2020-ci yılın Küçük ayın 2-dä Gagauziyanın kultura hem turizma Upravleniyası açıkladı bir yaratma Konkursu “Hederlez Gagauziyada” festivalin Gimnasına.

Hederlez günü Gagauziyanın radio hem televideniyası (GRT) gösterdi 7 saatlık bir yortulu konțert, angısı başladı ondan, ani açıklandı, ki Çiçek ayın (aprel) 28-dä “Hederlez Gagauziyada” festivalin Gimnasına yaratma Konkursu jürisi incelemiş orayı verilän 6 yaratmayı da karar almış, ani “Hederlez Gagauziyada” festivalin Gimnası olacek tükü “Gagauziyada Hederlez”, angısını yazdılar poet Todur ZANET hem kompozitor İliya FİLEV.

Hederlez yortusunun konțertı da açıldı bu gimnaylan, angısını çaldılar türkücülär Yuliya ARNAUT hem Sergey İVANOV.

Tiparlêêrız “Hederlez Gagauziyada” festivalin Gimnasının laflarını:

GAGAUZİYADA HADERLEZ 

Hederlez, Hederlez –
Gagauziyada Hederlez!

I.
Eveldän yaz başlardı ondan,
Koyunnar yollanardı kıra.
Git da gel, çorbacı, tarladan,
Ekinnär, bak, gözäl mi orda.

Ekindä tavşannar saklansın,
Hederlez bereket getirsin,
Atılsın feslendän o fallar,
Sevinsin kısmetä büük kızlar.

REFREN:
Gagauz yortusu Hederlez,
Sevindir hepsini hem bizi!
Ko olsun bereket hem kirez,
Buyursun yortuya herkesi!
Hederlez, Hederlez –
Gagauziyada Hederlez!

II.
Ay Georgiy günü – Hederlez,
Yaşamaa o verer büük havez!
Sallangaç gençleri sallasın,
Kantarda uşaklar çekilsin.

Horuya toplansın insannar.
Koşuya verilsin baaşışlar.
Kesilsin kurbannar – büük başlar,
Filcanda atlasın şaraplar.

REFREN.

2009-cu yıladan Gagauziyada “Ana Dili” yortusu Orak ayın (iyül) 30-da bakılardı. Bu data baalıydı gagauz yazıcısının hem profesorunun Dionis TANASOGLUnun kirilița temelindä hazırladıı alfavitın 30.07.1957 günündä Moldaviya SSRın Üüsek Soveti Prezidiumun kabledilmesinnän.

Taa sora, Gagauziya öndercilerin kararına görä, “Ana Dili” yortusunun kutlaması alındı Çiçek ayın (aprel) 27-dä, da bununnan hem Mihail ÇAKİRin hem da Dionis TANASOGLUnun unudulmasına yol açıldı.

Buyurun, okuyun ana dilimizä yazılı poet Todur ZANETin peetini “Canım, soluum – Ana Dilim”:

Canım, soluum – Ana Dilim
Canım, soluum – Ana Dilim,
Sän, Canabin, – eni gelin,
Pek utancak hem donaklı
Hem ak üzün da duaklı.

Telli pelik – cümlelerin
Hem pek derin sörpetlerin.
Mercan gibi söleyişin –
Akıllılarlan var işin!

O lafların incä, naazlı,
(kimär kerä takazalı!)
Taazä eserlär hem da pak
Hem suvazlêêrlar pek yalpak.

Tatlı şıra gibi sözün,
Pek seviner ona gözüm.
Temiz, kıvrak giyimnerin,
Halka datlı o sözlerin.

Benim soluum, Canım benim –
Paalı hem da sonsuz Ana Dilim.
Todur ZANET,
12-19.09.2018

Te ne yazdılar Mihail ÇAKİR için Moldovan yazıcısı Nikolay KOSTENKO (21.12.1913 – 29.07.1993) hem Akademik Todur ZANET:

Moldovan yazıcısı Nikolay KOSTENKO: “Herliim moldovannar için Mihail ÇAKİR Basarabiyanın altın kiyadına yazıldıysa, Moldovanın üülen tarafında yaşayan vatandaşlarımıza, gagauzlara deyni, o halizdän bir apostol oldu”.

Akademik Todur ZANET: “Aydınnadıcı Ay-Boba Mihail ÇAKIR gagauzların dilindä hem kulturasında, istoriyasında hem bilimindä, dinindä, herbir gagauzun üreendä hem canında ayırı bir er kaplêêr. Bir şüpesiz var nicä demää: herliim büünkü gagauzlar varsa, hem onnarın gagauzluu yaşarsa, bu gagauzların apostolunun, Ay-Boba Mihail ÇAKİRin Allahtan yollanan vergisinnän hem zaametinnän korundu”.