Miroslava YASIBAŞ Kişinevdan “Bravisimo” ansamblisindä dört yaşından beeri pay alêr hem modern hem da djaz (jazz) modern stilindä tanț eder. O üserä dä, Romıniya festivalindä Moldovadan “Bravisimo” ansamblisini temsil ederäk, bu stildä anılmış kemençeciykanın Vanessa-Maenin (Vanessa-Mae Vanakorn Nicholson) “Storm” kompozițiyasına tanț etti.

Körpä oyuncuykanın anasının, Nataliya YASIBAŞın, açıklamasına görä, Miroslava aftada altı gün ikişär saat tanțları üürener hem, nicä annaşıldı, bu iş artık oldu diil salt onun havezi, ama yaşamasının bir payı da.

Miroslava YASIBAŞın aylesi Kişinevda yaşêêr, ama Miroslava ana tarafından, Kongaz küüyündän, kopmêêr hem kendisinin gagauzka olduunu hodulluklan söleer. Onuştan da Romıniyada bu enseyişini Kongaza baaşladı.

“Açan bän enseerim da öter Moldovanın Gimnası – büük hodulluk içimi doldurêr. Bobam herkerä deer, ani sölärkenä, ki bän Moldova Respublikasını temsil ederim, urgulayım, ani kendim Gagauziyadan duumalıyım”. Pek hodullanêrım, ani gagauzkayım hem bu enseyişimi ana küüyümä, Kongaza, baaşlêêrım” – söleer Miroslava YASIBAŞ.

Miroslava YASIBAŞın horeografı oldu Snejana APOSTOL, bildirer gagauzinfo.md.

Moldovanın komandasında olan Nikolay GRAHMEZ pay aldı çempionatın 23 yaşındanan Under-23 yarışmalarının 70 kg kadar kategoriyasında.

Poyraz Makedoniyadakı serbest güreştä Evropa çempionatında Moldovadan taa iki güreşçi medali kazandılar – Radu LEFTER (97 kg kadar kategoriyasında gümüş aldı) hem Georgi EHAN (92 kg kadar kategoriyasında bronza aldı) bronza, bildirdi Moldova güreş Federațiyası.

Bu uroo kurannar 2-ci “A” klasının önderciykası Sofiya Georgiyevna ZAHARİYA hem da lițeyin gagauz dilindä hem literaturasında II-ci kategoriyada üürediciyka Mariya İliyniçna DUŞKOVA çalıştılar, ani sıra pek meraklı geçsin hem uşaklara deyni kalıcı olsun.

Urok için hazırlanmıştı tencerelär, çüvennär, sepetçiklär hem yımıtaları erleştirmää deyni maasız farfiriciklär. Belli ki, yımırtaları boyamaa hem donaklamaa deyni tertiplär hem mallar da – boyalar hem Pasekllä tematikasına görä yımırtalara yapıştırılan maasuz kiyatçıklar.

Uraa gagauzluk atmosferasını vermää deyni, Mariya İliyniçna DUŞKOVA hem Sofiya Georgiyevna ZAHARİYA düzünmüştülär gagauz milli rubalarına. Onnar bütün cömertliklän hem can sıcaklıınnan annattılar hem gösterdilär üürencilerä nicä yımırtaları kaynatmaa, nasıl onnarı dooru boyama hem donaklamaa. Uşaklara annadıldı, ani Paskellänin en önemni simvolu yımırta var enilenmenin hem enidän duumanın simvolu. Sayılarmış, ani okunmuş yımırta var nicä sündürsün ateşi, yangını.

Bu sıraya katılan lițeyin direktoru Mariya Dimitrievna ÇEBANOVA, zavuçlar – Zinaida Filipovna NEYKOVÇEN, Mariya Nikolaevna UZUN, Mariya İvanovna ÇEBANOVA hem Evgeniya İvanovna ANAUT da bir tarafta kalmadılar. Onnar da bu uurda kendi bilgilerinnän uşaklarlan paylaştılar.

Paskellä yortusuna deyni insannar donaklêêrlar yımırtaları hem boyêêr onnarı türlü renklerdä, ama onnarın arasında mutlaka lääzım olsun kırmızı renktä yımırtalar. Bütün bu sıradan uşaklar

kendilerinä çok meraklı işlär, angıları kalmış bizä uzak dedelerdän.

Pek meraklı master-klas, ani var bir laf, bir kıpımda geçti da umut var, ki bu unudulmaz iş artık uşakların cancaazlarının en paalı erlerindä kaldı.

Not. “Gagauzlarda yımırta boyamak – bu haliz bir ustalıktı. Boyaya görä, hepsi yımırtaların kendi adı varmış: birkaç boyaylan boyalı – “alaca”; kaz tüüyünnän yazılı – “yazılı”; küllän hem parafinnän yazılı – “kondeyli”, ortasında bir çizi var – “kuşaklı”. Bundan kaarä, yımırtaya yapılan resimnerin adları da var: “puluklu”, “kaplın”, “sinek”, “yapraklı”, “koç kafası”, “tırmık””. (Akademik Todur ZANET, “Gagauzların kayıp olan dilinin hem kultura adetlerinin Moldovada korunması” 3-cü kiyat (“Gagauz yortuları, adetleri, sıraları”), s. 62, Kişinev, 2017 y.).

“BİLGİ ALEYASI”
“Kongazın No1 orta şkolasının üüredicileri adına hem onnarın hayırlı çalışmalarına tanımak hem
saygı nışanı olarak KARASENİ kardaşları tarafından kuuldu
08.11.2014”

Aleyayı kurmaaa deyni, kongazlı kardaşlar Demyan, Mihail hem İosif KARASENİ ilktän, katlanıp ta, Kongazın 1-ci liţeyin yanından geçän hem küüyün mezarlına gidän sokaa düzmää başladılar. Sokak taşlan döşendi, yannarına şafk için elektrika fenerleri koyuldu hem otlan eşilliklär ekildi. Sora da, açılış günündä Aleyada fidannar dikildi.

Bilgi Aleyasının kurulma hem açılış yortusuna toplandılar küülülär hem musaafirlär başka erlerdän da. Yortunun şannı musaafirleri olarak Bilgi Aleyasının açılışına, kurulmasına hem aleyada birär fidan ekmää deyni, o günü Kongaza geldilär Türkiye Respublikasının Büükelçisi Mehmet Selim KARTAL, “Ana Sözü” gazetanın baş redaktoru, Gagauz Milli Gimnanın avtoru, poet Todur ZANET, “Trans Oil Grup” kompaniyanın prezidentı Vaja DJAŞİ, Komrat muniţipiyin primarı Nikolay DUDOGLO, Gagauziya Halk Topluşun ilk başı Pötr PAŞALI, «Московский Комсомолец в Молдове» gazetanın temsilcisi Georgiy STOJİLO, Polşadan “Movin LTD” firmanın direktoru Tomasz VOGTMAN, Moldova Respublikasının kıymetli trenerları Evgeniy KRİSTİ hem Anatoliy RAEVSKİY, Gagauziyanın güreş federaţiyasının viţe-prezidentı Gadjimagomed GUSEYNOV, “Glia” CAP kompaniyanın prezidentı Konstantin PUTREGAY.

Eni düzülmüş sokak için hem Bilgi Aleyasının kurulması için ilk laf verildi Demyan KARASENİya. Kısa bir sözdän sora Canabisi açıkladı, ani kardaşlar karar almışlar, ani sokaan hem Aleyanın açılış şiridini kessin onnarın anası Stefanida Mihaylovna. Muzıka fanfaralarının hem insannarın palma düülmesi sesi altında Stefanida Mihaylovna kesti şiridi. Nedän sora hepsi musaafirlerä teklif edildi eni yolu denemää hem yaklaşmaa Kongazın 1-ci liţeyin aulunun ana girişinädän. Burada durgunup, hepsinä oldu kolayı siiretmää bir konţert, angısını, üüredicilerin yardımınnan, hazırlamıştılar 1-ci liţeyin üürencileri.

Konţerttän sora teklif edili yortunun şannı musaafirleri Mehmet Selim KARTAL, Todur ZANET, Vaja DJAŞİ, Nikolay DUDOGLO, Pötr PAŞALI, Georgiy STOJİLO, Tomasz VOGTMAN, Evgeniy KRİSTİ, Anatoliy RAEVSKİY, Gadjimagomed GUSEYNOV, Konstantin PUTREGAY, Kongaz küüyün primarı Konstantin TELPİZ, Kongazın 1-ci liţeyin matematikada üürediciykası Ekaterina Nikolaevna TULBA, Kongazun Troiţa klisenin baş popazı Ay-boba İVAN (Lesniçenko) hem da Kongazın 1-ci liţeyin direktoru İordan YASIBAŞ eksinnär Aleyada birär kaştan aacı. Bu aaçların yanında ilktän koyuldu ekennerin adlarını açıklayan geçici yazılar (taa sora bu geçici yazıların erinä temel yazılar koyulacek).

Aaçlar dikildiktän sora, Türkiye Respublikasının Büükelçisinä Mehmet Selim KARTALa hem Kongaz 1-ci liţeyin matematikada üürediciykasına Ekaterina Nikolaevna TULBAya teklif edildi “BİLGİ ALEYASI”nın anmak taşını açmaa, da Canabileri taştan biyaz bezi kaldırdırıp, anmak taşını açtılar. Bununnan Aleyanın ofiţial açılışı yapıldı.

Bundan sora Kongazun Troiţa klisenin baş popazı Ay-boba İVAN hem ikinci popazı Ay-boba İVAN Aleyanın açılması için slujba yaptılar hem da “BİLGİ ALEYASI”nı, hepsi fidannarı, sokaa hem insannarı ayazmaylan ayozladılar.

Bu sıralar bittiynän Aleyanın açılış yortusunnan ilgili kısa bir miting oldu. Mitingta kutlama hem şükür sözlerini tuttular: Konstantin TELPİZ, Mehmet Selim KARTAL, Todur ZANET, Nikolay DUDOGLO, Vaja DJAŞİ, Tomasz VOGTMAN, İordan YASIBAŞ.

Mitingtan sora da, üç kardaştan birisi Mihail KARASENİ, şükür sözünü yapıp, sözün sonunda Kongaz küüyün primarına hem Kongazın 1-ci liţeyin direktoruna “BİLGİ ALEYASI”nnan ilgili Sertifikatlar verdi. Sertifikatlara görä Kongazın primariyasına hem 1-ci liţeyinä Aleyä hem da sokak bakmak hem korunmak için verildi.

Hepsi gagauzlar bilerlär, ani Kasım yortusunun günündä adanmış kurbannar kesiler hem masalar kurulêr. Bu adeti bozmamaa deyni, Karaseni aylesi da o günü kendi yakınnarı hem şannı musaafirleri için gözäl bir yortu masası kurdu. Masada da kutlama hem şükür sözleri biri-biri ardı aktı.

Demyan, Mihail hem İosif KARASENİ meţanatlıınnan Kasım ayın (noyabri) 8-dä Ay Dimitri Günündä Kongazda başka büük meropriyatiyaları da oldular. Onnarın arasında sport yarışları (güreş, masa tenisi, gira kaldırmak, şaşki, şahmatı). Avşam üstü da Kongazın kultura Evindä büük bir konţert oldu. Konţerttä pay aldılar Gagauziyanın hem Moldovanın anılmış ansamblileri hem artistleri.

Bölä gözäl bir Günün kapanışını yaparak, kultura Evin sţenasından küülülerä hem musaafirlerä danıştı Mihail KARASENİ. Kardaşlarının hem kendisinin adından Canabisi şükür etti hepsinä kim pay aldı bu yorunun meropriyatiyalarında, hepsinä kim gelip katıldı sıralara.

Yortuyu kapadarak Mihail KARASENİ açıkladı, ani Karaseni kardaşları, meţenatlık işi olarak, 10 bin ley yardımı yapêrlar Kongazın 5 şkolalasına hem 5 uşak başçasına, klisesinä, kultura Evinä, “Altıncık” uşak oyun ansamblisinä, pensionerların reabilitaţiya merkezinä hem kusurlu uşakların merkezinä. Bundan kaarä başka türlü yardımnar yapılacek küüyün veterannarına hem pensionnerlarına.

Mihail KARASENİ açıkladı, ani kurulacek bir Fond, angısnın yardımınnan Kongazda gözäl bir park ekilecek, Muzey açılacek hem başka kultura işleri yapılacek.

Fotolar – İvan ZANET hem Todur ZANET

Geler o diil musaafirlää, ama internattına yardım yapmaa deyni. Da, nicä var bir laf, taa eşiktän ennerini suayıp, meciyä başlêêr. İnternatın direktorunnan Sofya DYAKOVAylan barabar, en lääzımnı uurları seçip, işä girişer.

İngrid KRUGun zaametinnän internata su geçirildi (25 bin Euroluk proekt), tepliţalar kuruldu (15 bin Euroluk proekt), masterskayalara remont hem başka işlär yapıldı. Şindi dünneydä hem Germaniyada krizis olduu için, SES kolaylıkları aazaldılar, da İngrid KRUG karar aldı, internata yardım etmää deyni, kendi başına sponsor aaramaa.

Lääzım bilmää hem tanımaa İngrid KRUGu, iilik getirän gülär üzlü bu insanı, duymaa onun dolaya sıcaklıı hem raatlıı serpän canını, annamaa deyni, ani Canabisinä bu iş ta verilecek. O ölä sevmiş Kongaz internarın insannarını, üürencilerini hem çalışannarını, ani şindi artık kendi parasınnan burayı geldi da eni hem büük bir yardıma başladı.

Yardım sa diil çok, diil aaz – yardım internatta zanaat verän şkola için bir üüretmäk binası yapmaa. Bu şkolada üç zanaatı üüredeceklär: aşçı, terzi hem eşillendimä ustası.

Bu işi başarmaa deyni büük para lääzım. Binanın proektı sade 40 bin Euro tutêr. Kendi çalışmalarınnan hem şeremetliinnän İngrid KRUG bu parayı sponsorlarda artık buldu da Hederlez ayın (may) 15-dän beeri proektın yapılması başlayacek.

Onuştan “Kolay gelsin!” hem “İi saatta!” deeriz ona. Ne mutlu canına, İngrid KRUG!