Yortululu toplantıda pay aldılar Gagauz Respublikasının kurulmasının veterannarı, Gagauziyanın öndercileri, Pridnestrovyedan musaafirlär, Rusiya büükelçiliin alış-veriş temsicisi.

Toplantı Gagauz Respublikasının Gimnasınnan başladı (Gimna kabledildi 1990-cı yılın Orak ayın (iyül) 22-dä. Gimnanın laflarını yazdı poet Todur ZANET, muzıkayı yazdı kompozitor Mihail KOLSA).

Sora kutlama sözlerinnän zalda bulunannara hem televizordan bu toplantıyı siiredän insannara (GRT hem çoyu televideniye kanalları bu toplantıyı cannı yayında verdilär) danıştılar Gagauziya Halk Topluşu Başı Dimitriy KONSTANTİNOV hem Gagauziya İspolkomu Predsedatelin birinci yardımcısı Valeriy YANİOGLU. (Gagauziya Başkanı Mihail FORMUZAL toplantıda yoktu).

Kendi sözünün sonunda Valeriy YANİOGLU verdi “Gagauziyanın kıymetli kultura zaametçisi” adları diplomalarını anılmış gagauz türkücülerinä Mariya KISAya (Taranenko) hem Elena STULNEVAya. Bundan sora okundu o adlar, kimä Gagauziya Başkanın hem GHT Başının diplomaları verildi.

Birtaan sıravardı söz aldılar Stepan TOPAL, Gagauz Respublikasının ilk hem tek prezidentı; Mihail KENDİGELÄN, Gagauz Respublikasının Üüsek Sovetin predsedateli; İrina VLAH, Moldova Parlamentın deputatı; İvan BURGUCU, Gagauz Respublikasının kurucusu, GHT deputatı; İgor ŞORNİKOV, Aleksey PAKULİÇ, Grigoriy DYAÇENKO, Pridnestrovye temsilcileri; Georgiy KALÇU, Gagauz Respublikasının kurucusu; Todur ZANET, Gagauz Respublikasının kurucusu, Gagauz Respublikasının Gimnın avtoru; Mariya KİOSA, Gagauz Respublikasının kurucusu; İgor KROYTOR, Gagauziya Gençleri Birliin başı.

Toplantının sonunda bir konţert gösterildi. Üülendän sora da Komradın meydanında sport yarışmaları oldu.

PATRETLERDÄ: Söz tutêr Dimitriy KONSTANTİNOV.

Diploma veriler Mariya KISAya (Taranenko).

Diploma veriler Elena STULNEVAya.

Sţenada Lüdmila TUKAN.

Gagauz Respublikasının kurulması halklar arası kanonnara görä kuruldu.

Gagauz Halkın Üstolan Kongresinä ayırılan deputatlar ilktän 1990-cı yılın Orak ayın (iyül) 22-dä 411 oylan Gagauz Milli Gimnasını (laflar – Todur ZANET, muzıka – Mihail KOLSA), Gagauz Milli Bayraanı hem Gerbı kablettilär, sora da Harman ayın (avgust) 19-da aldılar Karar baamsız Gagauz Respublikasını kurmaa.

Bundan sora da, Canavar ayında, Gagauz Respublikasının prezidentının hem Üüsek Sovetinin deputatlarının seçilmesi oldu.

Gagauz Respublikasının ilk hem tek prezidentı Stepan TOPAL yırıldı. Üüsek Sovetin predsedateli da Mihail KENDİGELÄN koyuldu.

Not. Gagauz Respublikasının 24-cü yıldönümü kutlamasının programasında var Komrat kultura Evindä yortulu toplantı hem konţert. Küülerdä hem kasabalarda sport yarışmaları, konţertlär hem başka şenniklär.

PATRETTÄ: Tribunadan nasaat eder İvan BURGUCU (foto Todur ZANETin arhivından).