2020-ci yılın Kırım ayın (dekabri) nomerın PDFı burada:

http://anasozu.com/wp-content/uploads/2020/11/Ana_Sozu_23_24.2020.pdf

http://anasozu.com/gazetamizin-arhivi/

Yardımın verilmä sırasında pay alan Moldova içişleri ministrusu Pavel VOYKUnun, jurnalistlerin, Türk İşbirlii hem Koordinaţiya Agenstvosu Başkannıın Kişinev TİKA programaların Koordinatorluun hem T.C. Kişinev Büükelçiliin personalın önündä konuşarak Türkiye Kişinev Büükelçisi Gürol SÖKMENSÜER annattı “Demokratiya hem Milli Birlik Günü”n Türkiyeyä hem Türk milletinä deyni önemni olduunu hem saygıylan andı o 251 raametli kahramanı, ani 2016-cı yılın 15 Temmuz (Orak ayın (iyül) 15-şi) gecesindä bütün halklan bilä karşı kalktılar FETOcular tarafından yapılan devlet devrimi denemesinä da burada cannarını kurban koydular. Canabisi urguladı, ani başlayıp 2017-ci yılın Orak ayın (iyül) 15-dän beeri Türkiye Respublikası bu günü Türk milletin “Demokrasi ve Milli Birlik Günü” yortusu olarak bakêr.

Büükelçi Gürol SÖKMENSÜER söledi, ani “2016-cı yılın 15 Temmuz (Orak ayın (iyül) 15-şi) gecesindä, terorist hem barbarlık metodlarını kullanarak, satkın askerlär Türkiyenin milletinä hem kimi devlet kuruluşlarına baskı yaptılar. Bu teroristların ardında durardı Fetullah GÜLENin kurduu FETÖ teror organizațiyası. Onnarın neetiydi – Türkiyedä kuvedi elä geçirmää. Kullanıp halkın vergilerinnän alınan uçakları hem tankları, Türkiyedä demokratiyayı yıkmak için, teroristlär havadan hem erdän urdular. Bombalandı Türkiye Büük Millet Meclisi (Türkiye Parlamentı) hem başka devlet kuruluşları. FETOculara karşı koymakta çok insan yaralandı hem 251-ri da şehit oldu. Bu şehitlär Türk milletinin demokratiyada yaşaması için hem demokratiyaya hakkı için cannarını verdilär”.

Türkiye hem Moldova arasında paralel yaparak, T.C. Kişinev Büükelçisi urguladı, ani “Moldova da, Türkiye gibi, terorist kuruluşların plannı atakalarına düştü, da Moldova vatandaşları arasından kahramannar çıktılar, ani memleketin bütünnüünü hem baamsızlıını korumak için kalktılar”.

“Bu üzerä dä, – dedi Büükelçi Gürol SÖKMENSÜER, – biz 251 şehitimizi anmak için, karar aldık bu zor vakıtlarda Moldovanın bütünnüü hem baamsızlıı için ölän 251 kahramanın hem veteranın aylelerinä birär kutu iyecek yardım vermää”.

Yardım kablederäk Moldova içişleri ministrusu Pavel VOYKU şükür etti T.C. Kişinev Büükelçisinä bu hem taa ileri Moldova içişleri ministerlinä yapılan yardımnar için hem urguladı, ani hepsi bu kutular en kısa zamanda belli olan aylelerä verilecek.

Yardımı vermäk sırasına katılannar vardı nicä tanışsınnar 2016-cı yılın 15 Temmuz (Orak ayın (iyül) 15-şi) gecesindä olan olayları annadan bir patret sergisinnän, ani burada Türkiye Kişinev Büükelçilii tarafından hazırlanmıştı.

Anma sırasına katıldılar Türkiye Büükelçiliin hem TİKA Kişinev programaların Koordinatorluunun personalı, Türkiye Büük Millet Meclisi (Türkiye Parlamentı) deputatlı, Gagaiyaya V-ci Halklararası “Invest  Gagauzia-2016” investiţiya forumuna gelän türk iş adamnarı, politikacılar hem da Moldovada yaşayan türk vatandaşları.

Anma sırası balşadı saat 09-05-tä (bu kıpımda 1938-ci yılın Kasımın 10-da durgunmuş Mustafa Kemal ATATÜRKün girgin hem raatsız ürää). Yavaşıcık yarıya indirilän Türkiey Bayraanın önündä bir minutluk saygı duruşundan sora, Büükelçilää gelän insannar Türkiye Respublikasının Milli Marşını (Gimnasını) çaldılar. Sora da hepsi insannar Türkiye Büükelçiliin önündä bulunan ATATÜRKün byustuna saygıylan çiçek koydular.

Anmak sırası Büükelçilliin toplantı salonunda ilerledi. Burada Moldova Türkiye Büükelçisi Gürol SÖKMENSÜER salonda bulunannara ATATÜRK hem Türkiye için kısa bir sözlän danıştı. Nedän sora da Kongaz Süleyman DEMİREL lițeyin üürencileri sıraya uygun bir konțert gösterdilär hem Büükelçilää ATATÜRK resimini baaşladılar

Bundan sora da Akademik hem poet Todur ZANET okudu ATATÜRKün ölüsünä adanmış kendisini peetini “O benim da Ulu ATAM”.

O günü salonda bulunannara danıştı Türkiye Büük Millet Meclisi (Türkiye Parlamentı) deputatı Yüksel ÖZKAN. Sora da hepsi isteyennär, açık mikrofona çıkıp, ATATÜRK için kendi duygularını hem bakışlarını açıkladılar.

O benim da Ulu ATAM
(Óda)

                Mustafa Kemal ATATÜRKä
Ey, Ata, gel da bak benim milletimä –
o da senin gibi kula, maavi gözlü,
senin gibi girgin, derin köklü,
emin basmaz, hodul hem pak üzlü,
senin gibi o! Hey, Oguz oolu,
Sana büünkü peetim, türküm,
benim Ulu Atam, Ulu Bobam, Atatürküm…

Zor vakıtta bol elini sän uzattın,
insanından alıp bizä verdin,
kardaş payı yaptın hem acıdın,
dizdän ayaa sözünnän kaldırdın,
karannıktan aydınnıklaa çaardın,
İstanbuldan bizi da düşündün,
benim Ulu Atam, Ulu Bobam, Atatürküm…

İstanbuldan kitab, üüretmennär geldi –
te ozaman bakışlan fikirlär diişti,
ruhta, canda kuvet kaavileşti.
O yardımınnan biz soluk aldık,
millet olduk, millet kaldık,
Sän, Canabin, bunu ölä gördün,
benim Ulu Atam, Atatürküm…

Uşakları bakıp, seçip, sän ayırdın,
memleketä liţeylerä aldın,
milletimä şafklı yolu açtın,
bilgiylän bilgiçlii cömert verdin,
insan ettin. Etiştirämedin,
üüsüz brakıp, gittin, sündün,
benim Ulu Atam, Ulu Bobam, Atatürküm…

Otuzsekizdi yıl, o Kasımın 10-nu urdu,
saat (beş minut ona) durdu,
Ulu Önder gözlerini yumdu,
raatsız ürek raatlıı buldu,
dünnä sustu, soluk dondu, hem uultu.
Yakar yaşlar yakêr, acı bir gün,
benim Ulu Atam, Ulu Bobam, Atatürküm…

O gün, Atam, heptän, sän sonsuzlaa vardın,
Bizi yasta hem kahırda braktın,
Göktä sünmäz o yıldızın. Adın –
hergün “eni güneş gibi hep duacek”,
Senin o işlerin örüyecek,
hem “Ne mutlu türküm deyenä” hep ötecek,
benim Ulu Atam, Ulu Bobam, Atatürküm, yaşayacek…

Büün Türkiyenin Al Bayraanın yanında
benim da bayraam sallanarsa,
Ana dilim şıralı hem sesli hep akarsa,
Gagauzda Gagauzluk taa yaşarsa,
Bunda senin en büük kıymetin,
Türklerin atası, halkımın atası, büüyüm,
benim Ulu Atam, Ulu Bobam, Atatürküm…
Todur ZANET
Kasım ayın 10-nu, 2014 y.