTStan (Taraklı) – Lidiya PASLAR, İvan GARİZAN hem Olga OSTANEVA.

Ayırı ödüllär verildi telekanallara BasTV (Basarabka), MediaTV (Çimişli), NTS (Taraklı).

Hep o günü GRTnın redaktoruna Valentina KOROLÄKa verildi ad “Komrat kasabasının şannı vatandaşı”.

Bundan kaarä “Gagauziya Radio Televizionu” Cümne kompaniyasına yardımnar için hem işbirlii için GRT kendi Diplomalarını verdi zalda bulunan musaafirlerä, jurnalistlerä hem cümne insannarına.

O günü “Gagauziya Radio Televizionu” Cümne kompaniyasını yıldönümünän kutladılar: Türkiye Büükelçiliin 1-ci sekretari Başar BAŞOL , TİKA Kişinev koordinatoru Canan ALPASLAN, Gagauziya İspolkomun predsedatelin I-ci yardımcısı Valeriy YANİOGLU, Gagauziya Halk Topluşu başın yardımcısı Aleksandr TARNAVSKİY, Komrat sovetinin predsedateli Viktor VOLKOV, Komrat sovetinin predsedatel yardımcısı Vasiliy NEYKOVÇEN, Komrat klisesinin popazı Ay-Boba Födor, yazıcı hem poet Todur ZANET (“Ana Sözü” gazetasının hem “Gagauzluk” Cümne Birliin adından), “ATATÜRK” bibliotekasının direktoru Vasilisa TANASOGLU, jurnalist hem redaktor Sergey SUDEV, Rusiya Büükelçiliin temsilcisi hem başka cümne insannarı, yazıcılar, işadamnarı.

Nicä düşer bu uurda vizitlar protokoluna, ilk buluşma Gagauziya başkanı Mihail FORMUZALlan oldu. Gagauziya İspolkomun hem Halk Topluşu binasının önündä TİKA koordinatorunu, Gagauziyanın adından, Gagauziya başkan tuz-ekmeklän karşladı.

Başkannık binasınnan tanışmaktan sora, başkanın kabinetindä Türkiye Respublikasının TİKA uurunnan yakında yapılan proektaların sferası lafedildi.

TİKA koordinatoru Canan ALPASLANın ikinci buluşması GHT (Gagauziya Halk Topluşu) başı Dimitriy KONSTANTİNOVlan oldu.

Buluşma oldu Komrat primarı Nikolay DUDOGLUylan da.

Gagauziya öndercilerinnän buluşmadan sora, Komratta yapılmış hem gelecektä neettä yapılmak olan proektların erlerinnän tanışmak oldu: Komrat rayon bolniţasınnan (buluşmak oldu bolniţanın baş doktorunnan Elena NOVAKlan); Komrat Devlet Universitetında yapılacek “Recep Tayip ERDOĞAN üüredicilik Kompleksı”n yerinnän (buluşmak oldu KDU rektorun dış ilişkilerdä yardımcısınnan, ekonomika fakultetın dekanınnan Konstantin TAUŞANCIylan); Komrat ihtärlar hem yaşlılar evinnän; Komrat ATATÜRK biblioteksınnan; Modovanın Komratta “İmäk malları güvennii Agenstvosu” filialınnan; Gagauziya Radio hem Televideniyesınnan (GRT); Komradın 1-ci uşak başçasınnan (Komrat primarı Nikolay DUDOGLUylan hem GHT başı yardımcısı Aleksandr TARNAVSKİYlän birliktä).

Komrattan sora TİKA koordinatoru Canan ALPASLAN Kongaz küüyünä yollandı. Burada, programaya görä 3 buluşma vardı. Ama Kongazın kardaş-primariyasından Türkiyenin Konya kasabasının Selçuklu primariyasından Kongaza yardım verilmesi sebepinnän programaya taa iki punkt girdi: Kongazda reabilitaţiya Merkezinä vizit hem Kongaz küüyün “Bucak” bölgesindä yapılacek içmäk su skvajinasının erinä gitmäk (bu içmäk su skvajinanin yapilmasi hem reabilitaţiya Merkezinä minibus ver’lmes’ yardım Selçuklu primariyasının parasınnan yapılacek).

Kongaz primarınnan Konstantin TELPİZlän buluşmaktan sora, bu iki erä vizit yapıldı.

Vizit programasına görä TİKA koordinatoru Canan ALPASLAN Kongazın 1-ci liţeyinnän tanıştı. Burada Canabisini liţeyin direktoru İordan YASIBAŞ çiçeklän karşladı (liţeydä buluşmaya katıldılar GHT başın yardımcısı Demyan KARASENİ hem poet Todur ZANET). Liţeylän tanışmakatan sora, gagauzların musaafirlik adetinä görä, paalı musaafirleri kıırmaylan konakladılar.

TİKA koordinatoru Canan ALPASLANın Gagauziyaya Canavar ayın (oktäbri) 9-da vizit programasının son noktası Kongazın “Suleyman DEMİREL” türk-moldova liţeyi oldu. Burada, başta liţeyin direktoru Funda TÜFEKÇİ olarak liţeyin üüredicelerinnän buluşmak hem liţeylän tanışmak oldu.