Bu yaslı anma sırasında pay aldılar sıradan insannar, aaraştırmacılar hem bilim insannarı, muzeycilär, erindeki hem merkez kuvetlerin temsilcileri, üüredicilär hem üürencilär.

Yas sırasından sora hepsi yollandılar küüyün “Acı köşesi” Memorialına, neredä Aaçlıın kurbannarın anmak taşlarına çiçek koyuldu. Bundan sora da yapıldı “Moldova SSRında aaçlıın (1946-1947) başlama gününün 80-ci yılı: anmak, büünkü aaraştırmalar hem geçmişin urokları” adlı bilim konferențiyası.

Avdarma küüyün istoriyası muzeyin kanadı altında yapılan bu tombarlak masada pay aldılar Moldovadan, Gagauziyadan hem Pridnestrovyadan bilim insannarı, aaraştırmacılar, muzeycilär, yazıcılar hem cümne insannarı.

Avdarma muzeyin kurucusunun İgnat KAZMALInın hem profesor Virciliu BIRLADEANUnun moderatorluunda yapılan bu tombarlak masanın aar musaafiri oldu Moldova kultura ministrusu Sergiu PRODAN.

Lițeyin “İstoriya sedefleri” hem “Muzeycilär” krujoklarını götürän üürediciykalar Praskovya Dimitrievna DOYKOVA, Matröna Nikolaevna BARGAN, Agafya Vasilyevna GAYDARCI hem bu krujoklara gidän 7-ci “A” hem “B” klaslarından üürencilär, aaçlık kurbannarını anmaa deyni, Kongaz mezarlıına gittilär.

Bu insannar baş iilttilär zorlan yapılan aaçlıktan ölän kongazlıların önündä hem onnarın ortak mezarına çiçek koydular hem da burada mum yaktılar.

Aaçlık kurbannarını Anmak Günü” çerçevesindä yapılan “Güç sayfa Gagauziyada: 1946-1947” sırasında pay aldılar Baurçu gimnaziyasının 9-cu klasta üürencileri hem başka baurçulular.

Urun çannarı onnar ötsünnär!
Aslıyı dünneyä essinnär!
Neleri geçirdik görsünnär!
Neçin yas tutêr analar bilsinnär!

“Aaçlık kurbannarını Anmak Günü” bakılması için kararı 2019-cu yılın Canavar ayın (oktäbri) 15-dä kabledilän zakonun kolaylıınnan Baurçu küüyündä dä 2021-ci yılda koyuldu bu uurda bir anmak taşı.

“Aaçlık kurbannarını Anmak Günü” – bu gün istoriyada ayırı bir gün.

Gagauziyada 1946-1947 yıllarda hepsi yaşayannarın may yarısı aaçlıktan öldü. Gagauz küülerindä taa çok insan kaybeldi, nekadar başka dolaylarda. Baurçu küüyümüzdä 7500 insandan 3000 insan kabaatsız kurban oldular bu titsi aaçlık vakıdında. Bütün Moldovada bu sayı büüdü 200 bin kişiyädäk.

“Biz sayrêrız, ani önemni aklımızda tutmaa o çirkin vakıtları. Bunun için lääzım bu gün ortak kardaşlık mezarlarında birär mum tutuşturmaa hem anmaa hepsi aaçlık vakıdın kurbannarını. Bu bizim ruh uurunda borcumuz o insannarın önündä, angıları gömülmedilär hristian adetlerinä görä. Olacêydı islää, ki Avtonomiyanın herbir yaşayanı bilsin o zor vakıtlar için, angılarını geçirdi gagauz halkı”.

Şindiki zamanda Avtonomiyada yaşlı insannar annadêrlar o çirkin zamannar için, çünkü gençlär da bilsin hem ansın bu insannarı…

Lüdmila KARAPUNARLI, Baurçu küüyün gimnaziyası

“Aaçlık kurbannarını Anmak Günü” bakılması için kararı 2019-cu yılın Canavar ayın (oktäbri) 15-dä kabletti ozamankı Gagauziya Halk Topluşu.

Zulum 1946-1947 yıllarda olan Aaçlık kurbannarın sonuçları burada: http://anasozu.com/gagauzlara-karsi-yapilan-aaclik-genitidin-70-ci-kara-yildonumu-hem-o-genotidin-buunku-sonuclari/

Todur ZANETin “Benim bir kabaatsız kırılan GAGAUZ Halkıma REKVİEM” okuması burada: https://www.youtube.com/watch?v=u_BZ2_rKu0g&t=182s

“Gagauziyada bakılêr” demäk biraz yannış, zerä taa doorusu bu günü baktılar sıradan insannar, üürencilär hem üüredicilär, canı yakın olan insannar.

Avdarmada bu insannar toplandılar küüyün mezardakı Çasovnänın yanında, angısı kuruldu

bu küüdä 1946-1947 yıllarında aaçlıktan ölän 583 kişiyi hem 1941-1945 yıllarında tiftan ölän 575 kişiyi anmak için.

Çeşmä küüyündä Aaçlık kurbannarını Anmak Memorialına geldilär Çeşmä küüyün uşak yaratmak Evin üürencileri hem üüredicileri, da saygıylan andılar o zavalıları.

Kongazda, Todur Zanet adına teoretik lițeyindän “Muzeycilär” krujoondan üürencilär, kendilerinin önderciykasınnan A.V. GAYDARCIyan hem gagauz dilindä hem literaturasında üürediciykasınnan M.İ. DUŞKOVAylan lițeyin foyesında Aaçlıklan ilgili stend kurdular hem, mezarlaa gidip, aaçlık kurbannarını andılar.

Bu sıradan insannar için. Şindi ne düşer başkannar hem başkankacıklar için.

5 yılın içindä, Gagauziyada kuvettä bulunannar hem gagauzların ekmeklerini iyennär, nicä ozaman 1946-1947 yıllarda idilär, diil ani ansınnar, ama onnarın aazlarından Aaçlık kurbannarı için bir “çıt” ta çıkmadı – başlayıp başkankadan da başarıp en ufak başkancıklarlan. HİÇ BİRİNDÄN!!!

5 yılın adı var! 5 yılın içindä hiç bir BAŞKAN, Halk Topluşu BAŞI çıkmadı da desin bir acızgannık lafı o kurbannar için, angıları 1946-1947 yıllarında bir kabaatsız er içinä sokuldu. HİÇ BİRİCİİ!!!

Sora da hererdä, bilmäm ne suratlan, nestelerini yayêrlar, ani bizi genä ezärmişlär, Gagauziyayı yok etmää istärmişlär hem onnarı Sibirlerä yollamaa istärmişlär. Ölä olêr, açan kendiniz kendinizi unudêrsınız.

Akademik hem poet Todur ZANET, Gagauz Millli Gimnanın avtoru

Zulum 1946-1947 yıllarında Sovet rejımının  tarafından gagauzlara karşı zorlan yapılan aaçlık genoțidın kabaatsız kurbannarını analım. Topracıkları ilin olsun!

Aaçlık kurbannarın sonuçları burada: http://anasozu.com/gagauzlara-karsi-yapilan-aaclik-genitidin-70-ci-kara-yildonumu-hem-o-genotidin-buunku-sonuclari/

Aaçlık kurbannarına REKVİEM burada: https://www.youtube.com/watch?v=u_BZ2_rKu0g&t=182s

GAGAUZ halkı unutmadı kimi kaybetti ozaman. Ama Gagauziyanın başında olan Başlar, Başkankalar hem başkancıklar, daada tutulmalar gibi, yarım laf ta bu büük AAÇLIK tragediyası için sölämedilär: ne bir acızgannık, ne bir baş iiltmäk, ne bir prost etmäk sözü. Bi-şey-cik!!!

Ne Gagauziya Başkankasının saytlarında, ne Gagauziya Halk Toluşu saytında, ne Gagauziya bilim mierkezin saytında, nene Gagauziyanın üüredicilik hem kultura saytlarında, ne da Gagauziya İspolkomun başka bir sytlarında  Gagauziyada 1946-1947 yıllarında “Aaçlık kurbannarını Anmak Günü”nnän hiç bir saygı yazısı da yok. Kimä lääzım halktan, ayından hem aydınnıktan kopma bu Başlar, Başkankalar hem da onnarın yanında bulunana başkancıklar?

Akademik hem poet Todur ZANET, Gagauz Millli Gimnanın avtoru

Kırım ayıın (dekabri) 17-dä Avdarma küüyün istoriya muzeyindä oldu prezentațiya eni çıkan 1946-1947 yıllarında aaçlıı annadan “Can acısı” kiyadına, angısı topladı içinä Avdarma küüyün istoriya muzeyin kurucusunun İgnat KAZMALInın teklifinä görä yapılan “Gagauziyada 1946-1947 yıllarda olan aaçlıın 70-ci yıldönümünä “CAN ACISI” aaraştırma konkursunda toplanan aaçlıı geçirennerin annatmalarını: https://www.facebook.com/profile.php?id=100066518916259

Prezentațiya götürdü Avdarma küüyün istoriya muzeyin direktoru Elena KARAMİT, angısı başlattı prezentațiyayı, artık istoriya olan hem “CAN ACISI” aaraştırma konkursunu annadan foto hem video materiallarlan, daldırıp o günü muzeydä bulunan musaafirleri o titsi aaçlık 1946-1947 yıllarına. Musaafirlerin arasında sa vardılar “CAN ACISI” aaraştırma konkursunu hazırlayannar hem onda pay alannar, vardılar Gagauziya Halk Topluşun eski hem eni deputatları, Gagauziya küülerin kimi primarları, vardılar popazlar, bilim adamnarı, aaraştırmacılar hem sıradan insannar.

Bü önemni girişi yaparak, Elena KARAMİT, başladı laf vermää muzeydä bulunan insannara, kısadan annadarak onnarın “CAN ACISI” aaraştırma konkursunda rollerini hem “Can acısı” kiyadında pay almalarını. Başta Avdarma küüyün istoriya muzeyin kurucusu İgnat KAZMALI olarak, sıravardı söz aldılar konkursta pay alan üürencilär, aaçlıı geçirän hem aaçlık için annadan avdarmalıykalılar Akseniya İvanovna KIRMA hem Vasilisa Kirilovna GARGALIK (Tumba), “Gagauziyada 1946-1947 yıllarda Aaçlık kurbannarını Anmak Günü” bakılmasını zakon uuruna getirmeyä çalışan hem başaran Gagauziya Halk Topluşun ozamankı deputatları Elena KARAMİT, Ekaterina JEKOVA, Aleksandr TARNAVSKİY hem Mihail JELEZOGLU (“Gagauziyada 1946-1947 yıllarda Aaçlık kurbannarını Anmak Günü” bakılmasının GHTya danışmasını 2018-ci yılda hazırladılar ozamankı GHT deputatları Elena KARAMİT hem Ekaterina JEKOVA), Avdarma küüyün primarı Marina KAPSAMUN, Çeşmäküüyün primarı Sofiya JEKOVA, Tomay küüyün primarı Födor TOPÇU, Gagauziyada 1946-1947 yıllarda Aaçlık kurbannarını Anmak Gününü kurmaa hem onu Canavar ayın (oktäbri) 19-da bakmaa teklif edän Akademik hem yazıcı Todur ZANET, Aaçlık kurbannarını Anmak Günün kabledilmesindän arka olan Dr. Konstantin TAUŞANCI hem cümne insanı Leonid DOBROV, aaçlıı hem istoriyayı aarştıran Konstantin KURDOGLU, Avdarma küüyün popazı Ay-Boba Konstantinın hem başkaları.

Prezentațiyadan sora hepsinä muzeydä bulunannara baaşlandı birär “Can acısı” kiyadı da insannar, aaçlık kurbannarını anmak için hem onnarın anmak taşlarına çiçek koymak için geçtilär Avdarma küüyün “ACI KÖŞESİ” Memorialına hem gittilär Avdarma küüyün mezarlıında çasovneyä, angısının merkez taşında yazılı:

“Bu çasovnä ayozlandı Panaiyanın “Mayıllık” ikonasının hatırına hem kuruldu büük zeetlär içindä ölän avdarmalıların anmasına:

– 1941-1945 yıllarında tiftan ölän 575 kişiyä;

– 1946-1947 yılında aaçlıktan ölän 583 kişiyä.

(Onnar çoyu bu erdä topluca gömülü).

Hepsinin adları “ACI KÖŞESİ” memorial kompleksında granit taşlarında oymaylan yazılı.

ALLAA HEPSİNİ RAAMET ETSİN…

19.10.2019”

Nedän sora da “Can acısı” kiyadın hem “CAN ACISI” aaraştırma konkursun mețenatının  İlya KAZMALInın hem bütün KAZMALIlar aylesinini adından, Gagauziyada 1946-1947 yıllarda Aaçlıkta raametli olannarın cannarı için bir pomana sofrası kuruldu.

Not. Kiyat “Can acısı” (Сборник ученических исследовательских работ «Боль души») tipara hazırladı Avdarma küüyün istoriya muzeyindä. Tirajı – 1000 taanä.

Bu oldu gimnaziyanın gagauz dili hem literaturası üüredicisiykasının Anna Kirilovna GÜMÜŞLÜnün 8-ci klasta “Aaçlık kurbannarı” temasına aklına getirmeklär uroo çerçevesindä.

Kiriyet küüyün aaçlık kurbannarın toplu mezarı başında 8-ci klasın üürencileri, mezara çiçek koyup hem mum yakıp, saygı duruşu yaptılar, nedän sora annattılar kendi senseleleri için, angıları 1946-1947 yıllarında aaçlıktan öldülär. Onnar adadılar kendi üürediciykasına, ani her yıl aaçlık kurbannarın mezarını dolaşmaa, mezarlıı pak tutmaa.