Türkiye Respublikasının Prezidentı Recep Tayyip ERDOĞAN, mitingta nasaat ederek, urguladı, ani “Türkiyedä olan asker devlet devrimi denemesinin basılması gösterdi, ani bu devleti kimsey enseyämäz”. Canabisi dedi: “Orak ayın (iyül) 15 gecesindä Türkiyenin sokaklarına hem meydannarına insannarın akınışı ölümü ensedi”. Recep Tayyip ERDOĞAN “üstümüzä gelän baskılara karşı koymakta halkın birleşmesinin önemni olduunu” urguladı.

Prezident Recep Tayyip ERDOĞAN dedi: “Büün bu meydanda hepsi toplandılar: Asker Silählı Kuvetlerin komutanı, Prezident, Başbakan, GHP hem MHP partiyaların başkannarı, devletin hepsi 81 bölgesindän cümne insannar. İnanın, bunnarı görüp, duşmannarımız gücendilär, ölä, nicä onnar gücendilär Orak ayın (iyül) 16 günü sabaası”.

Mitingta konuşarak Türkiyenin Başbakanı Binali YILDIRIM urguladı, ani “Ölä nicä Çanakkaledä gösterilän kahrmannıı Türk milleti istoriyaya yazdı, Orak ayın (iyül) 15-dä da genä kahramannık gösterdi… Herşey Allahın elindädir. Herbir asker devlet devrimi denemesinin basılması bizi taa kuvetli, taa birleşik yapêr”.

Türkiye Büük Milli Meclisi (parlament) Başkanı İsmail KAHRAMAN, mitingta nasaat ederäk, umut etti, ani “türk halkı ileri dooru da herbir asker devlet devrimi denemesinin” boozuna basacek.

İsmail KAHRAMAN dedi: “”Biz toplandık burada bir neetlän: göstermää, ani bir milletiz, bir devletiz, türk bayraa altında bir memleketiz. Biz göstereriz dünyaya, ani gömdük hepsi asker devlet devrimi denemelerini”. Canabisi urguladı, ani “Orak ayın (iyül) 15-dä Türkiyedä demokratiya ensedi. Bu ensemäklän asker devlet devrimi denemelerin sayfası daymaların-daymalarına kapandı”.

Anadolu Ajansın açıklanası: Orak ayın (iyül) 15-16 gecesindä Türkiyenin silählı kuvetlerindän bölünän askerlär, ani Fethullah GÜLENin terorist kuruluşuna girärdilär, bir asker devlet devrimi denemesi yaptılar. Türkiye öndercilerinin, justiţiya kuvetlerinin hem sıradan vatandaşların karşı koyulmasınnan bu Hunta devrimi başarısız çıktı. Devrim sırasında 240 kişi öldü.

Fotolar – aa.com.tr