Türkiye kultura Günneri başladı Komrat kultura Evindän baş meydana örümäklän. Örümektä pay aldılar “Suleyman DEMİREL” liţeyin öndercileri hem üürenciler, Türkiyedän hem Gagauziyadan yaratmak kolektivları.

Örümäk meydana etiştiynän, burada kultura Günnerin ofiţial açılışını yaptılar Kişinev Türkiye Büükelçisi Mehmet Selim KARTAL, Gagauziya Halk Topuşun başı Dimitriy KONSTANTİNOV, “Suleyman DEMİREL” liţeyin direktoru Funda TÜFEKÇİ .

Maasuz bu yortu için “Suleyman DEMİREL” liţeyi Gagauziya üürencilerin arasında peet hem resim konkursu yapmış. Kultura Günnerin açılışında bu konkursta enseyennerä gramotalar hem para baaşışıları verildi.

Ofiţial açılıştan sora da, yortuya gelän insannara deyni, konţert başladı. Konţerttä pay aldılar Gagauziyanın türkücüleri hem uşak oyun ansamblileri. Halk oyunnarında kendi becerikliini gösterdilär “Suleyman DEMİREL” liţeyi ansamblisi, “Kadınca” ansamblinin körpä oyuncuları, Gagauziyanın poläk derneenin ansamblisi.

Taa sora sţenaya çıktı Gagauziyaya maasuz gelän Türkiyenin anılmış rok muzıkantı Halük LEVENT. Canabisi sţenadan may çalmadı. Hep sţenanın önündä hem insan arasındaydı.  Türkülerini çalmak arasında Halük LEVENT yanına çaarardı ba bir poetı, ba bir muzıkantı, ba bir siirediciyi da onnalan bilä türkü çalardı.

Bölä bir şou Gagauziyada taa olmadıydı. Hepsi insannar şendi hem onnarın keefi erindäydi. Bu gözäl hem bereketli konţerti insannar ömür boyunca unutmayaceklar.

Foto – gagauzmedia.md